ޔޫކްރެއިންގެ ރައީސް ވޮލޮޑިމިޔާ ޒެލެންސްކީ.
އެމެރިކާގައި އުފެއްދި އެފް-16 މަރުކާގެ ދެ މަތިންދާބޯޓް ޔޫކްރެއިންއަށް ހަދިޔާކޮށްފި އެވެ.
"ޔޫކްރެއިންގައި އެފް-16 މިހާރު އެބަހުރި. އަޅުގަނޑުމެން އެކަން ކޮށްފިން،" ޔޫކްރެއިންގެ ރައީސް ވޮލޮޑިމިޔާ ޒެލެންސްކީ ވިދާޅުވި އެވެ.
ޒެލެންސްކީ ވިދާޅުވީ ޔޫކްރެއިންއަށް ޖެޓް ދިނުމަށް އެހީދޭ ގައުމުތަކުން ފުރަތަމަ އިއުތިރާޒު ކުރި ކަމަށާއި ނަމަވެސް ފަހުން އެކަން ކޮށްދިނީތީ އެ ފަރާތްތަކަށް ޝުކުރު އަދާ ކުރާ ކަށެވެ.
އެ ބޯޓުތައް ލިބުމަކީ ސޯވިއެޓް ޒަމާނުގެ ކުރީގެ ބޯޓުތަކަށް ވަރަށް ބޮޑަށް ބަރޯސާވެފައިވާ ޔޫކްރެއިންގެ ވައިގެ އަސްކަރިއްޔާގެ ގާބިލްކަން އިތުރުކުރުމަށް ލިބުނު ވަރަށް ބޮޑު ކުރިއެރުމެކެވެ.
ކުރިއަށް އޮތް މަސްތަކުގައި އިތުރު އެފް-16 މަރުކާގެ މަތިންދާބޯޓުތައް ލިބޭނެ ކަމަށް އުންމީދު ކުރާ ކަމަށް އޭނާ ވިދާޅުވި އެވެ. ނަމަވެސް ޒެލެންސްކީ ވިދާޅުވީ އެ ހުރިހާ އުޅަނދުތައް އުދުއްސުމަށް ބޭނުންވާ، ތަމްރީނު ލިބިފައިވާ ޕައިލެޓުން ޔޫކްރެއިންގައި އަދި ނެތް ކަމަށެވެ.
ޔޫކްރެއިންއަށް ލިބިފައިވަނީ ކިތައް މަތިންދާބޯޓު ކަމެއް ނުވަތަ އެ ހުރިހާ މަތިންދާބޯޓުތަކަކީ ޑެންމާކް، ނެދަލޭންޑްސް އަދި އެމެރިކާއިން ހަދިޔާ ކުރި މަތިންދާބޯޓް ކަމެއް އޭނާ ވިދާޅެއް ނުވެ އެވެ.
އެމެރިކާގެ ރައީސް ޖޯ ބައިޑަން އޮގަސްޓް 2023ގައި ޔޫކްރެއިންއަށް ބޯޓުތައް ފޮނުވުމަށް ހުއްދަ ދެއްވި ފަހުން، ޔޫރަޕްގެ އިއްތިހާދާއި ނޭޓޯގެ ގައުމުތަކުން ވަނީ އެފް-16 މަރުކާގެ ގާތްގަނޑަކަށް 65 މަތިންދާބޯޓު ޔޫކްރެއިނަށް ފޮނުވުމަށް ވައުދުވެފަ އެވެ.
އެފް-16 މަރުކާގެ ބޯޓްތައް ތައާރަފްކުރީ 1978 ވަނަ އަހަރު އެވެ. ހުޅަނގުގެ ގިނަ ގައުމުތަކުން ދަނީ މުސްކުޅި އެ މަތިންދާބޯޓުގެ ބަދަލުގައި 2015 ވަނަ އަހަރު އެމެރިކާއިން އުފެއްދި އެފް-35 މަރުކާގެ މަތިންދާބޯޓު ހޯދުމުގެ މަސައްކަތް ކުރަމުންނެވެ.
ބޯޓުތަކުގައި ހަރުކުރެވޭ ދުރު ރާސްތާގެ ސްޓޯމް ޝެޑޯ މިސައިލްތައް ސަޕްލައި ކުރަމުން ދިޔަ ނަމަވެސް އިނގިރޭސިވިލާތުގެ ވައިގެ އަސްކަރިއްޔާގައި އެއްވެސް އެފް-16 މަރުކާގެ މަތިންދާބޯޓެއް ނެތެވެ.
ރޮކެޓާއި ބޮމާއި މިސައިލް އުފުލުމުގެ ގާބިލުކަން ލިބިފައިވާ އެފް-16 މަރުކާގެ މަތިންދާބޯޓުތަކުން ރަޝިއާގެ ބޯޑަރު ކައިރީގައިވާ އަމާޒުތަކަށް އިތުރު ހަމަލާތަކެއް ދިނުމުގެ ފުރުސަތު ލިބޭނެ އެވެ.