12.5 ބިލިއަން ޑޮލަރަށް ހިޔާނާތްވެ، މަރަން ހުކުމްކޮށްފައިވާ ވިއެޓްނާމުގެ މަހުޖަނުގެ މައްޗަށް އިތުރު ޝަރީއަތެއް ފަށައިފި

މަކަރާއި ހީލަތް ހެދުމުގެ ކުށް ސާބިތުވެ، މަރަން ހުކުމް އިއްވާފައިވާ ވިއެޓްނާމްގެ ގެދޮރު އިމާރާތް ކުރުމުގެ މަހުޖަނު ވިޔަފާރިވެރިޔާ ޓްރޫންގް މައި ލާންގެ މައްޗަށް އުފުލާފައިވާ އިތުރު ދައުވާތަކެއްގެ ޝަރީއަތް އިއްޔެ ފަށައިފި އެވެ.

ރިއަލް އެސްޓޭޓް ކުންފުނި ވެން ތިންހު ފަޓްގެ ޗެއާ، 67،ގެ މައްޗަށް ހުކުމް ކުރީ ވިއެޓްނާމްގައި މިހާތަނަށް ހިންގި އެންމެ ބޮޑު މާލީ ހިޔާނާތުގެ މައްސަލަ ރޭވުމުގެ ކުށުގަ އެވެ. އެ ހިޔާނާތުގެ ޖުމުލަ 12.5 ބިލިއަން ޑޮލަރަށް އަރަ އެވެ. އަދި އެއީ 2022 ވަނަ އަހަރުގެ ވިއެޓްނާމުގެ ޖީޑީޕީގެ ގާތްގަނޑަކަށް %3 އާ އެއްވަރު އަދަދެކެވެ. އަދި ގާނޫނާ ހިލާފަށް ބޮޑު ބޭންކެއް ކޮންޓްރޯލްކޮށް ލޯން ނެގުމުގެ ސަބަބުން 27 ބިލިއަން ޑޮލަރުގެ ގެއްލުމަކާ ބޭންކް ކުރިމަތިލާން ޖެހުނު ކަމަށް ދައުލަތުގެ މީޑިއާ އިން ބުންޏެވެ.

އޭނާ ހައްޔަރުކޮށް ހުކުމް އިއްވުމަކީ 2022 ވަނަ އަހަރުން ފެށިގެން ކޮރަޕްޝަނާ ދެކޮޅަށް ހިންގަމުން އަންނަ ހަރަކާތުގެ އެންމެ ބޮޑު އެއް މައްސަލަ އެވެ. އެ މައްސަލަ ވެގެން ދިޔައީ ވިއެޓްނާމްގެ ސިޔާސީ މައިދާނުގައި ވެސް އެންމެ މަތީ ފަންތީގެ މީހުން ކަމުގައި ޝާމިލުވި އަދި ކުރީގެ ރައީސް އިސްތިއުފާ ދެއްވަން ޖެހުނު މައްސަލައަކަށެވެ.

ލަންގެ މައްޗަށް މިހާރު ކުރާ ޝަރީއަތަކީ އޮޅުވާލައިގެން މުދާ ވަގަށް ނެގުމާއި މަނީ ލޯންޑަރިންގެ ކުށުގެ ތުހުމަތުގެ ޝަރީއަތެކެވެ. ފުލުހުންގެ ތަހުގީގަށް އެނގިފައިވާ ގޮތުގައި އޭނާ ވަނީ ގާތްގަނޑަކަށް 36،000 އިންވެސްޓަރުންގެ އަތުން ހަތަރު ކުންފުންޏެއް މެދުވެރިކޮށް ގާނޫނާ ހިލާފަށް 1.2 ބިލިއަން ޑޮލަރުގެ ބޮންޑް ވިއްކާފައިވެ އެވެ.

މީގެ 12 އަހަރު ކުރިން، 2012 ވަނަ އަހަރުން ފެށިގެން 2022 ވަނަ އަހަރާ ދެމެދު ގަވާއިދާ ހިލާފަށް 4.5 ބިލިއަން ޑޮލަރަށް ވުރެ ގިނަ ޑޮލަރު ލަންގެ ވެން ތިންހް ފަޓްގެ ކޮންޓްރޯލް އޮންނަ 21 ކުންފުންޏެއް މެދުވެރިކޮށް އެތެރެއިން ބޭރަށް އަދި ބޭރުން އެތެރެއަށް ޓްރާންސްފާކޮށްފައިވާ ކަމަށް ތަހުގީގަށް ވަނީ އެނގިފަ އެވެ.

މަކަރާއި ހީލަތުން 18 ބިލިއަން ޑޮލަރު ހޯދާފައިވާ ކަމަށް ވެސް އޭނާގެ މައްޗަށް ތުހުމަތު ކުރެ އެވެ.

މި މައްސަލާގައި ދައުވާ ލިބޭ އިތުރު 33 ފަރާތެއް ވެސް ހިމެނެ އެވެ. އަދި އެ މައްސަލަ މަހެއްހާ ދުވަހަށް ދެމިގެންދާނެ ކަމަށް ބެލެވެ އެވެ.

ލަން އާއި އޭނާގެ އާއިލާ އިން ވެން ތިންގް ފާޓް ކުންފުނި އުފެއްދީ 1992 ވަނަ އަހަރު ވިއެޓްނާމް ހުޅުވާލައި، ދައުލަތުގެ އިގްތިސާދީ ނިޒާމު ބަދަލުކޮށް ބޭރުގެ އިންވެސްޓަރުންނަށް ހުޅުވާލެވިފައިވާ މާކެޓާ ރައްޓެހި އިގްތިސާދަކަށް ބަދަލުވި ހިސާބުންނެވެ.

ވެން ތިންހް ފަޓް އަކީ ވިއެޓްނާމްގެ އެންމެ މުއްސަނދި ރިއަލް އެސްޓޭޓް ފާމްތަކުގެ ތެރޭގައި ހިމެނޭ ލަގްޒަރީ ރެސިޑެންޝަލް އިމާރާތްތަކާއި އޮފީސްތަކާއި ހޮޓާތަކާއި ޝޮޕިން ސެންޓަރުތައް ފަދަ ޕްރޮޖެކްޓްތައް ހިންގާ ކުންފުންޏެކެވެ. އެކަމުގެ ސަބަބުން އޭނާ އަކީ އެ ގައުމުގެ މާލީ ސިނާއަތުގެ މުހިންމު ބައިވެރި އެކެވެ.