ސަރުކާރުގެ ވަޒީފާގެ ކޯޓާއާ ދެކޮޅަށް ދަރިވަރުން ކުރި މުޒާހަރާތަކާ ގުޅިގެން އެ ގައުމުގެ ބައެއް ސަރަހައްދުތަކުގައި ހަމަނުޖެހުންތައް ހިނގަމުން ދަނިކޮށް ކާފިއުގެ ދެވަނަ ދުވަހު މަދު ވެހިކަލްތަކެއް މަގުމަތީގައި ދުއްވަނީ. (ފޮޓޯ/އޭއެފްޕީ)
ސަރުކާރުގެ ވަޒީފާތަކުގެ %30 ވަކި ބަޔަކަށް ހާއްސަ ކުރުމާ ދެކޮޅަށް މުޅި ގައުމުގައި ކުރި ނުރައްކާތެރި މުޒާހަރާތަކުގައި ގާތްގަނޑަކަށް 150އެއްހާ މީހުން މަރުވިތާ ދުވަސްތަކެއް ފަހުން މިއަދު ބަޔަކަށް އިންޓަނެޓް އަލުން ދޫކޮށްފި އެވެ.
ނަމަވެސް، ސުޕްރީމް ކޯޓުން އެކި ކެޓަގަރީތަކަށް ހާއްސަ ބައި %7އަށް ކުޑަކުރުމާ އެކު އާދީއްތަ ދުވަހުން ފެށިގެން ގައުމު އޮތީ ވަރަށް ބޮޑަށް ހަމަހިމޭންވެފަ އެވެ.
އެ މުޒާހަރާތައް، ހާއްސަކޮށް ސްކޫލް ކުދިންނާއި ޔުނިވަސިޓީތަކުގެ ދަރިވަރުން ކުރަން ފެށީ 2018 ވަނަ އަހަރުން ފެށިގެން އުވާލާފައިވާ ކޯޓާ ނިޒާމު އަަނބުރާ ރުޖޫއަ ކުރުމާ ގުޅިގެންނެވެ.
ބޮޑުވަޒީރު ޝެއިހް ހަސީނާގެ ސަރުކާރުން އިއްޔެ ބުނީ ސުޕްރީމް ކޯޓުގެ ހުކުމަށް ބޯލަނބާނެ ކަމަށެވެ.
ކޯޓާތަކާ ދެކޮޅަށް ކުރަމުންދާ މުޒާހަރާތައް މަޑުޖެހުމާ އެކު ސަރުކާރުން ވަނީ މިދިޔަ ހަފުތާގައި އިއުލާނުކުރި ކާފިއުއަށް ލުއިދޭން ފަށައިފަ އެވެ.
ބަންގްލަދޭޝްގައި ދަރިވަރުން މުޒާހަރާތައް ފެށީ، ޕާކިސްތާންގެ ފަރާތުން ބަންގްލަދޭޝް 1971 ވަނަ އަހަރު މިނިވަން ކުރުމަށް މަސައްކަތް ކުރި ހަނގުރާމަވެރިންގެ އާއިލާގެ މެމްބަރުންނަށް ސަރުކާރުގެ ވަޒީފާތަކުގެ %30 ހާއްސަ ކުރާ ނިޒާމަކާ ދެކޮޅަށެވެ.
އޮފިޝަލުން ވިދާޅުވީ މިއަދު ހަތް ގަޑިއިރަށް ފިޔަވަޅުތަކަށް ލުއިދޭނެ ކަމަށާއި ހެނދުނު 11 އިން މެންދުރު ފަހު 3އަށް އޮފީސްތައް ވެސް ހުޅުވާފައި ހުންނާނެ ކަމަށެވެ.
ވެރިރަށް ޑާކާގައި މިދިޔަ ހަފުތާގައި ހިންގި ހަމަނުޖެހުންތަކާ ހިލާފަށް، މިއަދު ހެނދުނު މީހުން މަގުތަކަށް ނުކުމެ، ބައެއް ތަންތަނުގައި ބަސްތައް ވެސް ދުއްވާފައިވެ އެވެ.
މުޒާހަރާގެ ބައިވެރިން ސަރުކާރަށް 48 ގަޑިއިރުގެ މުހުލަތު ދީފައި ވަނީ އެ މީހުން ބުނާ އަށް ނުކުތާގެ ލިސްޓުގެ އިތުރު ހަތަރު ޝަރުތެއް ފުރިހަމަ ކުރުމަށެވެ. އަދި ދެން އަޅާނެ ފިޔަވަޅެއް ބުރާސްފަތި ދުވަސް ނިމޭ އިރު އިއުލާނު ކުރާނެ ކަމަށް އެ މީހުން ބުންޏެވެ.
"އަހަރެމެން އެދެނީ އިންޓަނެޓް އަލުން އިއާދަކުރުމާއި ކެމްޕަސްތަކުން ފުލުހުން ނެރުމާއި ޔުނިވާސިޓީތައް ހުޅުވުން ފަދަ ހަތަރު ނުކުތާގެ ޑިމާންޑް ސަރުކާރުން ފުއްދައިދިނުން،" މުޒާހަރާގެ ކޯޑިނޭޓަރު ނާހިދު އިސްލާމް ވިދާޅުވި އެވެ.
ޒުވާނުން މުޒާހަރާތަކަށް ނުކުތީ، 170 މިލިއަން މީހުން ދިރިއުޅޭ ގައުމުގައި މިދިޔަ މަހު ހައި ކޯޓުން ކުރި ހުކުމާ ގުޅިގެންނެވެ. އެއީ ގާތްގަނޑަކަށް 32 މިލިއަން ޒުވާނުން ވަޒީފާ އިން ނުވަތަ ތައުލީމު ހާސިލުނުކުރާ ގައުމެއްގައި ދައުލަތުގެ ދެބައިކުޅަ އެއް ބަޔަށް ވުރެ މަދު ވަޒީފާއެއް ފެންވަރުގެ މައްޗަށް ހުޅުވުމަށް އެދި އެވެ.
މުޒާހަރާތައް ވަރުގަދަވީ، މުޒާހަރާގެ ބައިވެރިންގެ ޑިމާންޑްތައް ފުއްދުމަށް ހަސީނާ ދެކޮޅު ހައްދަވައި ހަނގުރާމަ ކުރި މީހުންގެ އާއިލާތަކަށް ދޭން ކަންޑައަޅާފައިވާ ވަޒީފާތައް އެ ގޮތުގައި ބޭއްވުމަށް ވަކާލާތު ކުރެއްވުމުންނެވެ.
މި ހަމަނުޖެހުންތަކުގެ ޒިންމާ ސިޔާސީ ވާދަވެރިންގެ ބޮލުގައި އަޅުވަމުން ހަސީނާ ވަނީ "ހާލަތު ރަނގަޅުވާ ކޮންމެ ފަހަރަކު" ކާފިއު އުވާލާނެ ކަމަށް ވިދާޅުވެފަ އެވެ.
މި ހަމަނުޖެހުންތަކުގައި އިދިކޮޅު ބަންގްލަދޭޝް ނޭޝަނަލިސްޓް ޕާޓީގެ އެއްވެސް ދައުރެއް ނެތް ކަމަށް އެ ޕާޓީން ވަނީ ބުނެފަ އެވެ.