ގާޒާއަށް ދޭ އެހީ އދ. އިން މިސުރަށް ފޮނުވަން ފަށައިފި

އިޒުރޭލުން ގާޒާއަށް ބޮމުގެ ހަމަލާތައް ދޭން ފެށިތާ ހަފުތާއަކަށް ވުރެ ގިނަ ދުވަސް ވެފައި ވާއިރު، ގާޒާއަށް ބޯމަތިވެފައިވާ އިންސާނީ ކާރިސާއިން ސަލާމަތްވާން ބޭނުންވާ އެހީގެ ސާމާނު އެ ސަރަހައްދަށް ފޯރުކޮށްދޭން އިޒްރޭލުން އަދިވެސް ހުއްދައެއް ނުދެ އެވެ. 

މިސުރުގެ ރަފާ ބޯޑަރު ތެރެއިން ގާޒާއަށް އެހީގެ ސާމާނު ވެއްދެން އޮތީ ހަމަލާތަކުގެ ބިރު ނެތް ނަމަ އެވެ. އެކަމަކު އިޒްރޭލާ އެކު ބޭއްވި މަޝްވަރާތައް އެދެވޭ ގޮތެއްގައި ކުރިއަށް ގޮސްފައި ނުވާކަމަށް މިސުރުން ބުނެ އެވެ. \

މިސްރާ ގުޅިފައި އޮތް ގާޒާގެ ސަރަހައްދީ ރޮނގުން ގާޒާއަށް އެއްޗެހި އެތެރެކޮށް ބޭރުކުރުން ހުއްޓުވުމުގެ ބާރު އިޒްރޭލަށް އޮވެ އެވެ. 

ގާޒާއަށް އެހީ ފޯރުކޮށްދެވިދާނެ ކަމާ މެދު އުފެދިފައި އޮތް ނުތަނަވަސްކަމާ އެކު ވެސް ފާއިތުވެދިޔަ މަދު ދުވަސްތަކެއްގައި ތުރުކީ، ޔޫއޭއީ، އުރުދުން، އަދި ޓިއުނީޝިއާއިން ފޮނުވި އެހީގެ އަށް މަތިންދާބޯޓެއް ވަނީ މިސުރުގެ އަލް އާރިޝް އެއާޕޯޓަށް ޖައްސާފަ އެވެ. މި ބޯޓުތަކުން 100 އަށް ވުރެ ގިނަ ލޮރީގެ އެހީގެ ސާމާނު ހިމެނޭ ކަމަށް މިސުރުގެ ރެޑް ކްރެސެންޓުން ބުނެ އެވެ.

ކާބޯތަކެއްޗާއި ސިއްހީ ސަޕްލައިތައް ފަދަ ފުރާނަ ސަލާމަތް ކުރުމަށް ބޭނުންވާ ސާމާނުތައް އދ.ގެ އެޖެންސީތަކުން ވަނީ މިސުރު-ގާޒާގެ ބޯޑަރަށް އެއްކުރަން ފަށައިފަ އެވެ.

ދުނިޔޭގެ ސިއްހަތު ޖަމިއްޔާ، ޑަބްލިއުއެޗްއޯއިން ވަނީ އާދިއްތަ ދުވަހު 78 ކިއުބިކް މީޓަރުގެ ޒަރޫރީ މެޑިކަލް ސަޕްލައި އަލް އާރިޝް އެއާޕޯޓަށް ފޮނުވައިފަ އެވެ. މިއީ 300،000 މީހުންނަށް ފުދޭނެ މިންވަރެކެވެ. އަދި ވޯލްޑް ފުޑް ޕްރޮގްރާމް (ޑަބްލިއުއެފްޕީ) އިން ވަނީ އާދިއްތަ އާއި ހޯމަ ދުވަހު ދުބާއީ މެދުވެރިކޮށް 20 ޓަނުގެ ބިސްކޯދާއި ދެ މޯބައިލް ސްޓޮރޭޖް ޔުނިޓް މިސުރަށް ފޮނުވައިފަ އެވެ. 

މީގެ އިތުރުން ޔުނިސެފް އިން ފޮނުވި ފެންފުޅި، ފެން ސާފުކުރާ ޕިއުރިފަޔާ، ބޭސް، ރަޖާ، ހައިޖީން ކިޓްސް އަދި އެހެނިހެން މެޑިކަލް އަދި ސިއްހީ ސަޕްލައިތައް ހިމެނޭ ޕެކޭޖުތައް މިސުރުގެ ބޯޑަރަށް މި ހަފުތާގައި ފޯރާނެ ކަމަށް ބެލެވެ އެވެ.

"ބޯޑަރުތައް ހުޅުވާނެ އިރެއް ނޭނގެ. ބޯޑަރަށް އެހީގެ ސާމާނު އަންނަނީ ފުނިޖެހެމުން. މިތަނާ މާ ދުރު ނޫން ހިސާބެއްގައި ތިބި މީހުން މި އެހީތަކަށް ވަނީ ބޭނުންވެފައި. އެމީހުން ތިބީ ބަނޑަށް،" ޑަބްލިއުއެފްޕީގެ ތަރުޖަމާނު އަބީރު އިއްތިފާ އަލްޖަޒީރާއަށް ވިދާޅުވި އެވެ.

"ގާޒާގައި ހުރި ސަޕްލައިތައް ވަނީ ހުސްވާން ކައިރިވެފައި. އެހެންވެ ގޯސްވެފައިވާ  ހާލަތެއް އިތުރަށް ގޯސްވިޔަ ނުދިނުމަށް ކޮންމެހެން ބޭނުންވާ އެހީތައް ވެއްދޭނެ ގޮތްތަކެއް ހެދުން މުހިންމު."

ގާޒާގެ ރައްޔިތުންނަށް ކުރިމަތިވެފައިވާ ބިރުވެރި ހާލަތާ އެކު ވެސް ގާޒާއަށް އެހީ ފޯރުކޮށްދިނުމަށް އެހީތެރިވެ ނުދޭނެ ކަމަށް އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ވަނީ ވިދާޅުވެފަ އެވެ.

މިކަމަށް ހައްލެއް ހޯދަން މަޝްވަރާ ކުރުމަށް އދ.ގެ އިންސާނީ އެހީއާ ގުޅޭ ވެރިޔާ މާޓިން ގްރިފިތުސް އަންގާރަ ދުވަހު ވަނީ މެދުއިރުމައްޗަށް ވަޑައިގެންފަ އެވެ.