އުތުރު ކޮރެއާގެ މިސައިލުތައް ރަޝިޔާގެ އަސްކަރިއްޔާ އަށް ދައްކާލައިފި

އުތުރު ކޮރެއާގެ ލީޑަރު ކިމް ޖޮންގް އުން އެ ގައުމުގެ އެންމެ ފަހުގެ ހަތިޔާރުތައް ރަޝިޔާ އަސްކަރިއްޔާގެ ވެރިޔާއަށް އިއްޔެ ދައްކާލައްވައިފި އެވެ.

ކިމް މި ހަތިޔާރުތައް ދައްކާލެއްވީ ޕްޔޯންގްޔޭންގުން ރަޝިޔާ އާއި ޗައިނާގެ ވަފުދަކަށް ދިން ދައުވަތަކާ ގުޅިގެން ޝޮއިގޫ އުތުރު ކޮރެއާއަށް މިހާރު ކުރައްވަމުން ގެންދަވާ ދަތުރުފުޅުގަ އެވެ. 

ދެ ކޮރެއާގެ ހަނގުރާމަ ނިމުނުތާ 70 އަހަރު ފާހަގަކުރުމަށް ބާއްވާ ހަރަކާތްތައް ވެސް ރަޝިޔާ އާއި ޗައިނާގެ ވަފުދުން ބަލާލުމަށް ވަނީ ހަމަޖެހިފަ އެވެ. މި މުނާސަބަތާ ދިމާކޮށް އާންމުކޮށް އުތުރު ކޮރެއާގައި ކުރިއަށް ގެންދަނީ އަސްކަރީ ޕެރޭޑުތަކެކެވެ.

މި ޕެރޭޑުގެ ތެރޭގައި ހްވާސޯންގް އިންޓަކޮންޓިނެންޓަލް ބެލިސްޓިކް މިސައިލު (އައިސީބީއެމް) ދައްކާލާނެ ކަމަށް ވަނީ ބެލެވިފަ އެވެ. ކާމިޔާބުކަމާ އެކު މިދިޔަ އޭޕްރިލް މަހު ޓެސްޓު ކޮށްފައިވާ މި އައިސީބީއެމް އަކީ އުތުރު ކޮރެއާއިން އުފެއްދި ފުރަތަމަ ސޮލިޑް-ފިއުލް ބޭނުންކުރާ ހަތިޔާރެވެ. މިފަދަ ހަތިޔާރު ލިކުއިޑް-ފިއުލް އަށް ވުރެ އަވަހަށް ލޯންޗު ކުރެވެ އެވެ.

ރަޝިޔާ އަސްކަރިއްޔާގެ ލީޑަރު ޝޮއިގޫ އުތުރު ކޮރެއާއަށް ވަޑައިގެންފައި މިވަނީ ޔޫކްރެއިނު ހަނގުރާމައިގައި ރަޝިޔާއަށް ބޭނުންވާ ބައެއް ހަތިޔާރު އުތުރު ކޮރެއާއިން ފޯރުކޮށްދެމުންދާ ކަމަށް ބައެއް ފަރާތްތަކުން ތުހުމަތު ކުރަމުން ދަނިކޮށެވެ. ނަމަވެސް މި ތުހުމަތުތައް މޮސްކޯ އާއި ޕްޔޯންގްޔޭންގުން ވަނީ ދޮގުކޮށްފަ އެވެ.

އުތުރު ކޮރެއާ ސަރުކާރުގެ ކޭސީއެންއޭ ނޫސް އެޖެންސީ އިން ރިޕޯޓުކޮށްފައިވާ ގޮތުގައި ކިމް އާއި ޝޮއިގޫ ވަނީ ބައިނަލްއަގްވާމީ މައިދާނުގައި ގައުމީ ސަލާމަތާއި "ދެ ގައުމުގެ މަސްލަހަތު ހިމެނޭ" ކަންކަމާ މެދު މަޝްވަރާ ކުރައްވައިފަ އެވެ. މި ބައްދަލުވުމުގައި ޝޮއިގޫ ވަނީ ރަޝިޔާގެ ރައީސް ވްލަޑިމިއާ ޕޫޓިން ސޮއި ކުރައްވާފައިވާ ސިޓީފުޅެއް ކިމް އަށް އަރުވާފަ އެވެ. އަދި ޗައިނާގެ ވަފުދުގައި ހިމެނިވަޑައިގަންނަވާ ޕޮލިޓްބުރޯގެ މެމްބަރު ލީ ހޮންގްޝޮންގް ވެސް ވަނީ ޗައިނާގެ ރައީސް ޝީ ޖިންގްޕިންގްގެ ސިޓީފުޅެއް ކިމްއާ ހަވާލުކުރައްވާފަ އެވެ.

"ކޮރެއާއަށް ނަސްރު ހޯދާދިނުމަށް ޗައިނީސް ޕީޕަލްސް ވޮލަންޓިއާސް އިން ވި ގުރުބާނީ ކޮރެއާގެ ރައްޔިތުން ދުވަހަކު ވެސް ހަނދާން ނުނެތޭނޭ" ކަމަށް މި ބައްދަލުވުމުގައި ކިމް ވިދާޅުވި ކަމަށް ކޭސީއެންއޭ އިން ބުނެފައިވެ އެވެ.

ކޮމިއުނިޒަމް އާއި ޑިމޮކްރަސީއާ ދެމެދު ކުރެވުނު ހަނގުރާމައެއް ގޮތަށް ބެލެވިފައިވާ ކޮރެއާ ހަނގުރާމައިގައި، ކޮމިއުނިޒަމް އަށް ތާއީދު ކުރާ އުތުރު ކޮރެއާއަށް އެހީތެރިވުމަށް ބެއިޖިންގް އިން 1950 ވަނަ އަހަރު އަސްކަރީ ސިފައިން ފޮނުވި އެވެ. އަދި އޭރު ކޮމިއުނިސްޓު ރޫސީވިލާތުން ވެސް ތާއީދު ކުރަމުން ގޮސްފައި ވަނީ އުތުރު ކޮރެއާ އަށެވެ.

އެހެންކަމުން ރަޝިޔާ އާއި ޗައިނާ އިން އުތުރު ކޮރެއާއާ އެކު ގާތް ގުޅުންތަކެއް ބާއްވާތާ ޒަމާންތަކެއް ވެއްޖެ އެވެ.

ދެ ކޮރެއާ ދެމެދު ހަމަލާތައް ބަދަލުކުރުން 1953 ގައި ހުއްޓާލާފައިވީ ނަމަވެސް ދެ ގައުމުގެ ދެމެދުގައި ސުލްހައިގެ އެއްބަސްވުމެއް އަދިވެސް ގާއިމުކޮށްފައެއް ނުވެ އެވެ.