މިދިއަ ސީޒަންގައި އާސެނަލް އާއި މެންޗެސްޓަ ޔުނައިޓެޑް ބައްދަލުކުރި މެޗެއްގައި އާސެނަލްގެ ބުކާޔޯ ސަކާ ގޯލަށް ބޯޅައެއް ފޮނުވާލަނީ
އާސެނަލް އާއި ޔުނައިޓެޑްގެ ބޮޑު ރޭ: ދެ ޓީމަށް ދެ އަމާޒެއް
ބީބީސީގެ ދިރާސާވެރިޔާ އަދި މެޗުތަކުގެ ނަތީޖާ ކުރިން ލަފާކުރުމުގައި ވެސް ފާހަގަކުރެވޭ ކްރިސް ހަޓަން ދެކޭ ގޮތުގައި މިރޭ މެންޗެސްޓަ ޔުނައިޓެޑް އަތުން 3-1 އިން އާސެނަލް މޮޅުވާނެ އެވެ.
އެކަމަކު އޭނާއާ އެކު ނަތީޖާ ލަފާކުރަން ދިން ދައުވަތު ގަބޫލުކޮށް ވާހަކަ ދެއްކި މިޔުޒިކް ކުޅުންތެރިޔާ ޖޭމްސް ރަޔާންގެ ނަތީޖާއަކީ 1-2 އިން ޔުނައިޓެޑް މޮޅުވާނެކަމެވެ.
މިއީ މިރޭ ރާއްޖޭގެ ގަޑިން 1:15ގައި އާސެނަލްގެ ދަނޑުގައި ފަށާ މެޗުގެ ވަރުގަދަ ވާދަވެރިކަމާ ބެހޭ ގޮތުން އެންމެ ދެ މީހެއްގެ ހިޔާލެވެ.
ލިވަޕޫލްއަށް ލީގު ޗެމްޕިއަންކަން ލިބުމަކީ ރަޔާން އެއްވެސް ވަރަކަށް އެދޭ ގޮތެއް ނޫނެވެ. ލިވަޕޫލް ބަލިކުރަން މެންޗެސްޓަ ސިޓީއަށް މިދިއަ އާދިއްތަދުވަހު ލިބުނު ފުރުސަތުގައި ވީ ނާކާމިޔާބެވެ. އެހެންކަމުން ރަޔާން ދެކޭ ގޮތުގައި ލިވަޕޫލްއާ ދެން ކިރިޔާ ވެސް ކައިރިކުރުމަކަށް ފުރުސަތު އެންމެ ބޮޑީ އާސެނަލްއަށެވެ.
ނަމަވެސް އޭނާއަކީ ޔުނައިޓެޑްގެ ދެގޮތެއް ނުވާ ސަޕޯޓަރެއްކަމުން ލިވަޕޫލްއާ މެދު އޮތް 'ނަފުރަތަށް' ވުރެ އާސެނަލް އަތުން ޔުނައިޓެޑް މޮޅުވާން އޮތް އެދުން މާ ބޮޑެވެ.
"އަހަރެންގެ ޓީމާ ދެކޮޅަށް އެއްޗެއް ބުނެވޭކަށް ނެތް. ހާއްސަކޮށް އަހަރެންގެ ޓީމު ބަލިވާތަން ބަލަން ކެތެއްނުވާނެ. އެހެންކަމުން އަހަރެން ބޭނުންވަނީ އާސެނަލް އަތުން މޮޅުވާން،" ރަޔާން ބުންޏެވެ.
ޕްރިމިއަ ލީގު ތާވަލްގައި އާސެނަލް އާއި ލިވަޕޫލް
-
1-
ލިވަޕޫލް، ކުޅުނު 13، ފައިދާ ގޯލް 18، ޕޮއިންޓް 34
-
2-
2 އާސެނަލް، ކުޅުނު 13، ފައިދާ ގޯލް 12، ޕޮއިންޓް 25
މެންޗެސްޓަ ޔުނައިޓެޑްގެ މަގާމު
8. ކުޅުނު 13، ފައިދާ ގޯލް 4، ޕޮއިންޓް 19
ލިވަޕޫލް އާއި އާސެނަލްއާ ދެމެދު ނުވަ ޕޮއިންޓްގެ ތަފާތެއް އޮތް އިރު ލީގުގެ ޗެމްޕިއަންކަމަށް ވާދަކުރަން އާސެނަލްއަށް މި ވަގުތު ލިބޭނެ އެންމެ ބޮޑު ހިތްވަރަކީ މިރޭ އަމިއްލަ ދަނޑުގައި ޔުނައިޓެޑް ބަލިކުރުމެވެ. މެޗު އެއްވަރުވެ ނުވަތަ ޔުނައިޓެޑްގެ އަތުން ބަލިވެއްޖެ ނަމަ ލިވަޕޫލްގެ ފަރަގު ކުޑަކުރަން އޮތް ގޮންޖެހުންތައް އަމިއްލަ ބާރަށް ވުރެ އެހެން ކްލަބްތަކުގެ ނަތީޖާގެ މައްޗަށް ފުރޮޅިދާނެ އެވެ.
އަނެއްކޮޅުން ޔުނައިޓެޑްގެ އާ ކޯޗު ރުބެން އަމޯރިމްގެ ފުރަތަމަ ވަރުގަދަ އިމްތިހާނަކީ ވެސް މިރޭގެ މެޗެވެ. މިދިއަ އާދިއްތަ ދުވަހު އޭނާގެ ކޯޗުކަމުގެ ދަށުން ކުޅުނު ފުރަތަމަ މެޗުގައި އެވަޓަންގެ މައްޗަށް ޔުނައިޓެޑް ވަނީ 4-0ގެ ތަފާތު ބޮޑު ނަތީޖާއެއް ހޯދައިފަ އެވެ. އެކަމަކު ތާވަލްގެ 17 ވަނާގައި އޮތް އެވަޓަންއަށް ވުރެ މިދިއަ ދެ ސީޒަންގެ ދެވަނާގައި އޮތް އާސެނަލްގެ މެޗުގެ އިމްތިހާން އޭނާއަށް ވެސް ބޮޑެވެ.
އަމޯރިމް ބޭނުންވަނީ ވަރުގަދަ ޓީމެއްގެ އަތުން މޮޅުވެގެން ޔުނައިޓެޑަށް އާ ދިރުމެއް ގެންނާށެވެ. އެހެެންކަމުން މިރޭގެ ހިފުމަކީ ޕްރިމިއަ ލީގުގެ ބެލުންތެރިންނަށް ވެސް ވަރަށް ޝައުގުވެރި ވާދަވެރިކަމަކަށް ވާނެ އެވެ.
ކޮމެންޓް