ގުޅިގެން މަސައްކަތް ކުރަން ސަޖިތު ދެކޮޅު ހައްދަވައިފި

ސްރީ ލަންކާގައި އަންނަ ނޮވެމްބަރު މަހު ބާއްވާ އާންމު އިންތިހާބުގައި އިދިކޮޅު އެއް އިއްތިހާދެއްގެ ގޮތުގައި މަސައްކަތް ކުރުމަށް ޔުނައިޓެޑް ނޭޝަނަލް ޕާޓީ (ޔޫއެންޕީ)ގެ ފަރާތުން ކުރީގެ ރައީސް ރަނިލް ވިކްރަމަސިންހަ ދެއްވި ދައުވަތަށް ސަމަގީ ޖަނާ ބަލަވެގަޔާ (އެސްޖޭބީ)ގެ ލީޑަރު ސަޖިތު ޕްރޭމަދާސާ ދެކޮޅު ހައްދަވައިފި އެވެ.

އެސްޖޭބީ އިން އިއްޔެ ބުނީ ކުރިއަށް އޮތް އާންމު އިންތިހާބުގައި އެ ޕާޓީގެ ފަރާތުން ބޮޑުވަޒީރު ކަމަށް ވާދަ ކުރެއްވުމަށް ލީޑަރު ސަޖިތު ޕްރޭމަދާސާ ރަސްމީކޮށް ހަމަޖައްސާފައިވާ ކަމަށެވެ.

އެ ނިންމުން ފާސްކުރީ ކޯލިޝަންގެ ތެރޭގައި ސަޖިތުގެ ލީޑަޝިޕް ހަރުދަނާކޮށް، ޕާޓީގެ ބައްދަލުވުމެއްގައި އިއްތިފާގުންނެވެ.

ސަޖިތު ވަނީ އޭނާ އާއި ކުރީގެ ރައީސް ރަނިލް ވިކްރަމަސިންހައާ ދެމެދު އެއްވެސް ގުޅުމެއް ނޯންނާނެކަން ސާފުކޮށްދެއްވައި، އެ ދެ ޕާޓީން ކޯލިޝަނެއް ހަދަން އުޅޭ ކަމަށް ދެކެވޭ ވާހަކަތައް ދޮގުކުރައްވައިފަ އެވެ.

އެސްޖޭބީން ބުނީ އެ ޕާޓީން މިހާރު އަންނަނީ އާންމު އިންތިހާބަށް ތައްޔާރުވަމުން ކަމަށާއި ކެމްޕެއިންގައި އިސްކޮށް ހަރަކާތްތެރިވެވަޑައިގަންނަވާނީ ވެސް ސަޖިތު ކަމަށެވެ.

ސަޖިތު ވަނީ ނިމިގެން ދިޔަ ރިޔާސީ އިންތިހާބުގައި ޕާޓީގެ ސަޕޯޓަރުން ކުރި މަސައްކަތަށް ޝުކުރު އަދާކުރައްވައިފަ އެވެ.

ޖުމުލަ 38 ކެންޑިޑޭޓަކު ވާދަ ކުރި އިންތިހާބުގައި ދެ ވަނައަށް އެންމެ ގިނަ ވޯޓު ހޯއްދެވީ ސަޖިތު ޕްރަމަދާސާ އެވެ. އޭނާ ވަނީ، ވޯޓަށް ޝަރުތު ހަމަވާ 17 މިލިއަން މީހުންގެ ތެރެއިން ވޯޓުގައި ބައިވެރިވި 12.75 މިލިއަން މީހުންގެ ވޯޓުގެ %32.76 ހޯއްދަވައިފަ އެވެ.

ސިންހަޅަ، ތަމަޅަ، މުސްލިމް އަދި ބުރުގަރު ފަދަ އެކި މުޖުތަމައުތަކުން ލިބުނު އެއްބާރުލުން ފާހަގަކޮށް، ސަޖިތު ވަނީ އެ ފަރާތްތަކަށް ހިފެހެއްޓުމެއް ނެތް ޝުކުރު އަދާ ކުރައްވައިފަ އެވެ. އަދި ވިދާޅުވީ ސްރީލަންކާގެ ކުރިއެރުމަށް މަަސައްކަތް ކުރެއްވުމަށް އޭނާ ދެމިހުންނަވާނެ ކަމަށެވެ. 

"ސިންހަޅަ، ތަމަޅަ، މުސްލިމު، ބުރުގަރު، ނުވަތަ އެހެން ވެސް ފަރާތްތަކަށް ނިސްބަތް ވިޔަސް، އަދި ކޮންމެ ސިޔާސީ ފިކުރަކަށް ނިސްބަތް ވިޔަސް، ތިޔަ ބޭފުޅުންގެ އުންމީދުތައް އަޅުގަނޑަށް އިހުސާސްކުރެވިއްޖެ، އަދި އެ އުންމީދުތައް އަޅުގަނޑާ އެކު ކުރިއަށް ގެންދާނަން،" ސަޖިތު އާންމުކޮށް ފޮނުއްވި މެސެޖުގައި ވިދާޅުވި އެވެ.

އޭނާ ވިދާޅުވީ އެއްބައިވަންތަ އަދި ތަނަވަސް ސްރީލަންކާއެއް ބިނާކުރުމަށް އޭނާ ކުރައްވާ މަސައްކަތަށް ބަދަލެއް ނާންނާނެ ކަމަށެވެ. 

"އަޅުގަނޑަށް އިތުބާރު ކުރެއްވި ކަމަށްޓަކައި ޝުކުރު ދަންނަވަން. އަޅުގަނޑު ވައުދުވަން، އަޅުގަނޑުމެންނަށް ހައްގު މިންވަރު ހޯދުމަށް ހަނގުރާމަ ކުރުން ހުއްޓާ ނުލާނެ ކަމުގެ." ސަޖިތު ވިދާޅުވި އެވެ.