ވަކިވަމުން ޖައުޝަން ވިދާޅުވީ ގަދަ ކަނޑުން އެފްއޭއެމް މިހާރު ސަލާމަތް ވެފައިވާ ކަމަށް

ދަރަނީގެ ސަބަބުން އަޑިއަށް ގޮސްފައި އޮތް ނަމަވެސް، އެފްއޭއެމްގެ ވަގުތީ ޖެނެރަލް ސެކްރެޓަރީގެ މަގާމުން އިއްޔެ ވަކިވެވަޑައިގެންނެވި މުހައްމަދު ޖައުޝަން ޝަރީފްގެ ފަހު މެސެޖް މުޅިން ތަފާތެވެ.

އޭނާ ސިފަކުރެއްވި ގޮތުގައި ގުޅިގެން މުވައްޒަފުން ކުރި ބުރަ މަސައްކަތާ އެކު މިހާރު އެފްއޭއެމް ވަނީ 'ގަދަ ކަނޑުން ސަލާމަތްވެ މަޑު ކަނޑަކާ ދިމައަށް މިސްރާބު ޖަހައިފަ' އެވެ.

އެކަމަކު އެފްއޭއެމްގެ މީޑިއާ ގްރޫޕަށް ޖައުޝަން ފޮނުއްވި ބަޔާނެއްގައި އެ ވިދާޅުވި 'މަޑު ކަނޑާ ހަމައަށް' އެފްއޭއެމް ދިޔަ އިރު ރާއްޖޭގެ ފުޓްބޯޅައިގެ މައި އިދާރާގައި 'ހަމާއި މަހުގެ އިތުރުން ކަށިގަނޑެއް ވެސް ނެތް' ކަމަށް، އެއް ބަޔަކު ދެކެ އެވެ.

އެފްއޭއެމްގެ ކުރީގެ ރައީސް އަދި ހިޔާނާތުގެ ތުހުމަތުތަކާ އެކު ފީފާއިން ނުވަ މަސް ދުވަހަށް ސަސްޕެންޑްކޮށްފައިވާ ބައްސާމް އަދީލް ޖަލީލުގެ މެނޭޖްމަންޓްގައި ވަގުތީ ޖެނެރަލް ސެކްރެޓަރީގެ މަގާމުގައި ޖައުޝަން ހޭދަކުރެއްވީ ވަރަށް މައްސަލަ ބޮޑު ދުވަސްތަކެކެވެ. އޭގެ ތެރޭގައި އެފްއޭއެމްގެ އަމިއްލަ އަސާސީ ގަވާއިދާ ހިލާފަށް ބާއްވަން އުޅުނު ދެ އިންތިހާބު ހިމެނެ އެވެ. 

އެ ދެ އިންތިހާބު ވެސް ވަނީ ފީފާ އާއި އޭއެފްސީން ހުއްޓުވައިފަ އެވެ. މިހާރު އެފްއޭއެމް ހިންގަމުން އަންނަނީ ފީފާއިން ކަނޑައެޅި ނޯމަލައިޒޭޝަން ކޮމިޓީއަކުންނެވެ. އެ ކޮމިޓީން އަލަށް ޖެނެރަލް ސެކްޓަރީގެ މަގާމު ދިނީ އުމުރުން 24 އަހަރުގެ ނާހިލް އަހުމަދު ސިއްދީގަށެވެ. އޭނާ ވަނީ ކުރިން އެފްއޭއެމްގައި މަސައްކަތްކުރައްވައިފަ އެވެ. އެކަމަކު އޭނާ އެންމެ ފަހުން ހުންނެވީ ސްޕޯޓްސް މިނިސްޓްރީގެ ޕޮލިޓިކަލް ޑައިރެކްޓަރުގެ މަގާމުގަ އެވެ.

ނޯމަލައިޒޭޝަން ކޮމިޓީން ސެޕްޓެމްބަރު މަހު ބޭއްވި ނޫސްވެރިންގެ ބައްދަލުވުމުގައި ބުނީ އެފްއޭއެމްގެ ދަރަނި 85 މިލިއަން ރުފިޔާއަށް ވެސް އަރާފާނެ ކަމަށެވެ.

"އަޅުގަނޑުމެން ފައްޓަން މިޖެހެނީ މައިނަސްއިން. މިވަގުތު އަޅުގަނޑުމެން ހަރަދެއް ކުރަން ބެލި ނަމަވެސް އެއްވެސް ހަރަދެއް ކުރެވޭނެ ގޮތެއް ނެތް. އެއްވެސް އެކައުންޓެއްގައި ފައިސާއެއް ވެސް ނެތް އަޅުގަނޑުމެން ހަވާލުވިއިރު،" އެ ކޮމިޓީގެ ޗެއާމަން އަދި ކުރީގެ ކުޅިވަރާ ބެހޭ މިނިސްޓަރު އަހުމަދު ޒުހޫރު، އެ ބައްދަލުވުމުގައި ވިދާޅުވި އެވެ.

އޭގެ އިތުރުން އޭނާ ސިފަކުރެއްވި ގޮތުގައި އެވަރުގެ އިދާރާއެއްގައި ހުންނަން ޖެހޭނެ އެއްވެސް ކަމެއް އެފްއޭއެމްގައި މި ވަގުތަކު ނެތެވެ.

"މި ކަމުގައި މަސައްކަތްކުރަން ޖެހިފައި އޮތީ ހަމައެކަނި ގަވާނަންސް ނޫނީ އެޑްމިނިސްޓްރޭޓިވް ލައިނަކުން ނޫން. އަޅުގަނޑުމެން ފޭސްކުރަން ޖެހިފައި މި އޮތީ ގަވާނަންސް، ލީގަލް، އެޑްމިނިސްޓްރޭޓިވް،  ޕޮލިސީ، މިހެން ގޮސް ކިޔާނެ ކަމެއް ނެތް،" ޖައުޝަން ވެސް އިންނެވި ނޫސްވެރިންގެ ބައްދަލުވުމުގައި ޒުހޫރު ވިދާޅުވި އެވެ.

ޖައުޝަން ވަކިވެވަޑައިގެންނެވި އިރު އޭނާ ވަނީ އެކި ގޮތްގޮތުން 17 ވަރަކަށް އަހަރު އެފްއޭއެމްގައި މަސައްކަތްކުރައްވައިފަ އެވެ. އެހެންކަމުން އޭނާއަށް ވަރަށް ބޮޑެތި ތަޖުރިބާތަކެއް ލިބިވަޑައިގެންނެވި ކަމަށް، ބަޔާންގައި ވިދާޅުވި އެވެ.