ހޮން ކޮންގުގެ ޕްރައިމަރީ ސްކޫލެއްގައި ޗައިނާގެ ދިދަ ނަގައި އެ ގައުމުގެ ގައުމީ ސަލާމް ކިޔުމަށް ބޭއްވި އެސެމްބްލީއެއްގެ ތެރެއިން: ހޮން ކޮންގުގެ ސްކޫލްތަކުގައި ޗައިނާގެ ގައުމިއްޔަތު މާއްދާ ކިޔަވައިދިނުމަށް ވަނީ ގާނޫނަކުން މަޖުބޫރުކޮށްފައި
ގައުމިއްޔަތު ދިރުވަން ހޮން ކޮންގުގެ ސްކޫލްތަކުގައި ޗައިނާގެ ގައުމީ ސަލާމް ބާރަށް ކިޔަން އަންގައިފި
ގައުމިއްޔަތު ދިރުވުމުގެ ގޮތުން ހޮން ކޮންގުގެ ސްކޫލުތަކުގައި ޗައިނާގެ ގައުމީ ސަލާމް ދަރިވަރުން ލައްވާ ބާރަށް އަޑުހަރުކޮށް ކިޔުއްވުމަށް އެ ސަރަހައްދުގެ ސަރުކާރުން އެތަނުގެ ސްކޫލުތަކަށް އަންގައި އިންޒާރުކޮށްފި އެވެ.
ޗައިނާގެ މިނިވަން ސަރަހައްދެއްގެ ގޮތުގައި އޮންނަ ހޮން ކޮންގުގައި ޑިމޮކްރަސީ ގާއިމްކުރުމަށް އިދިކޮޅު ސިޔާސީ ފަރާތްތަކުން ފެށި އިސްލާހީ މަސައްކަތްތައް 2020 ވަނަ އަހަރު ޗައިނާ ސަރުކާރުން ހުއްޓުވި ފަހުން ގައުމިއްޔަތަށް ލޯބި ޖެއްސުމަށް މަންހަޖުގެ ތެރޭގައި ހާއްސަ އިސްކަމެއް އަންނަނީ ދެމުންނެވެ.
ހޮން ކޮންގުގެ އެޑިއުކޭޝަން ބިއުރޯއިން 20 ޕްރައިމަރީ އަދި ސެކަންޑަރީ ސްކޫލް އިންސްޕެކްޓްކުރުމަށް ފަހު ބައެއް ސްކޫލްތަކަށް އަންގާފައިވަނީ ގައުމީ ސަލާމް ބާރަށް ކިޔަން ދަރިވަރުން އަހުލުވެރި ކުރުވައި އެކަން އަމަލީ ގޮތުން ކުރުވުމަށް އަދި ގައުމިއްޔަތު މާއްދާ ކިޔަވައިދިނުމަށް ހާއްސަ އިސްކަމެއް ދިނުމަށެވެ. އެގޮތުން:
-
ހޮން ކޮންގް މަކާއޯ ލުތުރަން ޗާޗް ޕްރައިމަރީ ސްކޫލަށް އަންގާފައި ވަނީ އެ ސްކޫލުގެ ދަރިވަރުން ޗައިނާގެ ގައުމީ ސަލާން ކިޔަނީ މާ ވަދުކޮށް އަދި އަޑުމަޑުކޮށް ކަމަށް. އެހެންވެ، ގައުމީ ސަލާން ބާރަށް އަޑުހަރުކޮށް ކިޔަން އަންގާފައިވޭ
-
ޔާން ޗައި ހޮސްޕިޓަލް ލިމް ޕޯ ޔެން ސެކަންޑަރީ ސްކޫލުގެ ޓީޗަރުންނަށް އަންގާފައި ވަނީ ދަރިވަރުން އެއް އަޑަކުން ގައުމީ ލަވަ އަޑުހަރުކޮށް ބާރަށް ކިޔުމުގެ އާދަ އަށަގަންނުވަން މިހާރަށް ވުރެ ބޮޑަށް މަސައްކަތް ކުރުމަށް
އެ އިންސްޕެކްޝަން ރިޕޯޓުތަކުން އިތުރަށް ހާމަވެފައިވާ ގޮތުގައި:
-
6 ސްކޫލަކަށް ވަނީ ގައުމިއްޔަތު އުގަންނައިދިނުމަށް އަމާޒުކޮށްގެން މަންހަޖު ހަރުދަނާ ކުރުމަށް ނަސޭހަތްތެރިވެފައި
-
ބައެއް ސްކޫލްތަކުން ޗައިނާގެ ސަގާފަތާއި ތާރީހު އުގަންނައި ދިނުމަށް ދަރިވަރުން އެ ގައުމަށް ފީލްޑް ޓްރިޕްތަކުގައިގެންގޮސް ގައުމިއްޔަތަށް އަހުލުވެރި ކުރުވާތީ އެކަން ފާހަގަކޮށްފައިވޭ
-
ހޮން ކޮންގުގެ ސްކޫލްތަކުގައި ދަރިވަރުން ޗައިނާގެ ގައުމީ ދިދަ އުފުލުމަށް އަހުލުވެރިކޮށް އެއީ ފަހުރުވެރި ކަމެއްގެ ގޮތުގައި ބަލައި ގަންނާތީ އެކަން ފާހަގަކޮށްފައިވޭ
ޖެނުއަރީ މަހު ޗައިނާއިން ވަނީ ހޮން ކޮންގުގެ ސްކޫލްތައް ޝާމިލްވާ ގޮތަށް ޗައިނާގެ ކޮމިއުނިސްޓް ޕާޓީގެ ލީޑަޝިޕާއި ފިކުރު ކުރިއެރުވުމަށް ގައުމިއްޔަތުގެ މާއްދާއެއް ސްކޫލުތަކުގައި ކިޔަވައިދޭން ޖެހޭ ގާނޫނަކަށް އަމަލުކުރަން ފަށައިފަ އެެވެ. އަދި އެ ގާނޫނުގެ ދަށުން ކުންފުނިތަކުން ވެސް އެ މީހުންގެ ވިޔަފާރީގެ ހަރަކާތްތަކުގައި ވެސް ގައުމިއްޔަތު ކުރިއަރުވަން އިސްކަން ދޭން ވަނީ ލާޒިމްކޮށްފަ އެވެ.
ޗައިނާއިން ބުނާ ގޮތުގައި މި ގާނޫނުގެ މަގުސަދަކީ ތަފާތު ފިކުރުތަކުން ގައުމު ބައިބައިވިޔަ ނުދީ އެއްބައިވަންތަކޮށް ވަރުގަދަ ގައުމެއް ބިނާކުރުމަށް ބާރު އެޅުމެވެ.
ނަމަވެސް އެ ގާނޫނަށް ފާޑުކިޔާ ފަރާތްތަކުން ތުހުމަތުކުރަނީ ޗައިނާގެ ގައުމިއްޔަތު ހޮން ކޮންގުގެ ރަސްމީ ތައުލީމުގެ ތެރެއަށް ވައްދައި އެކަމަށް މަޖުބޫރުކުރުވަނީ މިނިވަން ސަރަހައްދެއްގެ ގޮތުގައި ހޮން ކޮންގު އޮންނަ އޮތުން ނިމުމަކަށް ގެންނަން ޗައިނާއިން ދެކޭ ހުވަފެން ހަގީގަތަކަށް ހެދުމަށް ކަމަށެވެ.
ހޮން ކޮންގުގެ ސަރުކާރުން އެދިގެން މިދިޔަ މަސްތެރޭ އެ ސަރަހައްދުގެ މަތީ ކޯޓުން ވަނީ އިސްލާހީ ފިޔަވަޅުތަކަށް ގޮވާލި މުޒާހަރާތަކުގައި ބޭނުންކުރަމުން ދިޔަ އަދި އެ ސަރަހައްދުގެ ބައެއް މީހުން ގައުމީ ސަލާމުގެ ގޮތުގައި ބަލަމުން އައި "ގްލޯރީ ޓް ހޮން ކޮންގް" ލަވަ އާންމުކޮށް ބޭނުން ކުރުމާއި ބްރޯޑްކާސްޓް ކުރުން މަނާކޮށްފަ އެވެ.
ހޮން ކޮންގަށް ޑިމޮކްރަސީ ގެނައުމަށް އެ ސަރަހައްދުގެ ސިޔާސީ އިދިކޮޅު ފަރާތްތަކުން ފެށި އިސްލާހީ މަސައްކަތްތައް ޗައިނާއިން 2020 ވަނަ އަހަރު ހުއްޓުވީ ހަރުކަށި ގައުމީ ސަލާމަތާ ގުޅޭ ގާނޫނެއް ތައާރަފްކޮށްގެންނެވެ.
ހޮން ކޮންގުގެ ގައުމީ ސަލާމަތާއި އެއްބައިވަންތަ ކަމަށް ހުރަސް އަޅާ ކަމަށް ބުނެ އެ ގާނޫނުގެ ދަށުން އެ ސަރަހައްދުގެ ގާނޫނު ހަދާ މަޖިލީހުގެ އިދިކޮޅު މެންބަރުންނާއި އެތައް އެކްޓިވިސްޓުންނެއް ވަނީ ޝަރީއަތް ހިންގައި ދިގު މުއްދަތަކަށް ޖަލަށްލައިފަ އެވެ. އަދި އަނެއް ބައެއްގެ ޝަރީއަތްތައް އަދިވެސް ދަނީ ހިނގަމުންނެވެ.