އެމެރިކާގެ ސެކިއުރިޓީޒް އެންޑް އެކްސްޗޭންޖް ކޮމިޝަން (އެސްއީސީ)ގެ ހެޑްކުއާޓާސް އިމާރާތުގެ ބޭރުގައި އެމެރިކާގެ ދިދައެއް ވިހުރެނީ
އިލެކްޓްރޯނިކް މުއާމަލާތްތައް ބެލެހެއްޓުމުގައި ބޮޑެތި ފޭލުވުންތަކެއް ހުރެގެން އެމެރިކާގެ ސެކިއުރިޓީޒް އެންޑް އެކްސްޗޭންޖު ކޮމިޝަން (އެސްއީސީ) އިން، ކްރެޑިޓް ރޭޓިންގެ މައި ހަ އޮގަނައިޒޭޝަނެއް ޖުމްލަ 49 މިލިއަން ޑޮލަރުން އިއްޔެ ޖޫރިމަނާކޮށްފި އެވެ.
އެންމެ ބޮޑު ޖޫރިމަނާއެއް ކުރީ މޫޑީސް އިންވެސްޓާ ސާވިސަސް އާއި އެސްއެންޑްޕީ ގްލޯބަލް ރޭޓިންގްސް އެވެ. އެ ދެ އޮގަނައިޒޭޝަން ވަނީ 20 މިލިއަަން ޑޮލަރުން ޖޫރިމަނާކޮށްފަ އެވެ. އަދި އެ މީހުން ވަނީ އެ ޖޫރިމަނާ ދެއްކުމަށް އެއްބަސްވެފަ އެވެ.
ފިޗު ރޭޓިންގްސް އިން ވަނީ ޖޫރިމަނާގެ ގޮތުގައި 8 މިލިއަން ޑޮލަރު ދެއްކުމަށް އެއްބަސްވެފަ އެވެ. އަދި އޭއެމް ބެސްޓް ރޭޓިން ސާވިސަސް އިން 1 މިލިއަން ޑޮލަރު، އެޗުއާރު ރޭޓިންސް ޑި މެކްސިކޯ، އެސްއޭ ޑި ސީވީ އިން 250،000 ޑޮލަރު އަދި ޑެމޮޓެކުން 100،000 ޑޮލަރު ޖޫރިމަނާގެ ގޮތުގައި ދެއްކުމަށް ވެސް ވަނީ އެއްބަސްވެފަ އެވެ.
އެސްއީސީން ބުނީ އެ އޮގަނައިޒޭޝަންތަކުން އެސްއީސީގެ އަމުރުތަކުގައި ބުނާ، ފެޑެރަލް ސެކިއުރިޓީޒު ގާނޫނުގެ ދަށުން ބަލަހައްޓަން ޖެހޭ ރެކޯޑް ބެލެހެއްޓުމުގެ މާއްދާތަކާ ހިލާފުވެފައިވާ ކަމަށް އެއްބަސްވެފައިވާ ކަމަށެވެ.
މިސާލެއްގެ ގޮތުން އެސްއީސީގެ އަމުރުގައި ބުނީ، މޫޑީސް ރޭޓިންސްގެ މުވައްޒަފުން ކްރެޑިޓް ރޭޓިންގެ ހަރަކާތްތަކާ ބެހޭ ގޮތުން ޓެކްސްޓް މެސެޖާއި ވަޓްސްއެޕް މެދުވެރިކޮށް އެ މީހުންގެ އަމިއްލަ ޑިވައިސްތަކުން މުއާމަލާތް ކުރަމުން ގޮސްފައިވާ ކަމަށެވެ. އޭގެ ތެރޭގައި އެންމެ މަތީ ލެވެލްގެ މުވައްޒަފުން ވެސް ހިމެނޭ ކަމަށެވެ. އަދި އޭގެ ތެރޭގައި އެސޯސިއޭޓް މެނޭޖިން ޑިރެކްޓަރަކު ކްރެޑިޓް ރޭޓިން ކްލައިންޓުންނާ ބެހޭ ގޮތުން އަމިއްލަ ގޮތުން ކޮމެންޓްތައް ދިނުން ވެސް ހިމެނޭ ކަމަށެވެ.
އޭއެމް ބެސްޓް އަދި ޑެމޮޓެކް ފިޔަވައި އެނޫން އެޖެންސީތަކުން ޝަކުވާ ބަލަހައްޓާނެ ކޮންސަލްޓަންޓުން ވެސް ހޯދަން ޖެހޭ ކަމަށެވެ. އެސްއީސީން ބުނީ އޭއެމް ބެސްޓް އާއި ޑެމޮޓެކުން ޝަރުތުތަކާ އެއްގޮތަށް އަމަލުކުރުމަށް "މުހިންމު މަސައްކަތްތަކެއް" ކޮށްފައިވާ ކަމަށާއި ތަހުގީގަށް އެއްބާރުލުން ދީފައިވާ ކަމަށެވެ.
މޫޑީސް، އެސްއެންޑްޕީ ގްލޯބަލް ރޭޓިންގްސް، ފިޗު ރޭޓިންސް އަދި އެޗުއާރު ރޭޓިންގްސް ޑި މެކްސިކޯ އިން ވަނީ އިލެކްޓްރޯނިކް މުވާސަލާތުތައް ބެލެހެއްޓުމާ ގުޅޭ ސިޔާސަތުތައް ފުޅާ ދާއިރާއެއްގައި މުރާޖައާ ކުރުމަށް އެއްބަސްވެފައި ކަމަށް އެސްއީސީ އިން ބުންޏެވެ.
"ރެގިއުލޭޓަރީ ރެކޯޑް ބެލެހެއްޓުމުގެ މަސްއޫލިއްޔަތުތައް ދަމަހައްޓަން މޫޑީސް އިން ފުރިހަމައަށް މަސައްކަތް ކުރާނަން. އަދި އެކަންކަން ހަމަޖެއްސުމަކީ އަޅުގަނޑުމެންނަށް ލިބޭ ވަރަށް ބޮޑު އުފަލަކަށް ހަދާނަން،" މޫޑީސްގެ ތަރުޖަމާނު ވިދާޅުވި އެވެ.
އެޗުއާރު ރޭޓިންސް އިން ނެރުނު ބަޔާނެއްގައި ބުނީ ފާއިތުވި އަހަރެއްހާ ދުވަހުގެ ތެރޭގައި އެ އެޖެންސީން އިލެކްޓްރޯނިކް ރެކޯޑް ބެލެހެއްޓުމުގެ ސިޔާސަތުތަކާއި އިޖުރާއަތްތައް ވަރަށް ބޮޑަށް ހަރުދަނާކޮށްފައިވާނެ ކަމަށެވެ. އެސްއީސީއާ އެކު ހެދި ސެޓްލްމަންޓަކީ ކޮންމެ އިހްތިސާސެއްގައި ވެސް ރެގިއުލޭޓަރީ މިންގަނޑުތައް ގަބޫލުކޮށް ދެމެހެއްޓުން ކަމަށް އެ ބަޔާނުގައި ބުންޏެވެ.
އޭއެމް ބެސްޓް ރޭޓިން ސާވިސަސް އިން ބުނީ އެސްއީސީގެ ރެކޯޑް ބެލެހެއްޓުމުގެ މިންގަނޑުތަކާއި ކޮމްޕްލަޔަންސް ބަލައިގަތުމުގައި އެ އެޖެންސީއަށް ކޮމްޕްލަޔަންސް ކޮންސަލްޓަންޓެއް ބޭނުން ނުވާ ކަމަށް ނިންމި ނިންމުމަށް ތައުރީފު ކުރާ ކަމަށެވެ.
އެސްއެންޑްޕީ ގްލޯބަލް އިން އިއްޔެ ނެރުނު ނޫސް ބަޔާނެއްގައި ބުނީ މި މައްސަލަ ނިމުނީތީ އުފާކުރާ ކަމަށެވެ.
އެސްޕީޖީއާރު އިން ރެގިއުލޭޓަރީ މަސްއޫލިއްޔަތުތަކާ އެއްގޮތަށް އަމަލުކުރުން ވަރަށް ސީރިއަސްކޮށް ބަލައި، ރޭޓިން ޕްރޮސެސްގެ މުސްތަގިއްލު ކަމާއި މަތީ ފެންވަރުގެ މުސްތަގިއްލު ކްރެޑިޓް ރޭޓިންއަށް މަސައްކަތް ކުރާނެ ކަމަށެވެ.
ކޮމެންޓް (1)
ތެފައާސާ.