ހޫތީން ހަމަލާދިން ޓޭންކަރުން ތެޔޮ ލީކްވެދާނެ: އެމެރިކާ

ރަތް ކަނޑުގައި ދަތުރު ކުރަމުން ދަނިކޮށް ޔަމަނުގެ ހޫތީ ހަނގުރާމަވެރިން މިދިޔަ ހަފުތާގައި ތެޔޮ ޓޭންކަރަކަށް ދިން ހަމަލާއާ ގުޅިގެން އަދިވެސް އެ ޓޭންކަރުގައި އަލިފާން ހިފާފައިވާ ކަމަށާއި ތެޔޮ ލީކުވެދާނެ ކަމަށް އެމެރިކާގެ ޕެންޓަގަން އިން މިއަދު ބުނެފި އެވެ.

ޕެންޓަގަން އިން ބުނީ ގްރީސްގެ ހިއްސާ އޮންނަ އަދި އެ ގައުމުގެ ދިދަ ޖަހާފައިވާ އެމްވީ ސޯނިއަން ސަލާމަތް ކުރަން ކުރި މަސައްކަތް ހޫތީން ނާކާމިޔާބުކޮށްލާފައިވާ ކަމަށާއި އިތުރު ހަމަލާތަކެއް ދޭނެ ކަމުގެ އިންޒާރު ވެސް ދީފައިވާ ކަމަށެވެ.

އެ ބޯޓުގައި 150،000 ޓަނަށް ވުރެ ގިނަ ތެޔޮ ނުވަތަ 1 ބިލިއަން ފީފާގެ ތެޔޮ އެބަހުއްޓެވެ. އަދި އެ ލީކްވާ ތެލަކީ ތާރީހުގައި ވެސް އެންމެ ގިނަ އަދަދަކަށް ތެޔޮ ލީކްވާ އެންމެ ބޮޑު އުޅަނދަކަށް ވުމުގެ ފުރުސަތު އޮތް ކަމަށެވެ.

ޔަމަނުގެ ބޮޑު ބައެއް ކޮންޓްރޯލް ކުރާ އީރާނަށް ތާއީދުކުރާ ހޫތީން ބުނަނީ ގާޒާގައި އިޒްރޭލާއި ހަމާސްއާ ދެމެދު ހިނގަމުންދާ ހަނގުރާމައާ ގުޅިގެން ފަލަސްތީނަށް ތާއީދުކޮށް، ރަތް ކަނޑުން ދަތުރު ކުރާ އުޅަނދުތަކަށް ހަމަލާދެމުންދާނެ ކަމަށެވެ.

ހޫތީން ބުނަމުން ދަނީ އެމީހުންގެ ހަމަލާތައް އަމާޒު ކުރަނީ ހަމައެކަނި އިޒްރޭލާއި އެމެރިކާ ނުވަތަ އިނގިރޭސިވިލާތާ ގުޅުން ހުރި އުޅަނދުތަކަށް ކަމަށެވެ.

އިނގިރޭސިވިލާތުގެ މެރިޓައިމް ޓްރޭޑް އޮޕަރޭޝަންސް (ޔޫކޭއެމްޓީއޯ) އޮފީހުން ބުނީ ސޯނިއަންއަށް އެންމެ ފުރަތަމަ ހަމަލާ ދީފައިވަނީ ކުޑަ ދެ ބޯޓަކުން ކަމަށާއި އޭގެ ފަހުން ކޮން ބައެއްކަން ނޭނގޭ ބަޔަކު ތިން މިސައިލަކުން ހަމަލާ ދިނުމުން އަލިފާނުގެ ހާދިސާއެއް ހިނގައި އިންޖީނު ހުއްޓުނު ކަމަށެވެ.

އޭގެ އެއް ދުވަސް ފަހުން ޔޫރަޕްގެ ހަނގުރާމަމަތީ ބޯޓަކުން އެ ބޯޓުގައި ތިބި 25 ފަޅުވެރިން ސަލާމަތްކޮށް ޖިބޫޓީއަށް ވަނީ ގެންގޮސްފަ އެވެ.

އެމެރިކާގެ ސްޓޭޓް ޑިޕާޓްމަންޓުން ހޮނިހިރު ދުވަހު ނެރުނު ބަޔާނެއްގައި ބުނީ ސޯނިއަންއަށް ދިން ހަމަލާތަކާ މެދު ކަންބޮޑުވުންވާ ކަމަށެވެ. އަދި އެމެރިކާ އިން ބުނީ މިއީ 1989 ވަނަ އަހަރު އަލަސްކާގެ އައްސޭރިފަރަށް ލީކްވުވި ތެލަށް ވުރެ ހަތަރު ގުނަ ބޮޑު އަދަދެއް ކަމަށެވެ.

އެ ހާދިސާގައި ކަނޑަށް އެޅުނީ 257،000 ފީފާ ތެލެވެ.

އަންގާރަ ދުވަހު ޕެންޓަގަންގެ ތަރުޖަމާނު މޭޖާ ޖެނެރަލް ޕެޓްރިކް ރައިޑާ ވިދާޅުވީ ހާލުގައި ޖެހިފައިވާ ބޯޓު ސަލާމަތް ކުރުމަށް ދެ ޓަގު ފޮނުވާފައިވާ ކަމަށާއި ނަމަވެސް ހޫތީން ވަނީ އެ ދެ ޓަގަށް ވެސް ހަމަލާދޭނެ ކަމުގެ އިންޒާރު ދީފައި ކަމަށެވެ.