މެލޭޝިއާގެ ކުރީގެ ފިނޭންސް މިނިސްޓަރު އަވަހާރަވެއްޖެ

މި އަހަރުގެ ކުރީކޮޅު މުދާ ހާމަނުކުރި ކަމުގެ ދައުވާއަށް އިއުތިރާފުވި، މެލޭޝިއާގެ ކުރީގެ ފިނޭންސް މިނިސްޓަރު ދައިމް ޒައިނުއްދީން ރޭ ފަތިހު އަވަހާރަވެފައިވާ ކަމަށް އޭނާގެ ވަކީލު ވިދާޅުވެއްޖެ އެވެ.

އުމުރުން 86 އަހަރުގެ ދާއިމް ވަނީ ކުރީގެ ބޮޑުވަޒީރު މަހާތީރު މުހައްމަދުގެ ވެރިކަމުގައި 1984 އިން 1991އަށް އަދި 1999 އިން 2001އަށް ފިނޭންސް މިނިސްޓަރުކަން ކުރައްވައިފަ އެވެ.

އޭނާގެ ގާނޫނީ ވަކީލު ގުރުދިއާލް ސިންގް ނިޖާރު ވަނީ ދައިމް އަވަހާރަވިކަން ރޮއިޓާސްއަށް ކަށަވަރު ކޮށްދެއްވައިފަ އެވެ. އޭނާ ވިދާޅުވީ ދައިމްގެ ޖަނާޒާ މިއަދު ބާއްވާނެ ކަމަށެވެ.

"ސްޓްރޯކެއް ޖެހިގެން ވޭތުވެ ދިޔަ ހަފުތާތަކުގައި އޭނާ އޮންނެވީ އައިސީޔޫގައި [އިންޓެންސިވްކެއާ ޔުނިޓް]ގައި،"ގުރުދިއާލް ސިންގް ވިދާޅުވި އެވެ.

ކުރީގެ ބޮޑުވަޒީރު މަހާތީރުގެ ވަރަށް އަރިސް، ދާއިމްގެ މައްޗަށް މި އަހަރުގެ ކުރީކޮޅު ވަނީ އަމިއްލަ މިލްކިޔާތު ހާމަ ނުކުރުމުގެ ދައުވާކޮށްފަ އެވެ. ދާއިމު ވަނީ ކުށެއް ނުކުރައްވާ ކަމަށް ވިދާޅުވެފަ އެވެ.