އެމްބާޕޭއަށް ޗެމްޕިއަންސް ލީގުގެ 50 ލަނޑު ހަމަވުމާ އެކު އަނިޔާވެގެން ޖެހުނީ ބާލަން

ޗެމްޕިއަންސް ލީގުގައި އެންމެ ފަހުން ކުޅުނު ދެ މެޗުން ބަލިވެ ހާސްކަމުގެ ތެރޭގައި އޮތް ރެއާލް މެޑްރިޑަށް އެ ޓީމުގެ ތަރި ކީލިއަން އެމްބާޕޭ ޖެހި ލަނޑާ އެކު ރޭ އިޓަލީގެ އެޓަލަންޓާގެ މައްޗަށް 3-2 އިން ކާމިޔާބު ހޯދައިފި އެވެ.

މިއީ ނޮކްއައުޓް ސްޓޭޖުން ވެސް ޖާގަ ނުލިބުމުގެ ފުރުސަތު ކުރިމަތިވެފައި އޮތް އެންމެ ފަހުގެ ޗެމްޕިއަނުންނަށް ހަމަޖެހުމުގެ ނޭވާއެއް ވެސް ލެވުނު ނަތީޖާއެކެވެ.

ރޭ ސްޕެއިންގެ ޖިރޯނާއާ ވާދަކޮށް މުހައްމަދު ސަލާހު ޖެހި ހަމައެކަނި ލަނޑުން މޮޅުވެ ލިވަޕޫލް ވަނީ ޗެމްޕިއަންސް ލީގުގައި ބަލިނުވެ ދަމަހައްޓާ ރެކޯޑް ހިފަހައްޓައިފަ އެވެ. މިހާތަނަށް ކުޅުނު ހަ މެޗުން މޮޅުވި ހަމައެކަނި ޓީމަކީ ލިވަޕޫލް އެވެ.

ސަލާހު ލަނޑު ޖެހީ ފަހު ހާފުގައި ލިބުނު ޕެނެލްޓީއަކުންނެވެ.

ރެއާލް މެޑްރިޑްގެ މެޗުގެ ފުރަތަމަ ލަނޑު 10 ވަނަ މިނިޓްގައި ކާމިޔާބުކޮށްދިން އެމްބާޕޭގެ ފަޔަށް ލިބުނު އަނިޔާއަކާ ގުޅިގެން 36 ވަނަ މިނިޓްގައި އޭނާ ޖެހުނީ ބާލާށެވެ.

މިއީ ޗެމްޕިއަންސް ލީގުގައި އެމްބާޕޭގެ ތާރީހީ 50 ވަނަ ލަނޑެވެ. ޗެމްޕިއަންސް ލީގުގައި 72 މެޗު ކުޅެ އެހާ ގިނަ އަދަދެއްގެ ލަނޑު ޖަހައި، އޭނާ ތާރީހުގެ ތެރެއަށް ވަނީ އެ އަދަދު ހާސިލްކުރި ދެވަނައަށް އެންމެ ޒުވާން ކުޅުންތެރިޔާގެ ގޮތުގަ އެވެ. އުމުރުން 25 އަހަރުގެ އެމްބާޕޭއަށް ވުރެ ޒުވާން ކުޅުންތެރިޔަކީ 24 އަހަރުގައި 50 ލަނޑު ހަމަކުރި ލިއޮނެލް މެސީ އެވެ.

ވިނީޝިއަސް ޖޫނިއާ އާއި ޖޫޑް ބެލިހަމްގެ ދެ ލަނޑުން މޮޅުވުމާ އެކު ރެއާލް މިހާރު އޮތީ ނުވަ ޕޮއިންޓާ އެކު 18 ވަނައިގަ އެވެ. އެއީ ގަދަ އަށެއްގައި އޮތް ބަޔާން މިޔުނިކަށް ވުރެ ތިން ޕޮއިންޓް ދަށް އަދަދެކެވެ.

ޗެމްޕިއަންސް ލީގުގެ އާ ފޯމެޓްގައި އޮޓޮމެޓިކުން ދެވަނަ ބުރަށް ދާނީ 36 ޓީމު ވާދަކުރާ ލީގު ބުރުން އެންމެ ގިނަ ޕޮއިންޓް ހޯދާ އަށް ޓީމެވެ. ނުވަވަނައިން ފެށިގެން 24 ވަނައާ ދެމެދުން ޖާގަ ލިބޭ ޓީމުތައް ކުޅޭނީ ދެ ލެގް ހިމެނޭ ޕްލޭ އޮފް މެޗުތަކެކެވެ.