ދެކުނު ކޮރެއާ މީހުންނަށް އުތުރު ކޮރެއާގެ އެތުލީޓުންނޭ ބުނެވުމުން މައާފަށް އެދިއްޖެ

ޕެރިސް އޮލިމްޕިކްސް ހުޅުވުމުގެ ރަސްމިއްޔާތުގައި ދެކުނު ކޮރެއާގެ ޓީމުގެ ނަން އުތުރު ކޮރެއާގެ ނަމުގައި އޮޅުވާލައިގެން އިއުލާން ކުރެވުމުން އިންޓަނޭޝަނަލް އޮލިމްޕިކް ކޮމިޓީ (އައިއޯސީ) އިން މައާފަށް އެދެފި އެވެ.

ފްރާންސްގެ ވެރިރަށް ޕެެރިސްގެ ސީން ކޯރުން ދަތުރުކުރި ދެކުނު ކޮރެއާގެ ޓީމު ތައާރަފްކުރީ "ޑިމޮކްރެޓިކް ޕީޕަލްސް ރިޕަބްލިކް އޮފް ކޮރެއާ"ގެ މަންދޫބުންގެ ގޮތުގަ އެވެ. އައިއޯސީގެ އޮފިޝަލު ކޮރެއާގެ ނަން ފަރަންސޭސި ބަހުންނާއި އިނގިރޭސި ބަހުން ވިދާޅުވި އެވެ.

އެނައުންސަރު އުތުރު ކޮރެއާގެ ވަފުދަށް ނިސްބަތް ކުރީ ވެސް ހަމަ އެ ތައާރަފެވެ.

"[އޮލިމްޕިކްސް] ހުޅުވުމުގެ ރަސްމިއްޔާތު ބްރޯޑްކާސްޓް ކުރުމުގެ ތެރޭގައި ދެކުނު ކޮރެއާގެ ޓީމު ތައާރަފްކުރުމުގައި ހެދުނު ގޯހަށް ވަރަށް ބޮޑަށް މައާފަށް އެދެން،" އައިއޯސީން ކޮރެއަން ބަހުގެ އެކްސް އެކައުންޓުގައި ކުރި ޕޯސްޓެއްގައި ބުނެފައި ވަނީ އެ ގޯހުގެ ސަބަބުން ދެކުނު ކޮރެއާގެ ރައްޔިތުންގެ ނުރުހުން އުފެދިފައިވާ ކަމަށެވެ.

އައިއޯސީގެ ރައީސް ތޯމަސް ބަޗް ވެސް ވަނީ ދެކުނު ކޮރެއާގެ ރައީސް ޔޫން ސުކް-ޔޯލްއާ ވާހަކަ ދައްކަވައި މައާފަށް އިއްޔެ އެދިވަޑައިގެންފަ އެވެ.

ޔޫން ވަނީ އެފަދަ ގޯސްތައް ތަކުރާރު ކޮށްގެން ނުވާނެ ކަމަށް ވިދާޅުވެ ކާމިޔާބީއަށް އެދިވަޑައިގެންފަ އެވެ.

ހޫނު މޫސުމާއި ފިނި މޫސުމުގެ އޮލިމްޕިކް ގޭމްސް ބާއްވަމުން އައި ދެކުނު ކޮރެއާގެ ރައްޔިތުން ތިބީ ހައިރާންވެފައި ކަމަށް ވެސް ޔޫން ވިދާޅުވި އެވެ.

އެެ ދެ ގައުމު ދެމެދު 1950-1953 ކުރި ހަނގުރާމަ ނިމުނަސް، ޓެކްނިކަލްކޮށް އަދިވެސް އެ ހަނގުރާމަ ދަނީ ކުރިއަށެވެ. އެ ހަނގުރާމަ ނިމިގެން ދިޔައީ ސުލްހައިގެ މުއާހަދާއެއް އެކުލަވާ ނުލެވި، ހަތިޔާރު އެޅި ޒޯނެއްގެ ގޮތުގަ އެވެ. މިފަހަކަށް އައިސް ދެ ކޮރެއާގެ މެދުގައި ނުތަނަވަސްކަން އުފެދިފައި ވާއިރު، 2018 ވަނަ އަހަރުގެ އަސްކަރީ އެއްބަސްވުން ވެސް ދެ ގައުމުން ވަނީ މެދުކަނޑާލައިފަ އެވެ.

ދެކުނު ކޮރެއާގެ މިނިސްޓްރީ އޮފް ކަލްޗާ، ސްޕޯޓްސް އެންޑް ޓުއަރިޒަމް އިން އިއްޔެ ނެރުނު ބަޔާނެއްގައި ބުނީ އޮލިމްޕިކްސް ހުޅުވުމުގެ ރަސްމިއްޔާތުގައި އޮޅިގެން ކުރި އިއުލާނާ ގުޅިގެން ހިތާމަކުރާ ކަމަށެވެ.

ދެކުނު ކޮރެއާ އިން 21 އިވެންޓެއްގައި ވާދަކުރާ 143 އެތުލީޓުން ހިމެނެ އެވެ. އަދި 2016 ވަނަ އަހަރުގެ އޮލިމްޕިކްސްއަށް ފަހު ފުރަތަމަ ފަހަރަށް ގޭމްސްއަށް އެނބުރި އަންނަ އުތުރު ކޮރެއާއިން ވަނީ 16 އެތުލީޓުން ފޮނުވައިފަ އެވެ.

އެ ގައުމުގެ ހާރިޖީ ވުޒާރާއިން ބުނީ ސޯލްގައި ހުންނަ ފަރަންސޭސި އެމްބަސީއަށް ގުޅައި "ނުވިސްނޭ ވަރުގެ ގޯހެއް" ހެދުމުން ހިތާމަ ކުރާ ކަމަށް ބުނެފަ އެވެ.

ދެކުނު ކޮރެއާގެ ނޭޝަނަލް އޮލިމްޕިކް ކޮމިޓީން ބުނީ ޕެރިސް އޮލިމްޕިކް އިންތިޒާމް ކުރާ ކޮމިޓީ އާއި އައިއޯސީއާ ބައްދަލުކޮށް އެކަމާ ދެކޮޅަށް އަޑު އުފުލަން ނިންމާފައިވާ ކަމަށެވެ. 

ބައިނަލްއަގްވާމީ ގޮތުން އެކަހެރިވެފައިވާ މި ދަނޑިވަޅުގައި އުތުރު ކޮރެއާއިން އަންނަނީ ރަޝިއާއާ ގުޅުން ބަދަހި ކުރަމުންނެވެ.