ލެވަންޑޮވްސްކީ 50 މިލިއަން ޑޮލަރަށް ބާސެލޯނާއަށް

ޖަރުމަންގެ ބަޔާން މިޔުނިކަށް މިދިއަ އަށް އަހަރު ގިނަ ލަނޑުތަކެއް ޖަހައިދީ، ބޮޑެތި ކާމިޔާބީތަކާ ހަމައަށް ގެންގޮސްދިން ޕޯލެންޑްގެ ވަރުގަދަ ފޯވަޑް ރޮބަޓް ލެވަންޑޮވްސްކީ އެންމެ ފަހުން 50 މިލިއަން ޑޮލަރުގެ ޓްރާންސްފާއެއްގައި، ބާސެލޯނާއަށް ބަދަލުވެއްޖެ އެވެ.

ބަޔާންއާ އެކު ހަދާފައިވާ އޮތް އެއްބަސްވުމުގައި ބާކީ އެއް އަހަރު އޮއްވާ 33 އަހަރުގެ ކުޅުންތެރިޔާ ސްޕެއިންގެ ވަރުގަދަ ބާރަށް ބަދަލުވީ ހަތަރު އަހަރުގެ އެއްބަސްވުމެއްގެ ދަށުންނެވެ. "ބަޔާންއާ އެކު އަހަރެންގެ އޮތް ވާހަކަ މިހާރު ވަނީ ނިމިފައި" ކަމަށް މިދިއަ މޭ މަހު އިއުލާންކުރި ލެވަންޑޮވްސްކީގެ ހަޔާތުގައި، އެއްބަސްވުން ފުރިހަމަވުމުގެ ކުރިން ކްލަބަށް މަޖުބުރުކޮށްގެން މީގެ ކުރިން ވެސް އެހެން ކްލަބަކަށް ބަދަލުވެފައިވެ އެވެ؛ ޖަރުމަންގެ ބޮރޫޝިއާ ޑޯޓްމުންޑުން ބަޔާން މިޔުނިކަށް 2014 ގަ އެވެ.

މިދިއަ އަށް އަހަރު ޖެހިޖެހިގެން އަށް ފަހަރު ބަޔާނަށް ބުންޑެސްލީގާ ކާމިޔާބުކޮށްދިނުމުގައި ލެވަންޑޮވްސްކީގެ ރޯލް މުހިންމެވެ. އޭނާ ވަނީ ޖަރުމަނުގެ ގަދަ ބާރުގެ ތާރީހުގައި ވެސް އެންމެ ގިނަ ލަނޑު ޖެހި ކުޅުންތެރިޔާގެ މަގާމު ހޯދައިފަ އެވެ.

އެމެރިކާއަށް ބާސެލޯނާ މިހާރު ގޮސްގެން އުޅޭ ދަތުރުގައި ލެވަންޑޮވްސްކީ ވަނީ ޓީމާ ގުޅިފަ އެވެ.

"އެންމެ ފަހުން އަހަރެން މިހުރީ މިތަނުގައި. ބާސެލޯނާއަށް ދެވުމަކީ އަހަންނަށް ވަރަށް ބޮޑު އުފަލެއް،" ފޯވަޑް ބުންޏެވެ.

"މިދިއަ ދެތިން ދުވަސް މިދިއައީ ވަރަށް ދިގުކޮށް، އެކަމަކު އެއްބަސްވުމަކާ ހަމައަށް މި އޮތީ ދެވިފައި. މިހާރު އަހަންނަށް އޮތީ އާ ޗެޕްޓާއަށާއި ގޮންޖެހުންތަކަށް ކުރިމަތިލުން."

އޭނާ ބުނި ގޮތުގައި ސްޕެއިންގެ ލަ ލީގާގައި ކުޅުމަކީ އޭނާގެ އަބަދުގެ ވެސް އުއްމީދެކެވެ. އެހެންކަމުން ބާސެލޯނާއަށް އެ ކްލަބްގެ ކުރީގެ މަގާމު ހޯދައިދީ، ވީހާވެސް ގިނަ ތަށިތަކެއް ކާމިޔާބުކުރުމުގެ އަޒުމް އެބަ އޮތް ކަމަށް ވެސް ބުންޏެވެ.

މިދިއަ ސީޒަންގައި ލެވަންޑޮވްސްކީ ވަނީ 46 މެޗުގައި ބަޔާނަށް 50 ލަނޑު ޖަހައިދީފަ އެވެ. އަށް އަހަރުގެ ތެރޭގައި މުޅި ޖުމްލަ 474 މެޗު ކުޅެ 344 ލަނޑު ކާމިޔާބުކުރި އެވެ.