ސައުދީގައި 2034ގެ ވޯލްޑް ކަޕް ބާއްވަން ފީފާއިން ނިންމައިފި

ސައުދީ އަރަބިއްޔާއާ ދެކޮޅަށް ބައެއް ފަރާތްތަކުން އަޑުތައް އެރުވި ނަމަވެސް 2034ގެ ވޯލްޑް ކަޕް އެ ގައުމުގައި ބާއްވަން ދުނިޔޭގެ ފުޓްބޯޅަ އިދާރާ، ފީފާއިން ނިންމައި، އެކަން މިރޭ އިއުލާންކޮށްފި އެވެ.

މީގެ 10 އަހަރު ފަހުން ވޯލްޑް ކަޕް ބާއްވާ ގައުމަކަށް ސައުދީ ކަނޑައެޅި އިރު 2030ގެ ވޯލްޑް ކަޕް ބާއްވަނީ ގުޅިފައިވާ ބިޑްތަކެއްގައި ސްޕެއިން އާއި ޕޯޗުގަލް އަދި މޮރޮކޯގަ އެވެ.

އޭގެ އިތުރުން ވޯލްޑް ކަޕްއަށް 100 އަހަރު ފުރުން ފާހަގަކުރުމުގެ ގޮތުން 2030ގެ  މުބާރާތުގެ ތިން މެޗެއް އާޖެންޓީނާ އާއި ޕެރަގުއޭ އަދި އުރުގުއޭގައި ވެސް ބާއްވަން ފީފާއިން ނިންމި އެވެ.

ފީފާގެ ނިންމުންތައް މި އައީ ސައުދީގެ ވެރިރަށް ރިޔާޒުގައި ކުރިއަށް ގެންދިޔަ އެ ޖަމިއްޔާގެ އެކްސްޓައޯޑިނަރީ ބައްދަލުވުމުގައި ނެގި ވޯޓަށް ފަހު އެވެ.

ވީޑިއޯ ލިންކް މެދުވެރިކޮށް ބޭއްވި މި ކޮންގްރެސްގައި ފީފާގެ މެމްބަރު 211 ގައުމުން ބައިވެރިވި އެވެ.

ވޯލްޑް ކަޕް 2034ގެ ބިޑިންގެ ކަންކަން ދިޔަ ގޮތާ މެދު ނޯވޭ ހިތްހަމައެއް ނުޖެހެ އެވެ. އެހެންކަމުން 2034ގެ ވޯލްޑް ކަޕް ބާއްވާ ގައުމަކަށް ސައުދީ ކަނޑައަޅަން ބޭއްވި ވޯޓުގައި އެ ގައުމުން ބައިވެރިއެއް ނުވެ އެވެ. އެއީ ސައުދީއާ ދެކޮޅަށް ކުރި ކަމެއް ނޫން ކަމަށާއި ބިޑިންގައި ހުރި މައްސަލަތަކަކާ ގުޅިގެން ނިންމި ނިންމުމެއް ކަމަށް، ނޯވޭގެ ފުޓްބޯލް އެސޯސިއޭޝަނުން ބުންޏެވެ.

ވޯލްޑް ކަޕް ބޭއްވުމުގެ ފުރުސަތު ސައުދީއަށް މި ލިބުނީ އެންމެ ފަހު ވޯލްޑް ކަޕް، މެދުއިރުމަތީގެ ގައުމެއް ކަމަށްވާ ކުޑަކުޑަ ގަތަރުގައި ވަރަށް ކާމިޔާބުކަމާ އެކު ބާއްވާފައި ވަނިކޮށެވެ.

ސައުދީގައި އެ މުބާރާތް ބާއްވަން ދެކޮޅުހަދާ ފަރާތްތަކުން ދައްކާ އުޒުރަކީ ސައުދީ ސަރުކާރުން އިންސާނީ ހައްގުތަކަށް ހުރުމަތްތެރިކޮށް ނުހިތުމެވެ. ކުޅިވަރުގެ ތަރައްގީއަށް އެތައް ސަތޭކަ މިލިއަން ޑޮލަރެއް ހޭދަކުރަނީ އެކަން ފޮރުވަން ކަމަށް، ބައެއް މީހުން ބުނެ އެވެ.

ސައުދީން އިންސާނީ ހައްގުތައް ރައްކާތެރިކުރާ މިންވަރު އެ ޖަމިއްޔާއިން ބަލާނެ ކަމުގެ ޔަގީންކަން ފީފާއިން ދިނެވެ.

ސައުދީގައި ވޯލްޑް ކަޕް މެޗުތައް ކުޅެން 15 ސްޓޭޑިއަމެއް އަޅާނެ އެވެ. އޭގެ ތެރޭގައި މިހާރު ހަދާފައި ހުރި ހަތަރު ސްޓޭޑިއަމް ވެސް ހިމެނެ އެވެ.