ތުރުކީ އެއާލައިންގެ ޕައިލެޓަކު ވައިގެ ތެރޭގައި މަރުވެއްޖެ

އެމެރިކާގެ ހުޅަނގު އުތުރު އައްސޭރިފަށުގެ ސިއެޓަލްއިން ތުރުކީގެ އިސްތަންބޫލަށް އޭނާގެ އަމިއްލަ މާލިމީ ކަމުގައި ދަތުރުކުރި ތުރުކީ އެއާލައިންގެ ޕައިލެޓަކު ވައިގެ ތެރޭގައި މަރުވެއްޖެ އެވެ.

ކެޕްޓަން އިލްސެހިން ޕެހެލިވަން،59،ގެ ފުރާނަ ހުސްވެ، އޭނާ މަރުވީ އޭނާގެ މާލިމީ ކަމުގައި ބޯޓު ދުއްވަމުން ދަނިކޮށް ވައިގެ ތެރޭގަ އެވެ. އަދި ވަގުތުން ކޯ ޕައިލެޓް ވަނީ ބޯޓުގެ ކޮންޓްރޯލްތަކާ ހަވާލުވެފައި ކަމަށް އެ އެއާލައިންގެ ތަރުޖަމާނު އެކްސްގައި ވިދާޅުވި އެވެ.

"މަތިންދާ ބޯޓުގައި އަހަރެމެންގެ ކެޕްޓަނަށް ދިން އަވަސް ފަރުވާ ކާމިޔާބެއް ނުވި. ކޮކްޕިޓް ކްރޫ... އިމަޖެންސީގައި ބޯޓު ޖައްސަން ނިންމި، ނަމަވެސް ބޯޓު ޖެއްސުމުގެ ކުރިން އޭނާ ވަނީ މަރުވެފައި،" ޔަހްޔާ އުސްތޫން ތަފުސީލުކޮށްދެއްވި އެވެ.

އޭ350 މަރުކާގެ އެއާބަސް މަތިންދާ ބޯޓު ނިއުޔޯކަށް ޖެއްސުމަށް ފަހު، ފަސިންޖަރުންނާ އެކު އަލުން ބޯޓު ދަތުރުކުރީ ތުރުކީ ވިލާތަށް ކަމަށް އޭނާ ވިދާޅުވި އެވެ.

އަންގާރަ ދުވަހުގެ ރޭ ޕެސިފިކް ގަޑިން ރޭގަނޑު 7 ޖެހި އިރު ފްލައިޓް ޓީކޭ 204 ސިއޭޓަލް އިން ފުރި އެވެ. ޕައިލެޓަށް މައްސަލައާ ކުރިމަތިލާން ޖެހުނީ ކެނެޑާގެ ނުނަވުޓްގެ މަތީން ކަމަށް ބެލެވެ އެވެ. އަދި އެއާ އެކު ބޯޓުގެ ކޯ ޕައިލެޓް ބޯޓުގެ ކެޕްޓަން ކަމާ ހަވާލުވުމަށް ފަހު ބޯޓު ޖޯން އެފް ކެނެޑީ އެއާޕޯޓަށް މިސްރާބު ޖެހި އެވެ.

އެ މަތިންދާބޯޓު ނިއުޔޯކަށް ޖައްސާފައިވަނީ ސިއެޓަލް އިން ފުރިތާ ގާތްގަނޑަކަށް އަށް ގަޑިއިރު ފަހުންނެވެ.

ޕެހެލިވަން އަކީ 2007 ވަނަ އަހަރުން ފެށިގެން ތުރުކީ އެއާލައިންގެ ޕައިލެޓެއްގެ ގޮތުގައި މަސައްކަތް ކުރަމުން އަންނަ ޕައިލެޓެކެވެ. އަދި މާޗު މަހުގެ ކުރީކޮޅުގައި އޭނާ ވަނީ އާންމުކޮށް ހެލްތު ޗެކަޕެއް ވެސް ހަދައިފަ އެވެ. އެ ޗެކަޕްތަކުން އޭނާގެ އެއްވެސް ސިއްހީ މައްސަލައެއް ހުރި ކަމަކަށް ނުދައްކަ އެވެ.

ތުރުކީގެ އެއާ ޓްރެފިކް ކޮންޓްރޯލަރުންގެ ޖަމިއްޔާ، ޓެޓްކާ އިން ބުނީ އޭނާ އަކީ އޭވިއޭޝަން ކޮމިއުނިޓީއަށް ގިނަ އަހަރުތަކެއް ވަންދެން ހިދުމަތް ކުރައްވާފައިވާ ބޭފުޅެއް ކަމަށާއި އޭނާގެ އާއިލާއަށާއި ރަހުމަތްތެރިންނާއި އެކުވެރިންނަށް ތައުޒިޔާ ދަންނަވާ ކަމަށެވެ.

ނަމަވެސް ޕައިލެޓް މަރުވި ސަބަބެއް ހާމަކޮށްފައެއް ނުވެ އެވެ. ކޮންމެ ޕައިލެޓަކު ވެސް އަހަރަކު އެއް ފަހަރު މެޑިކަލް ޗެކަޕެއް ހަދަން ޖެހެ އެވެ. އަދި އުމުރުން 40 އަހަރުން މަތީގެ މީހުން ކޮންމެ ހަ މަހަކުން އެއް ފަހަރު މެޑިކަލް ސެޓްފިކެޓް އާކުރަން ޖެހެ އެވެ.

މީގެ ކުރިން 2015 ވަނަ އަހަރު ފީނިކްސް އިން ބޮސްޓަންއަށް ދަތުރު ކުރި އެމެރިކަން އެއާލައިންސްގެ ޕައިލެޓެއް އުމުރުން 57 އަހަރުގައި މަރުވި އެވެ. އަދި ފުރަތަމަ އޮފިސަރު ކެޕްޓަން ކަމާ ހަވާލުވެ ސިރަކިއުޒްއަށް ބޯޓު އެމަޖެންސީގައި ޖެއްސި އެވެ.

މިހާރު ގަވާއިދު ބުނާ ގޮތުން ބޮޑު ކޮމާޝަލް މަތިންދާ ބޯޓެއްގެ ކޮކްޕިޓްގައި ކޮންމެ ވަގުތަކު ވެސް ދެ ޕައިލެޓުން ތިބެން ޖެހެ އެވެ.

ނަމަވެސް އީޔޫގެ އޭވިއޭޝަން ސޭފްޓީ އެޖެންސީން ބުނީ އެއް ޕައިލެޓަކަށް ބޮޑެތި ފަސިންޖަރު މަތިންދާބޯޓުތައް އޮޕަރޭޓް ކުރެވޭނެ ޓެކްނޮލޮޖީ ތަރައްގީ ކުރަމުން އަންނަ ކަމަށެވެ. އެފަދަ ފިޔަވަޅެއްގެ ސަބަބުން ކޮކްޕިޓްގެ ދެ ވަނަ މެމްބަރަށް އަރާމު ކުރުމުގެ ފުރުސަތު ލިބިގެންދާނެ ކަމަށާއި ނަމަވެސް ރައްކާތެރިކަން ކަށަވަރުކުރުމަށާއި ފަޅުވެރިން "ނުކުޅެދުންތެރި" ވުމުން އެކަމަށް އިޖާބަ ދިނުމަށް ފިޔަވަޅުތަކެއް އަޅަން ޖެހޭ ކަމަށް އެ އެޖެންސީން ވަނީ ބުނެފަ އެވެ.