ގައްޒާގައި އިސްރާއީލުން ހިންގަމުން ދަނީ އިންސާނިއްޔަތާ ދެކޮޅު ޖަރީމާތަކެއް ކަމަށް އދ. ގެ އިންސާނީ އެހީގެ އިސްވެރިޔާ ސަލާމަތީ މަޖިލީހުގައި ވިދާޅުވެއްޖެ

 ގާޒާގައި އިސްރާއީލް ސިފައިން ހިންގަމުންދާ ހަނގުރާމައާއި ހިސާރު ކުރުމަކީ "އެންމެ ނުރައްކާތެރި ބައިނަލްއަގްވާމީ ޖަރީމާތަކާ އެއްފަދަ" އަމަލުތަކެއް ކަމަށް އދ. ގެ އިންސާނީ އެހީގެ ވަގުތީ އިސްވެރިޔާ ޖޯއިސް މްސުޔާ ވިދާޅުވެއްޖެ އެވެ.

އަންގާރަ ދުވަހު އދ. ގެ ސަލާމަތީ މަޖިލީހުގައި ވާހަކަފުޅު ދައްކަވަމުން، މްސުޔާ ވިދާޅުވީ އުތުރު ގާޒާގައި އިސްރާއީލް ސިފައިން ކުރިއަށްގެންދާ އެއްމަސްދުވަހުގެ އެއްގަމު ހަމަލާތަކާއި ހިސާރުކުރުމަކީ "މިދިޔަ އަހަރު ފެނުނު ބިރުވެރިކަން އިތުރަށް ގޯސްވެ، ހަރުކަށިވެފައިވާ" ސިފައެއް ކަމަށެވެ.

"އަހަރެމެންނަށް ފެންނަމުންދަނީ އާއިލާގެ މެންބަރުން މަރުވެ، އަނދައި، އަދި ދިރިހުއްޓާ ވަޅުލެވިގެންދާ މަންޒަރު ބަލަން މަޖުބޫރުކުރެވިފައިވާ" ފަލަސްތީނު ރައްޔިތުން ކަމަށް މްސުޔާ ވިދާޅުވި އެވެ. އަދި ގާޒާއަކީ މިހާރު

"ގާޒާގައި ކޮންމެ ދުވަހަކު ފެންނަމުންދާ އަނިޔާވެރިކަމަކީ ހައްދެއްނެތް" ކަމެއް ކަމަށް އޭނާ ވިދާޅުވިއެވެ. އަދި އުތުރު ގާޒާއަށް އެހީ ވަނުން ހުއްޓުވާފައިވާ ކަމުގެ ޒިންމާ އިސްރާއީލާ މެދު އުފުލާފައިވެ އެވެ.

"މިވަގުތު އިސްރާއީލުން ވަނީ އުތުރު ގާޒާއަށް އިންސާނީ އެހީ ވަނުން ހުއްޓުވާފައި. އެތަނުގައި ހަނގުރާމަ ކުރިއަށްދާއިރު، 75،000 އެއްހާ މީހުން ތިބީ ކާނާއާއި ފެން ވަރަށް މަދުން ލިބޭ ހާލުގައި" ކަމަށް އޭނާ ވިދާޅުވިއެވެ.

އެއް އަހަރަށްވުރެ ގިނަ ދުވަހުގެ ހަމަލާތަކުގައި ގާޒާގެ ސިވިލް ތަންތަން ހަލާކުކޮށްލާފައިވާ މިންވަރާމެދުވެސް މްސުޔާ ސުވާލު އުފެއްދެވި އެވެ.

އާންމުންގެ ގެތަކުގެ %70 އަށްވުރެ ގިނަ ތަންތަން ހަލާކުވެ ނުވަތަ ވީރާނާވެފައިވާ ކަމަށް އޭނާ ވިދާޅުވި އެވެ.

ސަލާމަތީ މަޖިލީހުގެ މި ބައްދަލުވުން ބޭއްވުނީ ގުޔާނާ، ސްވިޒަލޭންޑް، އަލްޖީރިއާ އަދި ސްލޮވީނިއާގެ އެދުމުގެ މަތިންނެވެ. މިއީ ބައިނަލްއަގްވާމީ ކާބޯތަކެތީގެ ރައްކާތެރިކަމުގެ ތަޖުރިބާކާރުން ހުކުރު ދުވަހު ނެރުނު ރިޕޯޓެއްގައި ގާޒާގެ އިންސާނީ ހާލަތު "ނުހަނު ގޯސްވެ އަވަހަށް ދަށަށްދަމުންދާ" ކަމަށާއި، އުތުރު ސަރަހައްދުތަކުގައި ބަނޑުހައިހޫނުކަން ކުރިމަތިވެދާނެ ކަމަށް އިންޒާރު ދިނުމާ ގުޅިގެންނެވެ.

އަންގާރަ ދުވަހުގެ ކުރިން، އދ. ގެ ތަރުޖަމާނަކު ވިދާޅުވީ، މިއަހަރު ގާޒާއަށް އެންމެ މަދުން އިންސާނީ އެހީ ލިބުނީ އޮކްޓޯބަރު މަހު ކަމަށާއި، ދެ މިލިއަނަށްވުރެ ގިނަ މީހުންނަށް ބޭނުންވާ އެހީ ލިބެމުންދަނީ "ވަރަށް މަދުން" ކަމަށެވެ.

ހޯމަ ދުވަހު، ބައިތް ހަނޫން އަދި ޖަބާލިޔާ ރެފިއުޖީ ކޭމްޕްގެ އިންޑޮނީޝިއާ ހޮސްޕިޓަލުގައި ތިބި މީހުންނަށް އިންސާނީ އެހީ ފޯރުކޮށްދިނުމަށް 14 ޓްރަކުގެ ގާފިލާއެއް ރޭވި އެވެ. ނަމަވެސް ތައްޔާރީ ކާނާ އާއި، ފުށް އަދި ފެން ހިމެނޭ ދެ ޓްރަކަށް އެކަނި ވަނީ ދެ ޝެލްޓަރަކަށް އެއްޗެހި ފޯރުކޮށްދީފަ އެވެ.

އެހެން ޓްރަކުތަކަށް އިސްރާއީލުން ހުއްދަ ދިނުން ލަސްވުމާއި، ގާފިލާ ދަތުރުކުރާ މަގުމަތީގައި ބަނޑުހައިވެފައިވާ މީހުންގެ މަޑުކޮށްގެން ތިބުމުގެ ސަބަބުން، އެހީ ފޯރުކޮށްނުދެވުނު ކަމަށް ތަރުޖަމާނު ވިދާޅުވި އެވެ.