އިންތިގާލީ މަރުޙަލާ އޮމާންކަމާއެކު ކުރިޔަށް ގެންދިޔުމަށް ޓްރަމްޕާއި ބައިޑެން އެއްބަސްވެވަޑައިގެންފި

އެމެރިކާގެ އަލަށް އިންތިޚާބުވެވަޑައިގެންނެވި ރައީސް ޑޮނަލްޑް ޓްރަމްޕް އަދި ރައީސް ޖޯ ބައިޑެން ބުދަ ދުވަހު އޯވަލް އޮފީހުގައި ބައްދަލުކުރައްވައި، އިންތިގާލީ މަރުހަލާ "އޮމާންކަމާއެކު" ކުރިޔަށް ގެންދިޔުމަށް އެއްބަސްވެވަޑައިގެންފި އެވެ.

ވެރިކަން އޮމާންކަމާއެކު ބަދަލުކުރުމުގެ އާންމު އުސޫލެއްގެ ގޮތުން ކުރެވޭ މި ބައްދަލުވުމުގައި، ބައިޑެން ވަނީ ޓްރަމްޕަށް ވައިޓް ހައުސްގައި މަރުހަބާ ދަންނަވައިފަ އެވެ. ނަމަވެސް މީގެ ހަތަރު އަހަރު ކުރިން ޓްރަމްޕް މި އުސޫލަށް އަމަލުކުރައްވައިފައެއް ނުވެއެވެ.

ރައީސްކަމަށް އިންތިޚާބުވި ޓްރަމްޕް ބުދަ ދުވަހު ވޮޝިންގްޓަންއަށް ޒިޔާރަތްކުރެއްވީ، ބިލިއަނަރު އީލޮން މަސްކްއާ އެކުގައެވެ. އޭނާ ވަނީ ރިޕަބްލިކަން މެންބަރުންނާ ބައްދަލުކުރެއްވުމަށްފަހު،  ރައީސް ޖޯ ބައިޑެންއާ އޯވަލް އޮފީހުގައި ބައްދަލުކުރައްވާފަ އެވެ.

އިންތިޚާބުގައި ކާމިޔާބު ހޯއްދެވުމަށްފަހު ފުރަތަމަ ފަހަރަށް ވޮޝިންގްޓަންއަށް ޒިޔާރަތްކުރެއްވި ޓްރަމްޕް، ރިޕަބްލިކަން މެންބަރުންނާ މުޚާތަބުކުރައްވަމުން ވިދާޅުވީ "މޮޅުވުމަކީ ރީތިކަމެއް" ކަމަށެވެ.

2021 ވަނަ އަހަރުގެ ޖަނަވަރީ 6 ގައި ކެޕިޓަލްއަށް ހިލްއަށް އެއްވި ޓްރަމްޕަށް ތާއީދުކުރާ މީހުން ކެޕިޓަލްއަށް ހިލްއަށް ހަމަލާދިނުމަށްފަހު، ސިޔާސީގོޮތުން ބަލިވެ، ނުފޫޒު ގެއްލިފައިވާ ލީޑަރެއްގެ ގޮތުގައި ވޮޝިންގްޓަން ދޫކުރެއްވުމަށްފަހު ކުރީގެ ރައީސް، މިހާރު ދަނީ އަލުން ވެރިކަމާ ހަވާލުވެވަޑައިގަތުމަށް ތައްޔާރުވަމުންނެވެ.

ރައީސަކާއި އަލަށް އިންތިޚާބުވާ ރައީސަކު ވައިޓް ހައުސްގައި ބައްދަލުކުރުމަކީ އާންމު އުސޫލެކެވެ. ނަމަވެސް ހަތަރު އަހަރު ކުރިން ޓްރަމްޕް މި އުސޫލަށް ތަބާވެވަޑައިނުގަންނަވަ އެވެ.

ޓްރަމްޕް ވަނީ 2020 ގެ އިންތިޚާބުގައި ބައިޑެންއާ ވާދަކޮށް ބަލިވުމުން ދެބަސްވެ، ވޯޓު އޮޅުވާލުމުގެ ތުހުމަތުތައް ކުރައްވާފައެވެ. އޭރު އޭނާ ބައިޑެން ވައިޓް ހައުސްއަށް ނުގެންނެވި އެވެ. އަދި ބައިޑެންގެ ހުވާކުރުމުގެ ރަސްމިއްޔާތަށްވެސް ވަޑައެއްނުގަންނަވަ އެވެ. މިފަދަ ކަމެއް މީގެ ކުރިން ހިނގާފައިވަނީ 155 އަހަރު ކުރިން، އެންޑްރޫ ޖޮންސަން، ޔުލިސެސް އެސް. ގްރާންޓްގެ ހުވާކުރެއްވުމުގެ ރަސްމިއްޔާތަށް ހާޒިރުނުވި ފަހަރު އެވެ.

އިންތިޚާބީ ކެމްޕޭންގައި ޓްރަމްޕަކީ ޑިމޮކްރަސީއަށާއި ގައުމުގެ އަސާސީ އަގުތަކަށް ނުރައްކަލެއްކަމަށް ވިދާޅުވި ނަމަވެސް، ބައިޑެން މިހާރު ވިދާޅުވަނީ  އިންތިގާލީ މަރުހަލާ އޮމާންކަމާއެކު ކުރިޔަށް ގެންދިޔުމަށް އެހީތެރިވެދެއްވާނެ ކަމަށެވެ.

އިންތިޚާބަށްފަހު، ރައީސް ބައިޑެން ވަނީ ޓްރަމްޕާ ދެކޮޅަށް ދެއްވި ނުރައްކާތެރި އިންޒާރުތައް ހުއްޓާލައްވާފަ އެވެ. ފާއިތުވި ހަފްތާގައި ދެއްވި ޚިތާބެއްގައި ވިދާޅުވީ "އެމެރިކާގެ ތަޖުރިބާ ދެމިއޮންނާނެ. އަޅުގަނޑުމެން ރަނގަޅުވާނެ" ކަމަށެވެ.

ވައިޓް ހައުސްގެ ޕްރެސް ސެކްރެޓަރީ ކެރީން ޖީން-ޕިއޭ ވިދާޅުވީ، ބައިޑެން "މި އިންތިގާލީ މަރުހަލާ ހަރުދަނާކަމާއި ކާމިޔާބުކަމާއެކު ކުރިޔަށް ގެންދިޔުމަށް" ތައްޔާރުވެ ވަޑައިގަންނަވާ ކަމަށެވެ. "މިއީ އާންމު އުސޫލަކަށްވާތީ އެކަންޏެއް ނޫން، އެމެރިކާ ރައްޔިތުންނަށްޓަކައި ކުރަންޖެހޭ ރަނގަޅުކަމެއް" ކަމަށްވެސް އޭނާ ވިދާޅުވިއެވެ.

"އަޅުގަނޑުމެން ބޭނުންވަނީ މިކަން ރަނގަޅަށް ކުރިޔަށްދިޔުން،" ޖީން-ޕިއޭ އިތުރަށް ވިދާޅުވިއެވެ. "އަޅުގަނޑުމެން ބޭނުންވަނީ މިއީ މަސައްކަތް ނިންމާލެވޭ ޕްރޮސެސްއަކަށް ވުން."

އާންމު އުސޫލެއްގެ ގޮތުން، ކުރީގެ އަދި އަލަށް އިންތިޚާބުވާ ރައީސުން ވެސްޓް ވިންގްގައި ބައްދަލުކުރާއިރު، ފަސްޓް ލޭޑީ އޭނާއާއެކު އަންނަ ފަރާތާ ރެސިޑެންސްގައި ބައްދަލުކުރައްވަ އެވެ. ނަމަވެސް މެލާނިއާ ޓްރަމްޕްގެ އޮފީހުން ނެރުނު ބަޔާނެއްގައި ބުނެފައިވަނީ އޭނާ ބައްދަލުވުމުގައި ބައިވެރިނުވާނެ ކަމަށެވެ. އަދި "އޭނާގެ ފިރިކަލުން އޯވަލް އޮފީހަށް އެނބުރި ވަޑައިގެން އިންތިގާލީ މަރުހަލާ ފެށްޓެވުމަކީ ހިތްވަރުދޭ ކަމެއް" ކަމަށާއި، "އޭނާއަށް [ޓްރަމްޕަށް] ބޮޑު ކާމިޔާބަކަށް" އެދިވަޑައިގަންނަވާ ކަމަށެވެ.