ޓުވިން ޓަވަރު ގޮއްވާލާފައި
މީގެ 24 އަހަރު ކުރިން 11 ސެޕްޓެމްބަރުގައި 2001ގައި އެމެރިކާގެ ޓުވިން ޓަވަރަށް ދިން ޓެރަރިސްޓް ހަމަލާ ރޭވި ކަމުގެ ތުހުމަތުކުރެވޭ މީހުންގެ ތެރެއިން ތިން މީހަކު ޝަރީއަތުގެ ކުރިން އެއްބަސްވުމެއް ހަދާފައިވާ ކަމަށް އެމެރިކާގެ ޑިފެންސް ޑިޕާޓްމަންޓުން ބުނެފި އެވެ.
ހާލިދު ޝެއިހް މުހައްމަދާއި ވަލީދު މުހައްމަދު ސާލިހް މުބާރަކް ބިން އައްތާޝް އަދި މުސްތަފާ އަހުމަދު އާދަމް އަލް ހައުސާވީ ވަނީ އެމެރިކާގެ ނޭވީ ބޭސް، ގުއަންޓަނާމޯ ބޭގައި ޝަރީއަތަކާ ނުލައި އެތައް އަހަރެއް ވަންދެން ބަންދުކޮށްފަ އެވެ.
އެމެރިކާގެ ނޫސްތަކުން ބުނާ ގޮތުގައި އެ މީހުން ކުށަށް އިއުތިރާފުވާނީ މަރުގެ އަދަބުން ސަލާމަތްވުމަށެވެ.
ޝަރީއަތުގެ ކުރިން އެ މީހުން ކުށަށް އިއުތިރާފުވި ޝަރުތުތައް އަދި އާންމެއް ނުކުރެ އެވެ.
އަލްގައިދާ އިން ދިން ހަމަލާގައި ނިއު ޔޯކް، ވާޖީނިއާ އަދި ޕެންސިލްވޭނިއާގެ ގާތްގަނޑަކަށް 3،000 މީހުން ވަނީ މަރުވެފަ އެވެ. އެއާ ވިދިގެން "ޓެރަރިޒަމާ ދެކޮޅު ހަނގުރާމަ"އިގެ ނަމުގައި ފެށި ހަނގުރާމާގައި އެމެރިކާ އިން އަފްގާނިސްތާނާއި އިރާގު ހިފި އެވެ.
އެއީ 1941 ވަނަ އަހަރު ޖަޕާނުން ހަވާއީގެ ޕާލް ހާބަރަށް ދިން ހަމަލާގައި 2،400 މީހުން މަރުވި ހާދިސާއަށް ފަހު އެމެރިކާއަށް ދިން އެންމެ ނުރައްކާތެރި ހަމަލާ އެވެ.
ނިއުޔޯކް ޓައިމްސް އިން ބުނި ގޮތުގައި އެ އެއްބަސްވުން އެންމެ ފުރަތަމަ އިއުލާނުކުރީ ޕްރޮސެކިއުޓަރުން، އެ ހަމަލާގައި މަރުވި މީހުންގެ އާއިލާއަށް، ފޮނުވި ސިޓީއެއްގަ އެވެ.
"އެކަށީގެންވާ އަދަބެއްދީ މަރުގެ އަދަބު އުވާލުމުގެ ބަދަލުގައި ދައުވާ ލިބޭ ހުރިހާ ކުށަކަށް ވެސް އިއުތިރާފުވުމަށް އެ ތިން މީހުން ވަނީ އެއްބަސްވެފައި. އޭގެ ތެރޭގައި ދައުވާގެ ލިސްޓްގައި ހިމަނާފައިވާ 2،976 މީހުންގެ މަރުގެ މައްސަލަ ވެސް ހިމެނޭ،" ޕްރޮސެކިއުޓަރުން ފޮނުވި ސިޓީގައިވެ އެވެ.
އެ މީހުންގެ މައްޗަށް އުފުލި ދައުވާތަކުގެ ތެރޭގައި އާންމުންނަށް ހަމަލާ ދިނުމާއި ހަނގުރާމައިގެ ގާނޫނާ ހިލާފަށް މީހުން މެރުމާއި ހައިޖެކް ކުރުމާއި ޓެރަރިޒަމްގެ ދައުވާ ހިމެނެ އެވެ.
ޓައިމްސް އިން ރިޕޯޓްކޮށްފައިވާ ގޮތުގައި އެ މީހުންގެ މައްސަލަ އަންނަ ހަފުތާގެ ކުރީކޮޅު ރަސްމީކޮށް ކޯޓަށް ހުށަހަޅާނެ އެވެ.
ހާލިދު ޝެއިހް މުހައްމަދަކީ މި ހަމަލާ ރޭވި މޭސްތިރިޔާ ކަމަށް ގިނަ ބަޔަކު ގަބޫލުކުރެ އެވެ. އަދި އެ މީހުން ހިންގި ޖަރީމާތަކުގެ ތެރޭގައި ފަސިންޖަރު މަތިންދާބޯޓުތައް ހިފަހައްޓައި ނިއު ޔޯކްގައި ހުންނަ ވޯލްޑް ޓްރޭޑް ސެންޓަރާއި ވޮޝިންޓަންގެ ބޭރުގައި ހުންނަ ޕެންޓަގަންްއަށް ހަމަލާދިނުން ހިމެނެ އެވެ.
ހަތަރު ވަނަ މަތިންދާބޯޓް ޕެންސިލްވޭނިއާއަށް ވެއްޓުނީ، ފަސިންޖަރުންގެ ކުރިމަތިލުންތަކަކާ ގުޅިގެންނެވެ.
އެމެރިކާއިން ތައުލީމު ހާސިލުކޮށްފައިވާ އިންޖިނޭރު މުހައްމަދު އަތުލައިގަތީ މާޗު 2003ގައި ޕާކިސްތާނުންނެވެ.
ޕްރޮސެކިއުޓަރުން ބުނާ ގޮތުގައި ބޯޓުތައް ހައިޖެކް ކުރުމުގެ ވިސްނުން ކުރިއަށް ނެރެ، އެ ޕްލޭން ހުށަހެޅުއްވީ އޭނާ އެވެ. އަދި އެ ހުށަހެޅުން އަލްގައިދާގެ އޭރުގެ ލީޑަރު އުސާމާ ބިން ލާދިން ބަލައިގަނެ، ފަހުން މީހުން ރެކްރޫޓްކޮށް ހައިޖެކަރުން ތަމްރީނު ކުރުމުގެ މަސައްކަތްތައް ފެއްޓި އެވެ.
މިދިޔަ ސެޕްޓެމްބަރު މަހު އެމެރިކާގެ ރައީސް ޖޯ ބައިޑަންގެ ސަރުކާރުން ވަނީ ކިއުބާގައި ހުންނަ އެމެރިކާގެ ނޭވީ ބޭސްގައި ހިފަހައްޓާފައިވާ ފަސް މީހަކާ އެކު ކުށަށް އިއުތިރާފުވެ ހަދަން އުޅުނު އެއްބަސްވުމުގެ ޝަރުތުތައް ބޭރުކޮށްލައިފަ އެވެ. އޭގެ ތެރޭގައި މުހައްމަދު ހިމެނެ އެވެ.
އެ މީހުން ރައީސްގެ އަރިހުން އެދުނީ އެމީހުން އެކަހެރިކޮށް ނުބޭތިއްބުމާއި ނަފުސާނީ ފަރުވާ ލިބޭނެ ކަމުގެ ޔަގީންކަން ދިނުމަށެވެ.
ވައިޓް ހައުސްގެ ނޭޝަނަލް ސެކިއުރިޓީ ކައުންސިލުން ބުނީ އާ އެއްބަސްވުމާ ބެހޭ ގޮތުން ބުދަ ދުވަހު ރައީސް އޮފީހަށް އަންގާފައިވާ ކަމަށާއި މަޝްވަރާތަކުގައި އެއްވެސް ދައުރެއް އަދާކޮށްފައި ނުވާނެ ކަމަށެވެ.
އެ ވާހަކަތަކާ ގުޅިގެން ރިޕަބްލިކަން ޕާޓީން ވެސް ވަނީ ބައިޑަންގެ ސަރުކާރަށް ވަރަށް އަވަހަށް ބަހުގެ ހަމަލާތަކެއްދީފަ އެވެ. ސެނެޓުގެ މައިނޯރިޓީ ލީޑަރު މިޗް މެކްކޮނެލް ވަނީ އެކަން ކުށްވެރިކުރައްވައިފަ އެވެ.
"ޓެރަރިސްޓުންނާ އެކު މަޝްވަރާ ކުރުމަށް ވުރެ ގޯސް ކަމަކީ އެމީހުން ބަންދުގައި ތިބުމަށް ފަހު އެމީހުންނާ ވާހަކަ ދެއްކުން،" އޭނާ ވިދާޅުވި އެވެ.