މިސްރަށް ކުރައްވާ ހަތަރު ދުވަހުގެ ރަސްމީ ދަތުރުފުޅުގައި، އަލް-އިއްތިހާދިއްޔާ ގަނޑުވަރުގައި ބޭއްވި ނޫސްވެރިންގެ ބައްދަލުވުމުގައި މެލޭޝިއާގެ ބޮޑުވަޒީރު އަންވަރު އިބްރާހިމް (ވ) އަދި މިސްރުގެ ރައީސް އަބްދުލް ފައްތާހު އައް-ސީސީ ނޫސްވެރިންނާ ވާހަކަދައްކަވަނީ.
އިންސާނީ އެހީ ގާޒާއަށް ނުވައްދައި އަދި އިންސާނިއްޔަތާ ޚިލާފު އަމަލުތައް ހިންގަމުންދާތީ އިޒްރޭލް އދ. އިން ވަކިކުރަން މެލޭޝިއާގެ ބޮޑުވަޒީރު ގޮވާލައްވަ
ގާޒާގައި އިންސާނީ ހައްގުތަކާ ޚިލާފު އަމަލުތައް ހިންގާ އަދި އިންސާނީ އެހީ ގާޒާ އަށވެއްދުމަށް ހުރަސްއަޅަމުންދާތީ އިޒްރޭލް އދ. ން ވަކިކުރަންޖެހޭ ކަމަށް މެލޭޝިއާގެ ބޮޑުވަޒީރު އަންވަރު އިބްރާހިމް ވިދާޅުވެއްޖެ އެވެ.
މިސްރުގެ ރައީސް އަބްދުލް ފައްތާހު އައް-ސީސީއާ އެކު ގާހިރާގައި ބޭއްވި ބައްދަލުވުމަކަށްފަހު، ދެ ލީޑަރުން ބޭއްވި ނޫސްވެރިންގެ ބައްދަލުވުމުގައި މެލޭޝިއާގެ ބޮޑުވަޒީރު ވިދާޅުވީ އދ. އާއި ސެކިއުރިޓީ ކައުންސިލުގެ ގަރާރުތަކަށް ތަބާނުވާ ގައުމެއް މި ބައިނަލްއަގްވާމީ ޖަމިއްޔާއިން ވަކިކުރުން ނޫން އެހެން ގޮތެއް ނެތް ކަމަށެވެ.
އަންވަރު އިބްރާހިމް އިތުރަށް ވިދާޅުވީ، މި ސަރަހައްދުގެ ހާލަތުގެ ނާޒުކުކަމާ މެދު ފުރިހަމަ އަށް ވިސްނިވަޑައިގަންނަވާ ކަމަށާއި، ހަނގުރާމަ ހުއްޓާލައި އަމާންކަން ގާއިމްކުރުމަށް އިސްކަންދޭންޖެހޭކަމުގެ ޔަގީންކަން އޮތް ކަމަށެވެ.
މިސްރުގެ ރައީސް އައް-ސީސީ ވިދާޅުވީ މެދުއިރުމަތީގެ ހަމަނުޖެހުންތަކަށް ހައްލެއް ލިބޭނީ ފަލަސްތީނަށް ވަކި ދައުލަތެއް ގާއިމްކޮށްގެން ކަމަށެވެ.
މިސްރުގެ ރައީސް މީގެ އިތުރުން ވިދާޅުވީ، މެލޭޝިއާގެ ބޮޑުވަޒީރާ އެކު ބޭއްވި މަޝްވަރާތަކުގައި ގާޒާގައި ހަނގުރާމަ ހުއްޓުވައި އެހީ ވައްދަން މަސައްކަތްކުރުމުގެ މުހިންމުކަމާއި، ސޫދާން، ލީބިއާ، ސީރިއާ އަދި ލުބުނާނުގައި ހިނގަމުންދާ ހަނގުރާމަތަކަށް ހައްލު ހޯދުމަށް ދެ ގައުމުން އެކުގައި މަސައްކަތްކުރާނެ ގޮތްތަކާ މެދު މަޝްވަރާކުރެއްވި ކަމަށެވެ.
މެލޭޝިއާގެ ބޮޑުވަޒީރުގެ މި ދަތުރުފުޅަކީ ދެ ގައުމުގެ ދެމެދުގައި ޑިޕްލޮމެޓިކް ގުޅުން ގާއިމްކުރިތާ 65 އަހަރު ފުރުމާ ގުޅިގެން އިސް ވަފުދަކާ އެކު ކުރައްވާ ރަސްމީ ދަތުރުފުޅެކެވެ.
ކޮމެންޓް