ގާޑިއޯލާގެ ދުވަސްދަނީތަ؟ ޖެހިޖެހިގެން ހަތަރު ވަަނަ ބަލި

އެހެން ކޯޗުންނަށް އެފަދަ ބައްޔެއް ދިމާވުމުން އާ ކަމަކަށް ނުވެދާނެ އެވެ. ނަމަވެސް  އިނގިރޭސި ޕްރިމިއަ ލީގުގައި ރޭ ބްރައިޓަން އަތުން މެންޗެސްޓަ ސިޓީ 2-1 އިން ބަލިވުމަކީ ކޯޗު ޕެޕް ގާޑިއޯލާގެ ހަޔާތުގައި އަދި މުޅިން އާ ކަމެކެވެ.

މިހާރު އުފެދޭ ސުވާލަކީ މިއީ އަނެއްކާ ގާޑިއޯލާގެ ވެއްޓުން ހެއްޔެވެ؟ ޖެހިޖެހިގެން ހަތަރު މެޗުން އޭނާގެ ޓީމެއް މިހާތަނަށް ބަލިވެފައެއް ނުވެ އެވެ. މިއީ 2016ގައި ސިޓީއާ ހަވާލުވެ މުޅިން އެހެން ފެންވަރަކަށް އެ ކްލަބް ގެންގޮސްދިން ކޯޗަށް އޮތް ވަރަށް ބޮޑު ކަންބޮޑުވުމެކެވެ.

ރޭ ފުރަތަމަ ލަނޑު ޖެހީ 23 ވަނަ މިނިޓްގައި އާލިން ހާލޭންޑެވެ. ނަމަވެސް މެޗު ނިމެން 12 މިނިޓަށް ވެފައި ވަނިކޮށް ދެ ލަނޑު ޖަހައި ބްރައިޓަން ލީޑު ނެގި އެވެ. ދެ ވަަނަ ލަނޑު ޖެހުމާ އެކު ގާޑިއޯލާގެ މޫނުމަތިން ވެސް ފެނުނީ ނާއުއްމީދެވެ.

މިދިއަ ހަތަރު އަހަރުގެ ޗެމްޕިއަން އަދި އޮތީ ތާވަލްގެ ދެވަނައިގަ އެވެ. ނަމަވެސް ބަލިވުން މި ގޮތަށް ކުރިއަށް ދާ ނަމަ އެ މަގާމު ވެސް ގެއްލުން އޮތީ ވަރަށް ކައިރީގަ އެވެ.

މިދިއަ ސީޒަންއަށް ބަލާ އިރު ސިޓީގެ ލަނޑު ޖެހުމުގެ ނިސްބަތް ވަނީ މެޗަކަށް 2.53 އިން ދޭކަށް ވެއްޓިފަ އެވެ. އިދިކޮޅު ގޯލަށް ދޭ ހަމަލާތައް މިދިއަ ސީޒަނަށް ވުރެ ގިނަ ނަމަވެސް ލަނޑަކަށް ބަދަލުކުރުމުގެ ގާބިލްކަން އަދި ފެންނަނީ ދަށްކޮށެވެ.

ލަނޑު ޖަހަން ބަލާ ނަމަ ހާލޭންޑަށް ބަރޯސާވާން ޖެހެ އެވެ. ނަމަވެސް އޭނާގެ އެ ގާބިލްކަން ވެސް މިދިއަ ސީޒަނަށް ވުރެ މިފަހަރު އަދި އުޅެނީ ގޯސްކޮށެވެ.

ބައެއް ދިރާސާވެރިން ބުނާ ގޮތުގައި މިޑްފީލްޑަރު ރޮޑްރީ ނެތުމަކީ ގާޑިއޯލާއަށް  ފޫނުބެއްދޭވަރުގެ ގެއްލުމެކެވެ. އަނިޔާގެ ސަބަބުން ރޮޑްރީއަށް ކުޅެން ނުކުމެވޭނެ ދުވަހެއް އަދި ނޭނގެ އެވެ.