ބޮޓްސްވާނާގެ ވެރިކަން ކުރާ ޕާޓީ 58 އަހަރަށް ފަހު ބޭރުކޮށްލައިފި

ގިނަ ދުވަސްތަކެއް ވަންދެން ބޮޓްސްވާނާގައި ވެރިކަން ކުރަމުން އައި ޕާޓީ ރައްޔިތުންގެ ވޯޓަކުން ބޭރުކޮށްލައިފި އެވެ. މިއީ 58 އަހަރުގެ ތެރޭގައި އެ ޕާޓީ ވެރިކަމުން ބޭލި ފުރަތަމަ ފަހަރެވެ. އެ ނަތީޖާއާ އެކު ހީވީ ބިންހެލުމެއް އައިހެންނެވެ.

ބޮޓްސްވާނާ 1966 ވަނަ އަހަރު މިނިވަން ވީއްސުރެ އެ ގައުމުގައި ވެރިކަން ކުރަމުން އައީ، ބޮޓްސްވާނާ ޑިމޮކްރެޓިކް ޕާޓީ (ބީޑީޕީ) އިންނެވެ. މިދިޔަ ހުކުރު ދުވަހު ނެގި ވޯޓުގައި އެ ޕާޓީއަށް ލިބިފައިވަނީ ރައްޔިތުންގެ މަޖިލީހުގެ އެންމެ ހަތަރު ގޮނޑި އެވެ. އެ ޕާޓީގެ ބަދަލުގައި ދެން ވެރިކަމަށް އަންނާނީ 'އަންބުރެއްލާ ފޯ ޑިމޮކްރެޓިކް ޗޭންޖު' (ޔޫޑީސީ) އެވެ.

ރައީސް މޮކްގްވީޓްސީ މަސީސީ ވަނީ ޔޫޑީސީގެ ލީޑަރު ޑުމާ ބޯކޯއަށް ފޯނުން ގުޅުއްވައި  އޭނާގެ ވާދަވެރިޔާއަށް މަރުހަބާ ވިދާޅުވެފަ އެވެ.

ފަހަކަށް އައިސް އިގްތިސާދީ ކުރިއެރުން ދަށްވެ، ވަޒީފާ ނެތް މީހުންގެ އަދަދު އިތުރުވުމުގެ ސަބަބުން ބީޑީޕީގެ މަގުބޫލުކަން ވަނީ ދަށްވެފަ އެވެ.

ނޫސްވެރިންގެ ބައްދަލުވުމެއްގައި މަސީސީ ވިދާޅުވީ އެ ޕާޓީ ބޮޑުތަނުން ގޯސްވެފައިވާ ކަމަށެވެ. 

"އަޅުގަނޑު އިހުލާސްތެރިކަމާ އެކީގައި އެއްފަރާތްވެ، ހުވާކުރުމުގެ ކަންކަން ފަސޭހަކަމާ އެކު ކުރެވޭނެ ގޮތް އިންތިޒާމުކޮށް ވެރިކަން ބަދަލުކުރުމުގެ މަރުހަލާގައި ބައިވެރިވާނަން. އަޅުގަނޑުމެންގެ ޑިމޮކްރެޓިކް މަރުހަލާތަކާ މެދު ފަހުރުވެރިވެ، ރައްޔިތުންގެ އިހްތިޔާރަށް އިހްތިރާމް ކުރަން،" މަސީސީ ވިދާޅުވި އެވެ.

އަދި ސަޕޯޓަރުން ހިމޭނުން ތިބުމަށާއި އާ ސަރުކާރުގެ ފަހަތުގައި ތިބުމަށް އޭނާ ވަނީ އެދިވަޑައިގެންފަ އެވެ.

ވޯޓުގެ ނަތީޖާއަށް ފަހު މީޑިއާއަށް ދެއްކެވި ވާހަކަތަކުގައި އިންސާނީ ހައްގުތަކާ ބެހޭ ކުރީގެ ގާނޫނީ ވަކީލު ބޯކޯ،54، ވިދާޅުވީ އެ ވޯޓުގެ ސަބަބުން ޑިމޮކްރަސީ އެހެން ހަރުފަތަކަށް ގެންގޮސްދޭ ކަމަށެވެ. އަދި އޭގެ މާނައަކީ ކާމިޔާބު، ސުލްހަވެރި، ތަރުތީބުން ޑިމޮކްރެޓިކް ޓްރާންސިޝަނެއް ފެނުން ކަމަށެވެ.

"ނަމްބަރުތަކަށް ބަލާއިރު އެއީ އަޅުގަނޑުމެންނަށް ލިބުނު ޝޮކެއް. އަޅުގަނޑަށް [ބޮޓްސްވާނާގެ ރައްޔިތުންނަށް] ވައުދުވެވޭނީ އަޅުގަނޑުމެން އެންމެ ރަނގަޅަށް މަސައްކަތް ކުރާނަންކަން،" އޭނާ ވިދާޅުވި އެވެ.

މިއީ ރިޔާސީ ކެންޑިޑޭޓެއްގެ ގޮތުގައި އޭނާ ވާދަކުރެއްވި ތިން ވަނަ ފަހަރެވެ.

އެންމެ ފަހުގެ ތަފާސް ހިސާބުތައް ދައްކާ ގޮތުން ޔޫޑީސީއަށް ވަނީ 35 ގޮނޑި ލިބިފަ އެވެ. މިއީ ސާފު އަގުލަބިއްޔަތެވެ.

ރަނގަޅު މުސާރަލިބޭ ވަޒީފާތައް އުފައްދައި، ހުރިހާ ރައްޔިތުން ބާރުވެރިކޮށްދޭ މުއްސަނދިކަން ހަމަހަމަކޮށް ބެހޭ އިގްތިސާދީ އާ ތަސުއްވަރެއް ގެންގުޅޭނެ ކަމުގެ ވައުދު އެ ޕާޓީން ވަނީ ވެފަ އެވެ.

އެ ޕާޓީން ވަނީ ފަސް އަހަރުގެ ތެރޭގައި 450،000 އާއި 500،000 އާ ދެމެދުގެ އަދަދަކަށް ވަޒީފާ އުފައްދާނެ ކަމަށް ވައުދުވެފަ އެވެ.