ތިން ދުވަހުގެ ބްރިކްސް ސަމިޓްގައި ހަނގުރާމަތައް ހުއްޓާލަން ގޮވާލައިފި

ރަޝިއާގައި އިއްޔެ ބޭއްވި ބުރިކްސް ސަމިޓުގައި މެދުއިރުމައްޗާއި ޔޫކްރެއިންގައި ހިނގަމުންދާ ހަނގުރާމަތައް ހުއްޓާލައި ސުލްހަ ގާއިމު ކުރުމަށް ދުނިޔޭގެ ލީޑަރުން ގޮވާލައިފި އެވެ. އަދި ޔޫކްރެއިންގެ ހަނގުރާމަ ހުއްޓާލުމަށް މެދުވެރިއެއްގެ ދައުރު އަދާ ކުރުމަށް ހުށަހެޅުއްވި ހުށަހެޅުންތަކަށް މަރުހަބާ ދަންނަވާ ކަމަށް ރައީސް ވްލަޑިމިއާ ޕޫޓިން ވަނީ ވިދާޅުވެފަ އެވެ.

ރަޝިއާގެ ލީޑަރު އެ ބައްދަލުވުން ސިފަކުރައްވަނީ މޮސްކޯ އެކަހެރި ކުރުމަށް ހުޅަނގުން ކުރި މަސައްކަތް ނާކާމިޔާބުވެފައިވާ ކަމުގެ ނިޝާނެއްގެ ގޮތުގަ އެވެ. ނަމަވެސް ޔޫކްރެއިންގެ މައްސަލަ ނިމުމަކަށް ގެނައުމަށް ސީދާ ގޮވުންތަކާ ކުރިމަތިލާން ޖެހުނީ އޭނާގެ އެންމެ ގާތް އަދި އެންމެ މުހިންމު ބައިވެރިންގެ ފަރާތުންނެވެ.

މެދު ތެރޭގެ ސިޓީއެއް ކަމަށްވާ ކަޒާންގައި ދުނިޔޭގެ ގާތްގަނޑަކަށް 20 ލީޑަރުންގެ ބައްދަލުވުމަކީ 2022 ވަނަ އަހަރު ޕޫޓިން ޔޫކްރެއިންއަށް ސިފައިން ފޮނުވުމަށް އަމުރު ކުރެއްވި ފަހުން ރަޝިއާގައި ބާއްވާ އެންމެ ބޮޑު ޑިޕްލޮމެޓިކް ފޯރަމެވެ.

މީގެ 15 އަހަރު ކުރިން، 2009 ވަނަ އަހަރު ބްރިކްސް ފެށީ ހަތަރު މެމްބަރުންނާ އެކު އެވެ. އެއީ ބްރެޒިލް، ރަޝިޔާ، އިންޑިއާ، ޗައިނާއާ އެކު އެވެ އެ އަށް ފަހު ބްރިކްސްއަށް ވަނީ، ދެކުނު އެފްރިކާ، މިސްރު އަދި އީރާން ފަދަ ކުރިއަރަމުން އަންނަ އެހެން ގައުމުތައް ވެސް ވަދެފަ އެވެ.

ޗައިނާގެ ރައީސް ޝީ ޖިންޕިން ސަމިޓުގައި ވިދާޅުވީ ޔޫކްރެއިން "ހަނގުރާމަ އިތުރު ހަރުފަތަކަށް ގެންގޮސްގެން ނުވާނެ" ކަމަށެވެ.

ޝީ ވިދާޅުވީ ތިން އަސާސެއްގެ މަތީގައި ދެމިތިބެން ޖެހޭނެ ކަމަށެވެ.

"ހަނގުރާމައިގެ މައިދާނަށް އިތުރަށް ތެޔޮ ނޭޅުމާއި އިތުރަށް ހަނގުރާމަ ވަރުގަދަ ނުކުރުމާއި އަލިފާނަށް ތެޔޮ ނޭޅުން ފަދަ ތިން އުޞޫލަށް އަޅުގަނޑުމެން ޢަމަލުކުރަންވާނެ،" ޝީ ވިދާޅުވި އެވެ.

ރަޝިޔާއިން ޔޫކްރެއިންއަށް ސިފައިން ފޮނުވަން އެންގުމުގެ ދުވަސްކޮޅެއް ކުރިން ރަޝިޔާ އާއި ޗައިނާއިން ވަނީ "ނޯ ލިމިޓް" ސްޓްރެޓެޖިކް ޕާޓްނާޝިޕެއްގައި ސޮއިކޮށްފަ އެވެ. ޕޫޓިން އާއި ޝީ ވަނީ އަންގާރަ ދުވަހު ބޭއްވެވި ބައްދަލުކުރެއްވުމުގައި ގާތް ގުޅުމަށް ތައުރީފު ކުރައްވައިފަ އެވެ.

ވަކި ހަމަނުޖެހުމަކަށް އިޝާރާތް ކުރެެއްވުމެއް ނެތި އިންޑިއާގެ ބޮޑުވަޒީރު ނަރެންދުރަ މޯދީ ވެސް ވަނީ ސުލްހައަށް ގޮވާލައްވައިފަ އެވެ.

"އަޅުގަނޑުމެން ތާއީދު ކުރަނީ މަޝްވަރާ އާއި ޑިޕްލޮމަސީއަށް، ހަނގުރާމައަކަށް ނޫން." މޯދީ ވިދާޅުވި އެވެ.