އިލާންގެ ވާޖިބު އަދާކޮށްފި، އަސްލު ފެންވަރު ވަޒަންކޮށްލުން މާދަމާ

އިއްޔެ ޗައިނާގެ ދާލިއަންގައި ފެށި 17 އަހަރުން ދަށުގެ އޭޝިއަން ކަޕް ކޮލިފިކޭޝަންގެ ފުރަތަމަ މެޗުގައި ބޫޓާނުން ރާއްޖެ ކޮޅަށް ދެ ލަނޑު ޖަހާފައި އޮއްވާ ކެޕްޓަން މުހައްމަދު އިލާން އިމްރާން ދެ ލަނޑު ކާމިޔާބުކޮށް އެއްވަރުކޮށްދީފި އެވެ.

މިހާރު ރާއްޖެއިން ފެންނަ އެ އުމުރުގެ އެންމެ ހުނަރުވެރި ފޯވަޑްގެ ރައްދު އައީ 50 އާއި 62 ވަނަ މިނިޓްގައި ބޫޓާނުން ދެ ލަނޑު ޖަހާފައި އޮއްވާ، 70 އަދި 81 ވަނަ މިނިޓްގަ އެވެ.

އިލާންގެ ވާޖިބު އަދަކޮށް ރާއްޖޭގެ ޓީމަށް ޕޮއިންޓެއް ކަށަވަރުކޮށްދިނުމަކީ ރަނގަޅު ފެށުމެކެވެ. ނަމަވެސް ދިވެހި ކުޅުންތެރިންގެ އަސްލު ފެންވަރު ވަޒަންކުރުމުގެ މަރުހަލާ ފެށޭނީ މާދަމާ ބަހުރެއިންއާ ދެކޮޅަށް ކުޅޭ މެޗުންނެވެ. އޭގެ ފަހުން ދެން ބައްދަލުކުރާނީ އޭޝިއާ ފުޓްބޯޅައިގެ ގަދަ ބާރުތައް ކަމަށްވާ ސައުތު ކޮރެޔާ އާއި ޗައިނާއާ އެވެ.

މިހާރު މި އޮތް 17 އަހަރުން ދަށުގެ ޓީމަކީ މިދިއަ އަަހަރު ބޫޓާންގައި އޮތް ސާފްގެ އެ އުމުރުފުރާގެ މުބާރާތުގައި 3-2 އިން ބޫޓާން ބަލިކުރި ޓީމެވެ. އެ މެޗުގައި ވެސް އިލާން ލަނޑު ޖެހި އެވެ.

ފުޓްބޯޅައިގެ ތަޖުރިބާކާރުން ބުނާ ގޮތުގައި އިލާންއަކީ ރައްޖޭގެ ފުޓްބޯޅައިގައި މިހާރު ނުފެންނަ އިތުބާރު ފޯވަޑެއް ނެތުމުގެ އުނިކަން ކުރިމަގުގައި ނައްތާލާނެ ހުނަރު ހުރި ކުޅުންތެރިއެކެވެ.