ގުޅިގެން މަޖިލީހަށް ވާދަ ކުރުމަށް ރަނިލް އިދިކޮޅަށް ދައުވަތު ދެއްވައިފި

ކުރިއަށް އޮތް ރައްޔިތުންގެ މަޖިލީހުގެ އިންތިހާބާ ދިމާކޮށް ޔުނައިޓެޑް ނޭޝަނަލް ޕާޓީ (ޔޫއެންޕީ) އާއި އިދިކޮޅު ފަރާތްތަކުގެ މަގާމު ހަރުދަނާ ކުރުމަށް އިދިކޮޅު ހުރިހާ ސިޔާސީ ޕާޓީތައް ހިމެނޭ ގޮތަށް އާންމު އިއްތިހާދެއް އުފައްދަން ޔޫއެންޕީން ދައުވަތުދީފި އެވެ.

ކޮލަމްބޯގެ މަލް ރޯޑްގައި ހުންނަ ކުރީގެ ރައީސް ރަނިލް ވިކްރަމަސިންހަގެ ސިޔާސީ އޮފީހުގައި ރޭ ބޭއްވި ލީޑާޝިޕް ބޯޑުގެ ބައްދަލުވުމަކަށް ފަހު އެ ޕާޓީން ބުނީ އެ އިއްތިހާދު އުފެއްދުމަށް އިދިކޮޅު މައި ޕާޓީ، ސަމާގީ ޖަނާ ބަލަވެގަޔާ (އެސްޖޭބީ)އާ މިހާރު މަޝްވަރާ ކުރަމުން އަންނަ ކަމަށެވެ. 

އަދި އެ އިއްތިހާދު ލީޑް ކުރައްވާނީ އެސްޖޭބީގެ ލީޑަރު ސަޖިތު ޕްރަމަދާސާ ކަމަށާއި ޔޫއެންޕީން ބައިމަދު ޕާޓީއެއްގެ ގޮތުގައި އެ ޕާޓީއާ އެކު މަސައްކަތް ކުރުމަަށް ތައްޔާރަށް އޮތް ކަމަށެވެ.

ސިޔާސީ ގޮތުން ކުރިމަތިވަމުންދާ ގޮންޖެހުންތަކުން އަރައިގަތުމަށް އިދިކޮޅު ބާރުތަކުގެ މެދުގައި އެއްބައިވަންތަކަން އޮންނަން ޖެހޭނެ ކަމަށް ވިދާޅުވެ، ގުޅިފައިވާ އިއްތިހާދެއް އުފެއްދުމަށް ހުށަހެޅުއްވީ ކުރީގެ ރައީސް ވިކްރަމަސިންހަ އެވެ. އޭނާ ވިދާޅުވީ އިދިކޮޅު އެސްޖޭބީ ހިމެނޭ ގޮތަށް އިދިކޮޅު ހުރިހާ ޕާޓީތަކަށް އެ އިއްތިހާދުގައި ބައިވެރިވުމަށް ދައުވަތު ދިނުމަށް އޭނާ ވަނީ ޕާޓީގެ ލީޑަޝިޕްގެ ކިބައިން އެދިވަޑައިގެންފައި ކަމަށެވެ.

ރަނިލް ގޮވާލެއްވީ އިދިކޮޅު ފަރާތްތަކުގެ ބާރު ގަދަކޮށް، ކުރިއަށް އޮތް އިންތިހާބުގައި ކާމިޔާބީގެ ފުރުސަތު އިތުރުކުރުމަށް، ކުރިއަރަމުން އަންނަ ސިޔާސީ މައިދާނުގައި އަތްގަދަ ކުރުމަށެވެ. މި އިއްތިހާދު އުފެދުމުން ލަންކާގެ ސިޔާސީ މަސްރަހު ވަރަށް ބޮޑަށް ބަދަލުވެގެންދާނެ ކަމަށް ބެލެވެ އެވެ. އަދި އެ އޭގެ ސަބަބުން ސިޔާސީ މައިދާނުގައި ތިއްބެވި މުހިންމު ބޭފުޅުން އެއްތަނަކަށް ގެނެސްދޭނެ ކަމަށް ވެސް އެ ޕާޓީން ބުނެ އެވެ.

ޔޫއެންޕީގެ މި އިސްނެގުމާ އެކު އެ ކޯލިޝަން ރަސްމީކޮށް އެކުލަވާލުމުގެ މަސައްކަތް ކުރިއަށް އޮތް ހަފުތާތަކުގައި ހިނގާނެ ކަމަށް ބެލެވެ އެވެ.