ގްރީސްގެ ރޭލު އެކްސިޑެންޓާ ގުޅިގެން ބޮޑުވަޒީރު މައާފަށް އެދިވަޑައިގެންފި

ގްރީސްގައި ހިނގި ރޭލު އެކްސިޑެންޓުގައި މަރުވި 57 މީހުންގެ އާއިލާގެ ފަރާތުން ބޮޑުވަޒީރު ކައިރިއަކޯސް މިޓްސޮޓަކީސް މައާފަށް އެދިވަޑައިގެންފި އެވެ. 

ފޭސްބުކްގައި މިޓްސޮޓަކީސް ލިޔުއްވާފައިވާ މެސެޖުގައި ވިދާޅުވީ "ގްރީސްގައި 2023 ވަނަ އަހަރު، ދެކޮޅަށް ދުއްވަމުންދާ ދެ ރޭލު އެއް މަގެއްގައި ދުއްވަމުން ދާއިރު އެއްވެސް މީހަކަށް ނޭނގި ހުރެގެނެއް ނުވާނެ" ކަމަށެވެ.  

މި ރޭލު އެކްސިޑެންޓާ ގުޅިގެން މިހާތަނަށް ގިނަ މުޒާހަރާތަކެއް ގްރީސްގައި ވަނީ ކުރިއަށް ގެންގޮސްފަ އެވެ. އެގޮތުން އިއްޔެ ވެރިރަށް އެތެންސްގައި އެތައް ހާސް ބަޔަކު އެއްވެ ކުރިއަށް ގެންދިޔަ މުޒާހަރާއެއްގައި ފުލުހުންނާ ކުރިމަތިލުންތަކެއް ވެސް ވަނީ ހިނގައިފަ އެވެ. މި މުޒާހަރާގައި 12،000 މީހުން ބައިވެރިވި ކަމަށް ފުލުހުން އަންދާޒާ ކުރެ އެވެ. 

ނިއުސް އެޖެންސީ، އޭއެފްޕީން ރިޕޯޓުކޮށްފައިވާ ގޮތުގައި މި މުޒާހަރާގައި ހަތް ފުލުހަކަށް އަނިޔާވެ، ފަސް މީހަކު ވަނީ ހައްޔަރުކޮށްފަ އެވެ. މުޒާހަރާކުރި ބައެއް މީހުން ވަނީ ކުނިވަށިތަކުގައި ރޯކޮށް ޕެޓްރޯލު ބޮންތައް އުކާ ހަދައިފަ އެވެ. ރައްދުގައި ފުލުހުން ވަނީ ކަރުނަ ގޭހާއި ސްޓަން ގްރެނޭޑު ބޭނުންކޮށް މަދު މިނެޓުކޮޅެއްގެ ތެރޭ ސިންޓަގްމާ ސްކޮއާ ހުސްކޮށްފަ އެވެ. 

މިދިޔަ މަހު 28 ވަނަ ދުވަހުގެ ރޭ ގްރީސްގައި މި ހާދިސާ ހިނގާފައިވަނީ ފަސިންޖަރުންގެ ރޭލަކާއި މުދާ ބަރުކޮށްފައިވާ ރޭލެއް ޖެހި އެކްސިޑެންޓު ވެގެންނެވެ. އެކްސިޑެންޓާ އެކު ފަސިންޖަރުން ތިބި ރޭލުގެ ފުރަތަމަ ހަތަރު ކާރު މަގުން ކައްސާލި އިރު ފުރަތަމަ ދެ ކާރުގައި ވަރަށް ބޮޑަށް އަލިފާން ރޯވެ، ގާތްގަނޑަކަށް މުޅީން ހެން ވަނީ ހަލާކުވެފަ އެވެ. 

މި ހާދިސާ ހިނގަން މެދުވެރިވީ މީހަކަށް ހެދުނު ގޯހަކުން ކަމަށް ފުލުހުންގެ އިދާރާތަކުން ވަނީ ބުނެފަ އެވެ. އަދި ލެރިއްސާގައި ދިރިއުޅެމުން އަންނަ 59 އަހަރުގެ ސްޓޭޝަން މާސްޓަރެއް ވަނީ މި އެކްސިޑެންޓާ ގުޅިގެން ފުލުހުން ހައްޔަރުކޮށްފަ އެވެ. މި އެކްސިޑެންޓުގެ ޒިންމާ އޮތް ކަމަށް އޭނާ އިއުތިރާފުވާ ކަމަށް އޭނާގެ ވަކީލު ވަނީ ވިދާޅުވެފަ އެވެ. 

ނަމަވެސް މި ކާރިސާ ހިނގަން މެދުވެރިވީ އެތައް އަހަރެއް ވަންދެން ސަރުކާރުން ރޭލާ ބެހޭ ސިނާއަތަށް ފަރުވާކުޑަ ކުރަމުން ދިޔުމުން ކަމަށް އާންމުންގެ ގިނަ ބަޔަކު ދެކެ އެވެ. އަދި ރޭލު ސިނާއަތަށް ކަނޑައެޅޭ ބަޖެޓު މަދުވެފައި ވަނީ 2010 ވަނަ އަހަރު ގްރީސް އަށް ކުރިމަތިވި އިގްތިސާދީ ހީނަރު ކަމާ އެކު ބައިނަލްއަގްވާމީ މުޖުތަމައުއިން އެގައުމަށް ފޯރުކޮށް ދިން ލޯނުތަކުގެ ޝަރުތުތައް ހަރުކަށިވުމުން ކަމަށް ސަރުކާރުގެ ވަޒީރަކު ވަނީ ބީބީސީ ނޫހަށް މައުލޫމާތު ދެއްވާފަ އެވެ. 

މި ކާރިސާގައި މަރުވި މީހުންނަށް "އިހްތިރާމު އަދާކުރުމުގެ ގޮތުން" ގްރީކުގެ ޓްރާންސްޕޯޓާ ބެހޭ ވަޒީރު ކޮސްޓާސް ކަރަމަންލިސް ވަނީ އިސްތިއުފާ ދެއްވާފަ އެވެ. ގައުމުގެ ރޭލު ނިޒާމު ސަރުކާރުން ތަރައްގީ ނުކުރުމުގެ ޒިންމާ ނަންގަވާ ކަމަށް ތިން އަހަރާއި ބައި ވަންދެން ޓްރާންސްޕޯޓު ވަޒީރުކަން ކުރެއްވި ކަރަންމަލިސް ވަނީ ވިދާޅުވެފަ އެވެ. 

މި ހާދިސާއާ ގުޅިގެން ގްރީކު ސަރުކާރުން ވަނީ ތިން ދުވަސް ވަންދެން ގައުމީ ހިތާމަފާޅު ކުރުން ފާހަގަކޮށްފަ އެވެ. އަދި މަރުވި މީހުންގެ ޖަނާޒާތަކަށް ދާ ހަރަދުތަކާ ހަވާލުވުމަށް ވެސް ސަރުކާރުން ވަނީ ނިންމައިފަ އެވެ.