ބޮޑު އިގްތިސާދީ ބަދަލުތަކެއް ގެންނަން ރައީސް ބޭނުންވާއިރު، ޕާލަމަންޓަރީ އިންތިޚާބުގައި ބޮޑު އަޣުލަބިއްޔަތެއް ހޯދުމަށް މަސައްކަތް ފަށައިފި

ސްރީލަންކާގެ ރައްޔިތުން ބުރާސްފަތި ދުވަހު ވޯޓުލާން ދާއިރު، ރައީސް އަނުރަ ކުމާރަ ޑިސަނާޔަކަގެ އެންމެ ބޮޑު އަމާޒަކަށްވެފައިވަނީ އެމަނިކުފާނުގެ ޕާޓީއަށް ޕާލަމަންޓްގެ އަޣުލަބިއްޔަތު ހޯދުމެވެ. މިއީ އެމަނިކުފާނުގެ އިންތިޚާބީ ވައުދުތައް ފުއްދުމަށާއި، ގައުމުގެ އިގްތިސާދީ ދަތިތައް ހައްލުކޮށް، ހެޔޮވެރިކަމެއް ގާއިމްކުރުމަށް ކޮންމެހެން ބޭނުންވާ ކަމެއް ކަމުގައި އެމަނިކުފާނު ވިދާޅުވެ އެވެ.

މާކްސިސްޓް ވިސްނުމުގެ ސިޔާސީ ލީޑަރެއް ކަމަށްވާ ޑިސަނާޔަކަ ރިޔާސީ އިންތިޚާބު ކާމިޔާބުކުރެއްވީ މިދިޔަ ސެޕްޓެމްބަރު 21 ގައެވެ. މިއީ 1948 ގައި އިނގިރޭސި އިސްތިއުމާރީ ވެރިކަމުން މިނިވަންވި ފަހުން ގައުމު ވެރިކަން ކުރަމުން އައި އާދައިގެ ސިޔާސީ ޕާޓީތަކަށް ރައްޔިތުން ނޫނެކޭ ބުނި އިންތިޚާބެކެވެ.

ނަމަވެސް ރިޔާސީ އިންތިޚާބުގައި ޑިސަނާޔަކައަށް %50 އަށްވުރެ ގިނަ ވޯޓު ނުލިބުމާ ގުޅިގެން، ޕާލަމަންޓް އިންތިޚާބުގައި އެމަނިކުފާނުގެ ޕާޓީގެ ނަތީޖާއާމެދު ކަންބޮޑުވުންތަކެއް އުފެދިފައިވެ އެވެ. ދުއިސައްތަ ފަންސަވީސް މެންބަރުންގެ ޕާލިމަންޓްގައި އަޣުލަބިއްޔަތު ހޯދުމަށް 113 ގޮނޑި ބޭނުންވާއިރު، ރިޔާސީ އިންތިޚާބުގައި ލިބުނު 42 އިންސައްތައިން މާ ގިނަ ވޯޓު ނޭޝަނަލް ޕީޕަލްސް ޕަވަރ ޕާޓީން ހޯދަން ޖެހެއެވެ.

ޕާޓީގެ ކެންޑިޑޭޓުންނަށް ވޯޓު ހޯދުމަށް ކެމްޕޭންކުރައްވަމުން، ޑިސަނާޔަކަ ވަނީ ވައުދުވެވަޑައިގެންފައިވާ އިސްލާހުތައް ގެނައުމަށް އެހެން ޕާޓީތަކުގެ އެހީ ހޯދަން ނުޖެހޭ ގޮތަށް ޕާލަމަންޓްގައި ގޮނޑި ހޯދައިދިނުމަށް ރައްޔިތުންނަށް ގޮވާލައްވާފަ އެވެ.

"ގައުމު އަލުން ބިނާކުރުމަށް ވަރުގަދަ ސަރުކާރެއް އުފައްދަން ޖެހޭ. ޕާލަމަންޓްގައި ހެލިނުލެވޭ ސަރުކާރެއް އޮންނަން ޖެހޭ. އެކަން ކުރެވޭނީ އަހަރެމެންގެ ޕާޓީގެ މެންބަރުން ޕާލަމަންޓަށް ހޮވިގެން،" ހޯމަ ދުވަހު ކެމްޕޭންގެ އެންމެ ފަހު ދުވަހު ބޭއްވި ރެލީއެއްގައި ޑިސަނާޔަކަ ވިދާޅުވި އެވެ.

މި އިންތިޚާބު ބޭއްވެނީ ސްރީލަންކާގެ ތާރީޚުގެ އެންމެ ނާޒުކު ދަނޑިވަޅުގައެވެ. 2022 ގައި ބޭރުގެ ދަރަނި ދެއްކުން ހުއްޓާލައި، ބަނގުރޫޓުވިކަން އިއުލާނުކުރި ފަހުން، ގައުމު މިހާރު ދަނީ އެންމެ ގޯސް އިގްތިސާދީ ހީނަރުކަމުގެ ތެރެއަށެވެ.

މިވަގުތު ސްރީ ލަންކާ ދަނީ އައިއެމްއެފްގެ ބެއިލްއައުޓް ޕްރޮގްރާމެއްގައި ބައިވެރިވެގެންނެވެ. އަދި ބައިނަލްއަގްވާމީ ދަރަނިވެރިންނާއެކު ދަރަނި އަލުން ރޭވުމުގެ މަސައްކަތްވެސް ވަނީ ގާތްގަނޑަކަށް ނިމުމަކާ ހަމައަށް އައިސްފައެވެ.

ރިޔާސީ ކެމްޕޭންގައި ޑިސަނާޔަކަ ވިދާޅުވެފައިވަނީ އޭރުގެ ރައީސް ރަނިލް ވިކްރަމަސިން ސޮއިކުރެއްވި އައިއެމްއެފް އެއްބަސްވުމުގައި ކަނޑައަޅާފައިވާ ލަނޑުދަނޑިތަކަށް މުހިންމު ބަދަލުތަކެއް ގެންނަވާނެ ކަމަށެވެ. މި އެއްބަސްވުމުގެ ސަބަބުން ރައްޔިތުންނަށް އެކަށީގެންވާ ވަރަށްވުރެ ބޮޑު ބުރައެއް އުފުލަން ޖެހޭ ކަމަށް އޭނާ ވިދާޅުވި އެވެ. ނަމަވެސް އެމަނިކުފާނުގެ ވިސްނުން މިހާރު ވަނީ ބަދަލުވެފަ އެވެ. އަދި އެއްބަސްވުމަށް އެއްވެސް ބަދަލެއް ނުގެންނަވާނެ ކަމަށް ވިދާޅުވެފައިވެ އެވެ.

ހޯމަ ދުވަހު ތާއީދުކުރާ ފަރާތްތަކާ މުޚާތަބުކުރައްވަމުން، ޑިސަނާޔަކަ ވިދާޅުވީ އިންތިޚާބަށްފަހު ދެ ދުވަހުގެ ތެރޭގައި އައިއެމްއެފްގެ ޓީމެއް ސްރީލަންކާއަށް އަންނާނެ ކަމަށާއި، އެއްބަސްވުމުގެ ތިންވަނަ މުރާޖައާ ފުރިހަމަކުރާނެ ކަމަށެވެ.

"ޖެނުއަރީ މަހުގެ ފަހުކޮޅު ނުވަތަ ފެބްރުއަރީ މަހުގެ ކުރީކޮޅު މި މަސައްކަތް ނިމޭނެ. އޭރުން އަހަރެމެންނަށް އިގްތިސާދަށް ރަނގަޅު ހަމަޖެހުމެއް ގެނެވޭނެ،" ޑިސަނާޔަކަ ވިދާޅުވި އެވެ.

ސަރުކާރުން އެންމެ ފުރަތަމަ ބަޖެޓް ހުށަހަޅާނީ އަންނަ އަހަރުގެ ފެބްރުއަރީ މަހުގައި ކަމަށް އެމަނިކުފާނު ވިދާޅުވި އެވެ. މި ބަޖެޓްގައި ޓެކްސް ކުޑަ ކުރުމާއި، ސަރުކާރު މުވައްޒަފުންގެ މުސާރަ އިތުރުކުރުމުގެ ހުށަހެޅުންތައް ހިމެނޭނެ ކަމަށް ސަރުކާރުން އުންމީދުކުރެ އެވެ.

ސިޔާސީ އެނަލިސްޓެއް ކަމަށްވާ ޖެހާން ޕެރޭރާ ވިދާޅުވީ، ކުރީގެ ސަރުކާރުން އެކުލަވާލި ގިނަ ސިޔާސަތުތަކާއެކު ކުރިއަށްދިއުމަށް ޑިސަނާޔަކަ ނިންމެވި ނިންމެވުމަކީ "ވިސްނުންތެރި އަދި ރައްކާތެރި" ގޮތެއް ކަމަށެވެ. އައިއެމްއެފް އެއްބަސްވުމަށް ބަދަލެއް ގެނައުމުން އިގްތިސާދު އިތުރަށް ދަށަށް ދާނެކަމާމެދު ވިޔަފާރިވެރިންގެ ކަންބޮޑުވުންތަކަށް އެމަނިކުފާނު ރިއާޔަތްކުރައްވާފައިވާ ކަމަށް ޕެރޭރާ ފާހަގަކުރެއްވި އެވެ.

ސްރީލަންކާގެ މި ބޮޑު އިގްތިސާދީ ހީނަރުކަން ކުރިމަތިވީ އިގްތިސާދީ ސިޔާސަތުތައް ރަނގަޅަށް ނުހިންގުމާއި، ކޮވިޑް-19 ގެ ބަލިމަޑުކަމާއި، 2019 ވަނަ އަހަރުގެ ޓެރަރިޒަމްގެ ހަމަލާތަކުން ފަތުރުވެރިކަމަށް ކުރި ނޭދެވޭ އަސަރާ ގުޅިގެންނެވެ. މީގެ އިތުރުން، ކޮރޯނާ ބަލިމަޑުކަމުގެ ސަބަބުން ބޭރުގައި މަސައްކަތްކުރާ ސްރީލަންކާ ރައްޔިތުން ފޮނުވާ ފައިސާގެ މިންވަރުވެސް ވަނީ ދަށްވެފަ އެވެ.

މާދަމާގެ އިންތިޚާބުގައި 17 މިލިއަން ރައްޔިތުން ވޯޓުލާނީ، ގައުމުގެ އެކި ކަންކޮޅުތަކުގައި ބަހައްޓާ 13،400 ވޯޓުފޮށްޓަށެވެ. އިންތިޚާބުގައި 225 ޕާލިމަންޓް މެންބަރުން ހޮވުމަށް 8،800 ކެންޑިޑޭޓުން ވާދަކުރެ އެވެ. އަމާން އަދި ރައްކާތެރި ވޯޓުލުމެއް ކަށަވަރުކުރުމަށް ކަމާބެހޭ ފަރާތްތަކުން ވަނީ 90،000 ފުލުހުން އެކި ސަރަހައްދުތަކަށް ފޮނުވާފަ އެވެ.

މަޝްހޫރު ކެންޑިޑޭޓުންގެ ތެރޭގައި ޕްރައިމް މިނިސްޓަރ ހަރިނި އަމަރަސޫރިޔާ، އިދިކޮޅު އެސްޖޭބީގެ ލީޑަރު ސަޖިތް ޕްރެމަދާސަ އަދި ކުރީގެ ބޮޑުވަޒީރު ދިނޭޝް ގުނަވަރުދަނަ ހިމެނެއެވެ.