ކޮމޮރޯސްގެ ރައީސަށް ވަޅިން ހަމަލާދިން މީހާ ޖަލުގެ ކުޑަ ގޯޅީގައި މަރުވެފައި އޮއްވައި ފެނިއްޖެ

މިދިޔަ ހުކުރު ދުވަހު ކޮމޮރޯސްގެ ރައީސަށް ވަޅިން ހަމަލާދީގެން ހައްޔަރުކުރި މީހާ ޖަލުގެ ކުޑަ ގޮޅީގައި މަރުވެފައި އޮއްވައި ފެނިފައިވާ ކަމަށް ކޮމޮރޯސްގެ ރަސްމީ ފަރާތްތަކުން މިއަދު ބުނެފި އެވެ.

މަޝްހޫރު ދީނީ އިލްމުވެރިއެއްގެ ޖަނާޒާގައި ރައީސް އަޒާލީ އަސޫމާނީ ހުންނަވަނިކޮށް ވަޅިން ދިން ހަމަލާ އެރީ އޭނާގެ އަތަށެވެ. 

ނޭޝަނަލް ޕްރޮސެކިއުޓާ އަލީ މުހައްމަދު ޒުއުނައިދު ވިދާޅުވީ ހަމަލާ ދިން މީހާ ހައްޔަރު ކުރުމަށް ފަހު އޭނާގެ ރުޅި މައިތިރި ކުރުމަށް ކުޑަ ގޮޅިއެއްގައި އެކަހެރި ކުރި ކަމަށެވެ.

އޭނާ ވިދާޅުވީ ރައީސަށް ހަމަލާދިން މީހާގެ ފުރާނަ ނެތް ހަށިގަނޑު އިއްޔެ ހެނދުނު ގޮޅީގެ ތެރެއިން ފެނިފައިވާ ކަމަށެވެ. 

"ޑޮކްޓަރުން އޭނާ މަރުވެފައިވާ ކަމަށް ކަނޑައެޅީ. އޭނާ މަރުވި ސަބަބު ދެނެގަތުމަށް ތަހުގީގެއް މިހާރު ވަނީ ފަށާފައި،" އިންޑިއަން އޯޝަންގައި އޮންނަ ކޮމޮރޯސްގެ ވެރި ރަށް މޮރޯނީގައި ބޭއްވި ނޫސްވެރިންގެ ބައްދަލުވުމެއްގައި ޒުއުނައިދު ވިދާޅުވި އެވެ.

ރައީސް އަޒާލީ،65،ގެ ހާލު ރަނގަޅެވެ. އޭނާގެ ސިއްހީ އެއްވެސް މައްސަލައެއް ނެތެވެ. އަދި އޭނާ ވަނީ ނުރައްކަލުން ސަލާމަތްވެފަ އެވެ. ކޮންމެ ވެސް ވަރަކަށް ހަމަލާދިން ތަން ފަހަން ޖެހުނެވެ.

ރައީސަށް ހަަމަލާދިނީ ކީއްވެގެން ކަމެއް ސާފެއް ނުވެ އެވެ. ނަމަވެސް އެކަން ބަލަމުން އަންނަ ކަމަށް ކަމާބެހޭ ފަރާތްތަކުން ބުނެ އެވެ.

އޭއެފްޕީން ރިޕޯޓްކޮށްފައިވާ ގޮތުގައި ވަޅި ން ހަމަލާދީފައިވަނީ އުމުރުން 24 އަހަރުގެ އަހްމަދު އަބުދު ނަމަކަށް ކިޔާ ސިފައިންގެ މީހެކެވެ.

މަންޒަރު ދުށް މީހުން އޭއެފްޕީއަށް ބުނި ގޮތުގައި ރައީސަށް ހަމަލާދިން މީހާ ޖަނާޒާގެ ތެރެއިން އެ މީހުންނަށް ވަނީ ފެނިފަ އެވެ. މަންޒަރު ދުށް މީހުން ބުނި ގޮތުގައި އެ މީހާ ވަނީ ވަޅިން ރައީސްގެ އަތަށް ހަމަލާދީފަ އެވެ. އަދި އެ ވަގުތު އޭނާ ހުއްޓުވީ އެ ޖަނާޒާގައި ތިބި މީހުން ކަމަށެވެ. 

ރައީސް އަޒާލީ އެންމެ ފުރަތަމަ ވެރިކަމަށް ވަޑައިގެންނެވީ 1999 ވަނަ އަހަރު އަސްކަރީ ބަގާވާތަކުންނެވެ.

ވެރިކަމުން 10 އަހަރު ފަހުން 2016 ވަނަ އަހަރު ހިޔާލު ތަފާތުވި އިންތިހާބެއް އޭނާ ކާމިޔާބު ކުރައްވައި، މިދިޔަ ޖެނުއަރީ މަހު އަލުން އިންތިހާބުވެވަޑައިގަތެވެ.

ވޯޓަށް މަކަރު ހެދި ކަމުގެ ތުހުމަތާ އެކު އޭގެ ފަހުން ދެ ދުވަސް ވަންދެން ނުރައްކާތެރި މުޒާހަރާތަކެއް ވެސް ކުރި އެވެ.

އަޒާލީގެ މައްޗަށް ތުހުމަތު ކުރެވެނީ ނަހަމަ ބާރުވެރިކަން އިތުރު ކުރައްވަމުންދާ ކަމުގެ ތުހުމަތެވެ.

އޭނާ ވަނީ 2023 ވަނަ އަހަރުން ފެށިގެން 2024 ވަނަ އަހަރާ ހަމައަށް އެފްރިކަން ޔޫނިއަންގެ ރައީސްކަން ކުރައްވައިފަ އެވެ.