އެމެރިކާގެ ދަށުގޭގެ ބާރު ރެޕަބްލިކަން ޕާޓީން ނަގައި ފުރިހަމަ ކޮންޓްރޯލް ޓްރަމްޕް ނަންގަވައިފި

އެމެރިކާގެ ރައްޔިތުންގެ މަޖިލީހުގެ ދަށުގެ، ހައުސް އޮފް ރެޕްރެޒެންޓޭޓިވްސްގެ ވާދަވެރި އިންތިހާބުގައި ރިޕަބްލިކަން ޕާޓީއަށް އެ ގޭގެ ކާމިޔާބު ލިބޭނެ ކަމަށް މީޑިއާތަކުން ލަފާކޮށްފައި ވަނިކޮށް، ރިޕަބްލިކަން ޕާޓީއަށް އެމެރިކާގެ ދައުލަތުގެ ފުރިހަމަ ކޮންޓްރޯލް ލިބިއްޖެ އެވެ.

ރައްޔިތުންގެ މަޖިލީހުގެ މަތިގެ، ސެނެޓުގެ އަގުލަބިއްޔަތު ރިޕަބްލިކަން ޕާޓީއަށް ލިބުނީ މި ހަފުތާގެ ކުރީކޮޅުގަ އެވެ. އޭގެ ކުރިން އެމެރިކާގެ ރައީސް ކަމުގެ ރޭސް ޑޮނަލްޑް ޓްރަމްޕް ވަނީ ކާމިޔާބު ކުރައްވައިފަ އެވެ.

ސަރުކާރު ހިންގުމުގެ ބާރާއި ގާނޫނު ހެދުމުގެ ބާރު ޓްރަމްޕަށް ލިބިވަޑައިގަތުމުން، 2017 ވަނަ އަހަރު އޭނާ ތަންފީޒު ކުރައްވަން މަސައްކަތް ކުރެއްވި، އިމިގްރޭޝަނާއި އެހެނިހެން މުހިންމު ކަންކަމުގެ އެޖެންޑާތައް ހާސިލު ކުރުމަށް ބާރެއް ލިބިގެންދާނެ އެވެ.

އެކަމުގެ ސަބަބުން ޑިމޮކްރެޓުންނަށް ހިޔާލު ތަފާތުވާ ސިޔާސަތުތަކަށް ގޮންޖެހުމުގެ ފުރުސަތު ވެސް ކުޑަވެގެންދާނެ އެވެ. ނަމަވެސް ސެނެޓްގައި ބައެއްކަން ނިންމަން ރިޕަބްލިކަން ޕާޓީއަށް ބޭނުންވާ ވަރަށް ވޯޓު ހޯދުމުގައި ދަތިތަކެއް ކުރިމަތިވެދާނެ އެވެ.

ބީބީސީގެ އެމެރިކާގެ ޕާޓްނަރު ސީބީއެސް ނިއުސް އިން ލަފާކުރި ގޮތުގައި، ދަށުގެ އިން ރިޕަބްލިކަން ޕާޓީއަށް މަދުވެގެން 218 ގޮނޑި ލިބޭނެ އެވެ. އަދި އަންނަ ޖެނުއަރީ މަހު ކޮންގްރެސްގެ އާ ދައުރެއް ފެށޭ އިރު ޑިމޮކްރެޓުންނަށް މަދުވެގެން ދަށުގެއިން 208 ގޮނޑި ލިބޭނެ އެވެ.

ދަށުގޭގެ 435 ގޮނޑީގެ އަގުލަބިއްޔަތަކީ 218 ގޮނޑި އެވެ. ސީބީއެސް އިން ލަފާކުރާ ގޮތުގައި، ރިޕަބްލިކަން ޕާޓީން ނަގާ ގޮނޑިތަކުގެ އަދަދު 220 އާއި 222އާ ދެމެދުގެ އަދަދަކަށް އަރާނެ އެވެ.

ސަތޭކަ ގޮނޑި ހިމެނޭ ސެނެޓްގައި ރިޕަބްލިކަން ޕާޓީން 53 ގޮނޑި ކޮންޓްރޯލް ކުރާ އިރު، ޑިމޮކްރެޓިކް ޕާޓީ އާއި އެ ޕާޓީއާ ގުޅިފައިވާ އަމިއްލަ ފަރާތްތަކަށް 47 ގޮނޑި ލިބޭނެ އެވެ.

ދަށުގެ އިން ރިޕަބްލިކަން ޕާޓީއަށް ލިބޭނީ ކިހާވަރެއްގެ އަގުލަބިއްޔަތެއްކަން އަދި ވަނީ ކަށަވަރުނުވެ އެވެ. 

އޭގެ ފަހުން ޓްރަމްޕް ވަނީ އޭނާގެ ސަރުކާރުގެ އިސް މަގާމުތަކަށް ހައުސްގެ ބައެއް މެމްބަރުން ނޮމިނޭޓް ކުރައްވައިފަ އެވެ. އޭގެ ތެރޭގައި ނޭޝަނަލް ސެކިއުރިޓީ އެޑްވައިޒަރުގެ މަގާމަށް ކަނޑައެޅުއްވި ފްލޮރިޑާގެ މައިކަލް ވޯލްޓްޒް ވެސް ހިމެނެ އެވެ. އަދި އެމެރިކާއިން އދ.އަށް ކަނޑައަޅުއްވާފައި ހުންނަވާ ސަފީރުގެ މަގާމަށް ނިއުޔޯކްގެ އެލީސް ސްޓެފާނިކް ހިމެނެ އެވެ. އެ ބޭފުޅުން ދަށުގެއިން ވަކިކުރުމުގެ މާނައަކީ އެ ބޭފުޅުންގެ ބަދަލުގައި ހާއްސަ އިންތިހާބެއް ބާއްވަންދެން އެ ބޭފުޅުންގެ ގޮނޑި ހުސްވުމެވެ.

ނަމަވެސް ކޮންގްރެސްގެ ދެ ޗެމްބަރުގެ މެޖޯރިޓީ ލިބުމުގެ މާނައަކީ ޓްރަމްޕަށް ބޮޑު ތާއީދެއް ލިބި، އެޖެންޑާ ތަންފީޒު ކުރުމަށް ފަސޭހަ މަގެއް ތަނަވަސްވުމެވެ.

އިންތިހާބީ ރައީސްގެ ވެރިކަމުގެ ފުރަތަމަ 100 ދުވަހުގެ ތެރޭގައި ބޮޑެތި ބަދަލުތަކެއް ގެނައުމަށް ވަނީ ވައުދުތަކެއްވެފަ އެވެ. އޭގެ ތެރޭގައި އެމެރިކާގައި ގަވައިދާ ހިލާފަށް އުޅޭ ބިދޭސީން ގިނަ އަދަދަކަށް ޑީޕޯޓް ކުރަން ފެށުމާއި 6 ޖެނުއަރީ 2021ގައި ރައްޔިތުންގެ މަޖިލީހަށް ވަތް ބައެއް މީހުންނަށް މައާފު ދިނުމާއި ބައިޑަން-ހެރިސްގެ ސަރުކާރުން އެކުލަވާލާފައިވާ ތިމާވެށީގެ ސިޔާސަތުތައް އަނބުރާ ގެނައުން ހިމެނެ އެވެ.

އޭގެ މާނައަކީ ކެބިނެޓަށް ނޮމިނޭޓް ކުރައްވާ ބޭފުޅުންނާއި ފަނޑިޔާރުން ހިމެނޭ ގޮތަށް މަގާމުތަކަށް އައްޔަން ކުރައްވާނެކަން އަވަހަށް ކަށަވަރުވާނެ އެވެެ. ޓްރަމްޕަށް ތާއީދު ކުރާ ގާނޫނުތަކުގެ ސަބަބުން ގާނޫނު ހަދާ މަރުހަލާ ސާފުކުރުމުގެ ފުރުސަތު ބޮޑެވެ.

އޭޭގެ ދެ އަހަރު ފަހުން، 2026 ވަނަ އަހަރުގެ މިޑްޓާމް އިންތިހާބަށް ތައްޔާރުވަމުން އަންނަ އިރު، ޓްރަމްޕަށް މަދުވެގެން ދެ އަހަރު ދުވަހު ބޭނުންފުޅު ގޮތަކަށް ކޮންގްރެސްގެ ބާރު ލިބިވަޑައިގަންނަވާނެ އެވެ.