ދުނިޔޭގެ ހެވީވައިޓް ކުރީގެ ޗެމްޕިއަން މައިކް ޓައިސަން މިއަދު ވަނީ އޭނާއަށް ވުރެ 31 އަހަރު ހަގު ޖެކް ޕޯލްއާ ބޮކްސިން ތަޅާފައި
އެމެރިކާގެ ޓެކްސަސްގައި ހުންނަ އޭޓީއެންޓީގެ ބިޔަ ސްޓޭޑިއަމްގައި މިއަދު ހެނދުނު އޮތް ހެވީވެއިޓް ބޮކްސިން މެޗު މުޅިން ތަފާތެވެ. ކުރީގެ ދުނިޔޭގެ ޗެމްޕިއަން މައިކް ޓައިސަން އުމުރުން 58 އަހަރުގައި އެ ތެޅީ އޭނާއަށް ވުރެ 31 އަހަރު ހަގު ޖެކް ޕޯލްއާ އެވެ.
މި މެޗުގެ ކުރިން އިތުރު ތިން މެޗެއް، 70،000 މީހުންގެ ކުރިމަތީގައި ކުރިއަށް ގެންދިޔަ އެވެ. ނެޓްފްލިކްސް ލައިވްކުރި ފުރަތަމަ ކުޅިވަރު އިވެންޓް އެތައް މިލިއަން ބަޔަކު ވަގުތުން ބަލާފައިވެ އެވެ.
ޓައިސަންގެ ތެޅުން ކުރިއަށް ގެންދިޔައީ ކޮންމެ ބުރެއް ދެ މިނިޓަށް ދެމިގެންދާ ގޮތަށް ޖުމްލަ އަށް ބުރަށެވެ. މި މެޗުން ޓައިސަން މޮޅުވިޔަސް މޮޅުވާނީ ފުރަތަމަކޮޅު އޭނާގެ ބާރު ހަމަލާއަކުން ޕޯލްއަށް ނުތެދުވެވޭވަރު ކޮށްގެން ކަމަށް، ކުރިން ވެސް ބެލެވުނެވެ. އެގޮތަށް ޓައިސަން މަސައްކަތް ވެސް ކުރި އެވެ. ނަމަވެސް ޕޯލްގެ ޒުވާން އުމުރާއި ވަރުގަދަ ހަށިގަނޑު، ޓައިސަންއަށް ވާދަކުރެވޭ ވަރަށް ވުރެ މާ ތަފާތެވެ.
މުޅި މެޗުގައި ޓައިސަންއަށް ޕޯލްގެ ގައިގައި ޖެހުނީ 18 ފަހަރު އެވެ. އޭގެ ބަދަލުގައި ޕޯލް 78 ހަމަލާ ޓައިސަންގެ ގަޔަށް އަމާޒުވި އެވެ.
ޓައިސަން ބަލިވި ނަމަވެސް ގިނަ މީހުންނަށް އޭނާއަކީ ހިތްވަރެކެވެ. މެޗަށް ފަހު ޕޯލް ވެސް ބުނީ ޓައިސަންއަކީ ނަމޫނާއެއް ކަމަށެވެ. އޭނާ ދެކެ ޖެހިލުންވި ކަމަށާއި އޭނާގެ ބާރު ހަމަލާއެއް އަރާފާނެ ކަމަށް ވަރަށް ބޮޑަށް ވިސްނި ކަމަށް ވެސް ބުންޏެވެ.
"އަހަންނަށް ލިބުނު ވަރަށް ބޮޑު ޝަރަފެއް މައިކް ޓައިސަންއާ ތަޅަން ޖެހުމަކީ،" މެޗަށް ފަހު ވާހަކަ ދައްކަމުން ޕޯލް ބުންޏެވެ.
މި މެޗުން ޕޯލްއަށް 37 މިލިއަން ޑޮލަރު (570 މިލިއަން ރުފިޔާ) އަދި ޓައިސަންއަށް 18 މިލިއަން ޑޮލަރު (277 މިލިއަން ރުފިޔާ) ލިބުނު ކަމަށް މީޑިއާތަކުން ރިޕޯޓްކުރެ އެވެ.
ކޮމެންޓް (1)
ގުލްޗަންޕާ