އިންޑިއާއާ ދެކޮޅަށް ކުޅުނު މެޗުގައި ދިވެހި ކުޅުންތެރިޔަކަށް ލިބުނު އަނިިޔާއެއްގައި ހޮސްޕިޓަލަށް ގެންގޮސްފި

ބޫޓާންގައި މިހާރު ކުރިއަށް ދާ ސާފް 17 އަހަރުން ދަށުގެ މުބާރާތުގައި އިންޑިއާއާ ދެކޮޅަށް މިއަދު ކުޅުނު މެޗުގައި ދިވެހި ޓީމުގެ ދިފާއީ ކުޅުންތެރިޔާ ކާއިން އަަބްދުﷲ ފާއިޒަށް ލިބުނު އަނިޔާއަކާ ގުޅިގެން ވަގުތުން ހޮސްޕިޓަލަށް ގެންގޮސްފި އެވެ.

މެޗުގެ 25 ވަނަ މިނިޓްގައި ކާއިން ވެއްޓުނީ އިންޑިއާގެ ފޯވަޑް ބާރަތު ލައިރެންޖާމްގެ އަތުން ޖެހިފަ އެވެ. އޭނާ ވެއްޓިފައި އޮތް ގޮތުން ހޭހުރި ކަމަކަށް ނުފެނެ އެވެ. ރާއްޖޭގެ ޓީމުގެ ސިއްހީ އެހީތެރިޔާ އަބްދުލް ހަކީމް މޫސާ ދަނޑަށް އަރާ އޭނާގެ މޫނުމަތީގައި މަޑުމަޑުން ޖަހައި، ހޭއަރާތޯ ބަލާތަން ޓީވީން ފެނެ އެވެ. ނަމަވެސް ހަބަރެއް ނުވުމުން ސިއްހީ އިތުރު އެހީއަށް އެދުނެވެ.

އެމްބިއުލެންސްއަށް އަރުވައިގެން ދަނޑުން ގެންދަން ހަތަރު ވަރަކަށް މިނިޓް ހޭދަވި އެވެ.

ކާއިން ވަނީ ރޭ ހޮސްޕިޓަލުން ދޫކޮށްލައިފަ އެވެ. 

އެފްއޭއެމްގެ އޮފިޝަލަކު ވިދާޅުވީ ސީރިއަސް އެއްވެސް މައްސަލައެއް ދިމާނުވާ ކަމަށެވެ.

މި ހާދިސާ ހިނގި އިރު އިންޑިއާއިން ވަނީ 1-0 އިން ލީޑު ނަގައިފަ އެވެ. ފަހު ހާފުގައި އިތުރު ދެ ލަނޑު ޖަހައި3-0 އިން މޮޅުވި އެވެ.

ރާއްޖެ ކުޅުނު ފުރަތަމަ މެޗުގައި ބަންގްލަދޭޝްގެ ކުޅުންތެރިއެއްގެ ގައިގައި ޖެހިގެން މުހައްމަދު ޒީކް އަހުމަދު ވެސް ބާލަން ޖެހުނެވެ. ފަހުން ވަނީ ހޮސްޕިޓަލަށް ގެންގޮސް ޓެސްޓްތައް ހަދައިފަ އެވެ. ނަމަވެސް ސީރިއަސް މައްސަލައެއް ނެތުމުން އޭނާ މިއަދުގެ މެޗަށް ވެސް ފުރަތަމަ 11ގައި ނުކުތެވެ.

ބަންގްލަދޭޝް އާއި ރާއްޖޭގެ މެޗު 1-1 އިން އެއްވަރުވި އިރު ބަންގްލަދޭޝް ވަނީ އިންޑިއާ އަތުން 1-0 އިން ބަލިވެފަ އެވެ. އެހެންކަމުން މިއަދު ރާއްޖެއަށް 3-0 އިން މެޗު ގެއްލުމުގެ މާނައަކީ، ގްރޫޕް އޭއިން ސެމީ ފައިނަލަށް އިންޑިއާއާ އެކު ބަންގްލަދޭޝް ދިއުމެވެ.

މިދިއަ އަހަރު އޮތް މުބާރާތުގެ ފައިނަލްގައި ކުޅުނީ ވެސް މި ދެ ގައުމެވެ. ޗެމްޕިއަންކަން ހޯދީ އިންޑިއާ އެވެ.