ހިޒްބުﷲން އިސްރާއީލުގެ އަސްކަރީ މަރުކަޒަށް ޑްރޯން ހަމަލާއެއް ދިނުމާ ގުޅިގެން ބެއިރޫތުގެ ދެކުނަށް އިސްރާއީލުން ވައިގެ ހަމަލާއެއް ދީފި

ލުބުނާނުގެ ހަތިޔާރުއެޅި ޖަމާއަތް ހިޒްބުﷲއިން ބުނާގޮތުގައި، އެ ޖަމާއަތުން "ފުރަތަމަ ފަހަރަށް" ޓެލް އަވީވްގެ ދެކުނުގައި ހުނަނަ އިސްރާއީލުގެ އަސްކަރީ މަރުކަޒެއް ކަމަށްވާ ބިލޫ މަރުކަޒަށް ޑްރޯން ސްކޮޑްރަނެއް ވަނީ ފޮނުވާލައިފަ އެވެ. މި ހަމަލާ ދީފައިވަނީ ބުދަ ދުވަހުގެ ރޭގެ ފަހުގެ ވަގުތެއްގަ އެވެ.

އިސްރާއީލުގެ އިދާރާތަކުން މިހާތަނަށް އެއްވެސް މީހަކު މަރުވި ނުވަތަ ތަނަށް ގެއްލުން ލިބުނު ކަމުގެ ރިޕޯޓެއް ނުދެއެވެ.

މީގެ ކުރިން، ހިޒްބުﷲއިން ބުނެފައިވަނީ އިސްރާއީލުގެ ހައިފާ ޕޯޓް ސިޓީ ކައިރީގައި ހުރި ކަނޑުގެ އަސްކަރީ މަރުކަޒެއް ގަޔާއި، ޓެލް އަވީވް ކައިރީގައި ހުންނަ އިސްރާއީލުގެ މައި އިންޓަނޭޝަނަލް އެއާޕޯޓް ކައިރީގައި ހުރި އެހެން މަރުކަޒަކަށް ހަމަލާ ދީފައިވާ ކަމަށެވެ. އިސްރާއީލު އެއަރޕޯޓްސް އޮތޯރިޓީން ބުނީ މި ހަމަލާގެ ސަބަބުން އެއާޕޯޓުގެ މަސައްކަތްތަކަށް އެއްވެސް އަސަރެއް ކޮށްފައި ނުވާ ކަމަށެވެ.

ހިޒްބުﷲގެ ހަމަލާތަކަށް ފަހު، ބުރާސްފަތި ދުވަހުގެ ފަތިހު އިސްރާއީލުގެ ހަނގުރާމަމަތީ މަތިންދާބޯޓުތަކުން ބެއިރޫތުގެ ދެކުނު ސަރަހައްދުތަކަށް ހަމަލާ ދީފައިވެއެވެ.

މި ހަމަލާތަކުގެ ފޮޓޯތަކުގައި ދެކުނު ބެއިރޫތުގެ މައްޗަށް އަރަމުންދިޔަ ދުންގަނޑު ފެނެ އެވެ. އަދި ލުބުނާނުގެ ވެރިރަށުގައި ތިބި ނޫސްވެރިން ބުނި ގޮތުގައި ވަރަށް ބޮޑެތި ގޮވުމުގެ އަޑުތައް އިވުނެވެ. ލުބުނާނުގެ އަލް ޖަދީދު ޓެލެވިޒަނުން ރިޕޯޓުކުރި ގޮތުގައި ވެރިރަށުގެ ދެކުނު ސަރަހައްދުތަކަށް މަދުވެގެން ހަތަރު ހަމަލާ ދީފައިވެ އެވެ.

ބުދަ ދުވަހު، ލުބުނާނުގެ އިރުމަތީ ބެކާ ވެލީއާއި ބައަލްބެކް ސިޓީއަށް އިސްރާއީލުން ދިން ހަމަލާތަކުގައި މަދުވެގެން 40 މީހުން މަރުވެފައިވާ ކަމަށް އެ ގައުމުގެ މިނިސްޓްރީ އޮފް ހެލްތުގެ އެންމެ ފަހުގެ އަޕްޑޭޓްތަކުން ދައްކައެވެ. އަދި މަދުވެގެން 53 މީހުންނަށް މި ހަމަލާގައި އަނިޔާވެފައިވާ ކަމަށް މިނިސްޓްރީން ބުނެފައިވެއެވެ.

މި ހަމަލާތައް ދިނީ ހިޒްބުﷲގެ އާ ސެކްރެޓަރީ ޖެނެރަލް، ނައިމް ގާސިމް، އިސްރާއީލުގެ ހަމަލާތައް ހުއްޓުވުމަށް ސިޔާސީ މަސައްކަތުން ނަތީޖާއެއް ނުނިކުންނާނެ ކަމަށް ބުނެފައި ވަނިކޮށެވެ. ނަމަވެސް އޭނާ ބުނި ގޮތުގައި އިސްރާއީލުން ލުބުނާނަށް ދޭ ހަމަލާތައް ހުއްޓާލައިފިނަމަ، ނުސީދާކޮށް ވާހަކަ ދެއްކުމުގެ މަގު އޮވެދާނެ އެވެ.

"ދުޝްމަނުން ހަމަލާތައް ހުއްޓާލަން ނިންމައިފިނަމަ، އަޅުގަނޑުމެން ސާފުކޮށް ކަނޑައަޅާފައިވާ މަގެއް އެބައޮތް - އެއީ ލުބުނާނު ދައުލަތާއި [ޕާލިމަންޓުގެ] ސްޕީކަރު [ނަބީހް] ބެރީ މެދުވެރިކޮށް ނުސީދާކޮށް ވާހަކަ ދެއްކުން،" ގާސިމް ވިދާޅުވި އެވެ.

ނޫސް ރިޕޯޓްތައް ބުނާގޮތުގައި ހަނގުރާމަ ހުއްޓުވުމަށް ލުބުނާނު ސަރުކާރުން އިތުރަށް ހުށަހަޅާފައިވާ ހުށަހެޅުން އަދި އދ. ގެ ގަރާރު 1701 ތަންފީޒުކުރުމުގެ ގޮވާލުމަށް ބަލާއިރު، އިސްރާއީލާއެކު ހަނގުރާމަ ހުއްޓުމުގެ އެއްބަސްވުމަކަށް އަވަހަށް ވާސިލުވުމުގެ ފުރުސަތު ކުޑައެވެ.

ފާއިތުވި އަހަރު ތެރޭގައި، އިސްރާއީލުން ލުބުނާނަށް ދިން ހަމަލާތަކުގައި 3,000 އަށްވުރެ ގިނަ މީހުން މަރުވެފައިވެއެވެ. މީގެ ތެރެއިން ގިނަ އަދަދެއްގެ މީހުން މަރުވެފައިވަނީ ފާއިތުވި ހަ ހަފްތާގެ ތެރޭގައެވެ.