ރޮޑްރީއަށް ފުޓްބޯޅައިގެ ޝަރަފުވެރި ބެލޮންޑިއޯ އެވޯޑް

ސްޕެއިންއަށް މި އަހަރުގެ ޔޫރޯ އާއި މެންޗެސްޓަ ސިޓީއަށް ޕްރިމިއަ ލީގު ކާމިޔާބުކޮށްދިނުމުގެ މުހިންމު ބައިވެރިއެއް ކަމަށްވާ ރޮޑްރީއަށް މި އަހަރުގެ ބެލޮންޑިއޯ އެވޯޑް ރޭ ލިބިއްޖެ އެވެ.

ނަމަވެސް އެ އުފާވެރި ރަސްމިއްޔާތު ވަނީ ސްޕެއިންގެ ވަރުގަދަ ބާރެއް ކަމަށްވާ ރެއާލް މެޑްރިޑުން ބޮއިކޮޓްކޮށްފަ އެވެ. އޭގެ ސަބަބަކީ އެ ޓީމުގެ ވިނީޝިއަސް ޖޫނިއާއަށް އެންމެ މޮޅު ކުޅުންތެރިޔާގެ އެވޯޑް ނުލިބޭކަން އެނގުމެވެ.

އެންމެ މޮޅު ކްލަބްގެ އެވޯޑް ލިބުނީ ރެއާލްއަށެވެ. އެންމެ މޮޅު ކޯޗުގެ އެވޯޑް ކާމިޔާބުކުރީ ސްޕެއިންގެ ލީގާއި ޗެމްޕިއަންސް ލީގުގެ ތަށި ރެއާލްއަށް ހޯދައިދިން ކާލޯ އަންޗޮލޮޓީ އެވެ.

އުމުރުން 28 އަހަރުގެ ރޮޑްރީއަކީ 1960ގެ ފަހުން ބެލޮންޑިއޯ ކާމިޔާބުކުރެވުނު ސްޕެއިންގެ ފުރަތަމަ ކުޅުންތެރިޔާ އެވެ. މިއީ މެންޗެސްޓަ ސިޓީގެ ކުޅުންތެރިޔަކަށް ވެސް ދުނިޔޭގެ އެންމެ މޮޅު ކުޅުންތެރިޔާގެ މަގާމު ލިބުނު ފުރަތަމަ ފަހަރެވެ.

"މިއީ އަހަންނާއި އަހަރެންގެ އާއިލާއަށް އަދި ކްލަބާއި މުޅި ގައުމަށް ވެސް އުފާވެރި ރެއެއް،" އެވޯޑާ ހަވާލުވުމަށް ފަހު ރޮޑްރީ ބުންޏެވެ.

ކަކުލަށް ލިބުނު އަނިޔާއަކަށް ބޭސްކުރަމުން އަންނަ ކުޅުންތެރިޔާ ސްޓޭޖަށް އެރީ ދަނޑިގަނޑުގެ އެހީގަ އެވެ. 

އޭނާ ބުނި ގޮތުގައި އެ ކާމިޔާބު ނިސްބަތްވަނީ ހަމައެކަނި އޭނާއަކަށް ނޫނެވެ. އޭނާގެ ގައުމަށާއި އެ ވޯޑް ހައްގު އެކަމަކު ނުލިބުނު އެތައް ކުޅުންތެރިންނަކަށް ވެސް އެއީ ކާމިޔާބީއެއް ކަމަށް ސިފަކުރި އެވެ. އެގޮތުން ފާހަގަކުރި ކުޅުންތެރިންގެ ތެރޭގައި ސްޕެއިންގެ ވަރުގަދަ ތަރިން ކަމަށްވާ ޒަވީ އާއި އިނެސްޓާ ހިމެނެ އެވެ.

ބެލޮންޑިއޯގެ އެވޯޑަށް މީހުން ކަނޑައަޅަނީ ފީފާގެ ރޭންކިންގެ ގަދަ 100 ގައުމުގެ ކުޅިވަރު ނޫސްވެރިންނެވެ.

ރޭގެ ހަފުލާގައި ވިނީޝިއަސް ދިޔައީ ދެވަނައަށެވެ. ތިންވަނަ މަގާމު ހޯދީ އިންގްލެންޑް އާއި ރެއާލްގެ މިޑްފީލްޑް ކުޅުންތެރިޔާ ޖޫޑް ބެލިންހަމް އެވެ. މިއީ 2005ގެ ފަހުން އިންގްްލެންޑްގެ ކުޅުންތެރިޔަކަށް އެހާ މަތިން ނިންމާލެވުނު ފަހަރު ވެސް މެ އެވެ. އެ އަހަރު ފްރޭންކް ލެމްޕާޑް ދިޔައީ ދެވަނަ އަށެވެ.