ލިވަޕޫލް ތާވަލްގެ އެއް ވަނާގައި ހިފަހައްޓަނީ

އިނގިރޭސި ޕްރިމިއަ ލީގުގައި ރޭ ވާދަވެރި ތިން ޓީމުގެ މެޗުތައް ނިމުނު އިރު އެންމެ ބޮޑު އުފާވެރިކަމެއް އޮތީ ލިވަޕޫލްގެ ސަޕޯޓަރުންނަށެވެ.

އުނދަގުލުން ނަމަވެސް ކްރިސްޓަލް ޕެލެސްގެ މައްޗަށް ލިވަޕޫލަށް ހޯދުނު 1-0ގެ ކާމިޔާބީއަކީ ތާވަލްގެ އެއްވަނަ ދަމަހައްޓަން މުހިންމު ތިން ޕޮއިންޓެވެ. ލިވަޕޫލަށް އެ ތިން ޕޮއިންޓް ކަަށަަވަރުކޮށްދިނީ ފުރަތަމަ ހާފުގައި ޑިއޭގޯ ޖޯޓާ ޖެހި ލަނޑުންނެވެ.

ޗެމްޕިއަން މެންޗެސްޓަ ސިޓީ އާއި މިދިއަ ދެ ސީޒަންގައި ދެވަނާގައި ވާދަކުރި އާސެނަލްއަށް ވެސް ރޭ ކުރިމަތިވީ އުނދަގޫ ހާލަތްތަކެކެވެ. ނަމަވެސް އަމިއްލަ ދަނޑުގައި ފުލަމް އަތުން 3-2 އިން ސިޓީ ސަލާމަތްވި އިރު އަމިއްލަ ދަނޑުގައި އާސެނަލްއަށް ސައުތެމްޓަން ބަލިކުރެވުނީ 3-1 އިންނެވެ. އެކަމަކު އެއީ ވެސް މެޗުގެ ފަހުކޮޅުގަ އެވެ.

މިހާރުގެ ހާލަތަށް ބަލާއިރު އިނގިރޭސި ޕްރިިމިއަ ލީގު ފެންނަނީ ވަރަށް ބޮޑު ވާދަވެރިކަމެއްގެ ގޮތުގަ އެވެ. ލިވަޕޫލް އާއި ސިޓީ އަދި އާސެނަލްގެ ފަހަތުން އެސްޓަން ވިލާ އާއި ޗެލްސީ ވެސް އޮތީ ވަރަށް ކައިރިން ވިއްދައިފަ އެވެ.