ޔަހްޔާ ސިންވާރު. (ފޮޓޯ/ބީބީސީ)
އީރާނުގެ ވެރިރަށް ތެހެރާނުގައި މިދިޔަ ހަފުތާގައި އަވަހާރަކޮށްލި އިސްމާއިލް ހަނިއްޔާގެ ބަދަލުގައި، ގަތަރުގެ ވެރިރަށް ދޯހާގައި ދެ ދުވަސް ވަންދެން ދިގު މަޝްވަރާތަކެއް ކުރުމަށް ފަހު، ހަމާސްގެ އާ ލީޑަރަކަށް ޔަހްޔާ ސިންވާރު އިއްޔެ ހަމަޖައްސައިފަ އެވެ.
ސިންވާރަކީ 2017 ވަނަ އަހަރުން ފެށިގެން ގާޒާގެ އެތެރޭގައި އެ ޖަމާއަތުގެ ލީޑަރެއްގެ ގޮތުގައި މަސައްްކަތް ކުރައްވަމުން އަންނަ ބޭފުޅެކެވެ. އިއްޔެއިން ފެށިގެން އޭނާއަކީ އެ ޖަމާއަތުގެ ސިޔާސީ ގޮފީގެ ލީޑަރެވެ.
ހަމާސްގެ އިސް އޮފިޝަލަކު ބީބީސީއަށް ވިދާޅުވީ ހަމާސްގެ ލީޑާޝިޕުން އެ ހަރަކާތުގައި އިސްކޮށް ހަރަކާތްތެރި ވުމަށް ސިންވާރު، 61، އިހްތިޔާރުކުރީ އިއްތިފާގުން ކަމަށެވެ.
ހަމާސްގެ ސިޔާސީ ލީޑަރަކަށް ސިންވާރު ހަމަޖައްސާފައި މިވަނީ މެދުއިރުމަތީގައި ނުތަނަވަސްކަން އިތުރުވެފައިވާ ދަނޑިވަޅެއްގައި އަދި އީރާނާއި އެ ގައުމުގެ ބައިވެރިން ހަނިއްޔާ އަވަހާރަކޮށްލުމުގެ ޒިންމާ އިޒްރޭލުގެ ބޮލުގައި އަޅުވައި އަދި ބަދަލު ހިފާނެ ކަމުގެ އިންޒާރު ދީފައިވާ ދަނޑިވަޅެއްގަ އެވެ.
ހަމާސް ޖަމާއަތުގެ އިސް ބޭފުޅުން ބައިވެރިވި ދެ ދުވަހުގެ މަޝްވާރާތަކުގައި އެ ޖަމާއަތުގެ އާ ވެރިޔާއަށް ފުރުސަތުތައް އޮތީ ހުޅުވާލައިފަ އެވެ.
އެތައް ގޮތެއްގެ މައްޗަށް ވާހަކަ ދެއްކި ނަމަވެސް އެންމެ ފަހުން ހުށަހެޅީ ދެ ނަމެކެވެ. އެއީ ޔަހްޔާ ސިންވާރާއި މުހައްމަދު ހަސަން ދަރްވިޝް އެވެ.
ހަމާސްގެ އޮފިޝަލަކު ބީބީސީއަށް ވިދާޅުވި ގޮތުގައި ސިންވާރު ހޮވަން ކައުންސިލްގެ އިއްތިފާގުން ވަނީ ފާސްކޮށްފަ އެވެ.
"އެމީހުން މަރާލީ ހައްލުތަކަށް ހުޅުވާލެވިފައިވާ އެންމެ މަޑުމައިތިރި އަދި ހައްލުތަކަށް ޖާގަދޭ މީހާ، ހަނިއްޔާ. މިހާރު އެ މީހުން ޖެހޭނީ ސިންވާރާއި އަސްކަރީ ލީޑަޝިޕާ އިދިކޮޅަށް މުއާމަލާތް ކުރަން،" އޭނާ ވިދާޅުވި އެވެ.
ސަރަހައްދީ ޑިޕްލޮމެޓުން ދެކޭ ގޮތުގައި އިސްމާއީލް ހަނިއްޔާ ހަމާސް ޖަމާއަތުގެ އެހެން މީހުންނާ އަޅާބަލާއިރު މަޝްވަރާއަށް ލޯބިކުރައްވާ ޝަހުސިއްޔަތެކެވެ. އެއާ ހިލާފަށް ސިންވާރަކީ ހަމާސް ޖަމާއަތުގެ އެންމެ ހަރުކަށި ފިކުރުގެ ބޭފުޅެއްގެ ގޮތުގައި ހިމެނޭ ބޭފުޅެކެވެ.
އިޒްރޭލުން އެންމެ ބޭނުންވާ މީހުންގެ ލިސްޓުގެ އެންމެ ކުރީގައި މިވަގުތު އޮތީ ސިންވާރެވެ. އިޒްރޭލުގެ ސަލާމަތީ އިދާރާތަކުން ގަބޫލުކުރާ ގޮތުގައި 7 އޮކްޓޯބަރު 2023ގައި އިޒްރޭލަށް ދިން ހަމަލާ ރާވައި ތަންފީޒު ކުރުމުގައި އިސްކޮށް އުޅުއްވީ އޭނާ އެވެ.
ޔަހްޔާ ސިންވާރަކީ ޓެރަރިސްޓެއް ކަމަށާއި އޭނާ އަކީ ތާރީހުގައި ދިން އެންމެ އަނިޔާވެރި ޓެރަރިސްޓް ހަމަލާގެ ޒިންމާ އުފުލަން ޖެހޭ މީހާ ކަމަށް އިޒްރޭލުން ބުންޏެވެ.
އެމެރިކާގެ ސެކްރެޓަރީ އޮފް ސްޓޭޓް އެންޓަނީ ބްލިންކެން މިދިޔަ ޖޫން މަހު ވިދާޅުވީ އޮކްޓޯބަރު މަހު ދިން ހަމަލާތަކަށް ފަހު ސިންވާރު އާންމުންގެ ތެރެއިން ފެނިފައި ނުވާ ކަމަށާއި އޭނާ އަކީ ގާޒާގައި "10 ބުރީގެ އަޑީގައި" ފޮރުވިފައިވާ މީހެއް ކަމަށެވެ.
ސިންވާރު އުފަންވީ 1962 ވަނަ އަހަރު ގާޒާގެ ހާން ޔޫނުސް ރެފިއުޖީ ކޭމްޕްގަ އެވެ. އަދި 1980ގެ އަހަރުތަކުގެ ފަހުކޮޅު ސިންވާރު ވަނީ ހަމާސްގެ ސެކިއުރިޓީ ސާވިސް، މަޖުދުގެ ނަމުގައި އުފައްދަވައިފަ އެވެ.
އޭނާގެ އުމުރުގެ ބޮޑު ބައި ހޭދަކުރައްވާފައިވަނީ އިޒްރޭލުގެ ޖަލުގަ އެވެ. އަދި 1988 ވަނަ އަހަރު ތިން ވަނަ ފަހަރަށް ހައްޔަރުކުރުމަށް ފަހު އުމުރު ދުވަހުގެ ޖަލު ހުކުމެއް އިއްވާފައިވެ އެވެ.
ނަމަވެސް އޭނާ އަކީ 2011 ވަނަ އަހަރު އިޒްރޭލުން ދޫކޮށްލި ފަލަސްތީނާއި އިޒްރޭލުގެ 1،027 ގައިދީންގެ ތެރޭގައި ހިމެނިވަޑައިގަންނަވާ ބޭފުޅެކެވެ.