ވިނީޝިއަސްގެ މޮޅު ކުޅުމާ އެކު ސަޕޯޓަރުން ގޮވަން ފެށީ 'ބެލޮންޑިއޯ' ހައްގޭ

ރެއާލް މެޑްރިޑްގެ ދަނޑުގައި ޖަރުމަންގެ ބޮރޫޝިއާ ޑޯޓްމުންޑް ފުރަތަމަ ހާފުގައި ދެ ލަނޑު ޖަހައި ލީޑު ނެގީ ސަޕޯޓަރުން ސިއްސުވާލައިފަ އެވެ.

އެ ކުޅުމުގައި އިތުރު ގާތްގަނޑަކަށް ބައިގަޑިިއިރު ވެސް ހިފެހެއްޓި އެވެ. ނަމަވެސް އެންމެ ފަހުގެ ޗެމްޕިއަން ރެއާލް މެޑްރިޑްއަށް ގޮތެއް ހުހެއްނުވެ އެވެ. ވިނީޝިއަސް ޖޫނިއަ ހުރީ އޭނާގެ ހުރިހާ ދުވެއްޔަކާއި ފައިގެ ހުރިހާ އުކުޅެއް ބޭނުންކޮށްގެން ވެސް ނަތީޖާ ބަދަލުކޮށްލެވޭ ފެންވަރުގަ އެވެ.

ދިފާއި ކުޅުންތެރިޔާ އެންޓޯނިއޯ ރުޑިގާ 60 ވަނަ މިނިޓްގައި ޖެހި ލަނޑަށް، ވިނީޝިއަސް 62 ،86 އަދި 93 ވަނަ މިނިޓްގައި އިތުރުކޮށްދިނީ ހެޓްރިކެކެވެ.

ބިޔަ ދަނޑުގައި ތިބި ސަޕޯޓަރުން އެއް އަޑަކުން ގޮވަން ފެށީ އަންނަ ހޯމަދުވަހުގެ ރޭ އޮންނަ ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާގެ އެވޯޑް ނުވަތަ ބެލޮންޑިއޯ ހައްގީ އޭނާއަށް ކަމަށެވެ.

މެޗަށް ފަހު ވާހަކަ ދައްކަމުން ރެއާލްގެ ކޯޗު ކާލޯ އަންޗެލޮޓީ ބުނި ގޮތުގައި މިދިއަ ސީޒަންގައި ވިނީޝިއަސް ދެއްކި ކުޅުމަށް ބަލާއިރު ބެލޮންޑިއޯ ހައްގެވެ.

"އޭނާއަކީ އާދަޔާ ހިލާފު ޝަހުސިއްޔަތެއް،" އަންޗެލޮޓީ ބުންޏެވެ.

އުމުރުން 24 އަހަރުގެ ވިނީޝިއަސްއަކީ ދުނިޔޭގެ ފުޓްބޯޅައިގެ އެންމެ ޝަރަފުވެރި އެވޯޑް ކަމަށް ބެލެވޭ ބެލޮންޑިއޯ ލިބުން އެންމެ ކައިރި ކުޅުންތެރިޔާ ވެސް މެ އެވެ. އޭނާ ވަނީ ރެއާލްއަށް މިދިއަ ސީޒަންގެ ލަ ލީގާ އާއި ޗެމްޕިއަންސް ލީގު ހޯދައިދޭން މުހިންމު ދައުރެއް އަދާކޮށްފަ އެވެ. ފައިނަލްގައި ލަނޑު ޖެހި އެވެ. އެ މުބާރާތުގެ އެންމެ މޮޅު ކުޅުންތެރިޔަކަށް ހޮވުނީ ވެސް އޭނާ އެވެ.

ރޭގެ މެޗަށް ފަހު ވިނީޝިއަސް ބުނީ 'މުޅި އުމުރަށް ވެސް ހުންނާނީ އެ ކްލަބްގައި' ކަމަށެވެ.

ސަޕޯޓަރުންގެ ތަރުހީބުން އޭނާގެ ހިތް ފުރުނީ އެވެ.