އާޓެޓާއަށް ރެއަކީ 'މުއުޖިޒާތެއް'، ސިޓީއަށް އެއީ ހުތުރު އުކުޅެއް

ފުރަތަމަ ހާފުގެ ކުރީކޮޅު އާލިން ހާލޭންޑް ޖެހި ލަނޑުގެ ރައްދުގައި އާސެނަލްއިން ދެ ލަނޑު ޖަހައި، ހާފް ނިމުމުގެ ކުރިން 2-1އަށް ނަތީޖާ ބަދަލުކޮށްލި އެވެ. އެކަމަކު ހާފު ނިމެން އުޅެނިކޮށް ލީންޑްރޮ ޓްރޮސާޑަށް ދެއްކި ރަތް ކާޑާ އެކު، ދެވަނަ ހާފުގައި ފެނުނީ މުޅިން ތަފާތު ކުޅުމެކެވެ.

އަލުން ކުޅެން އަރައި އާސެނަލްގެ 10 ކުޅުންތެރިން މުޅި މެޗު ހޭދަކުރީ އެ މީހުންގެ ޕެނެލްޓީ އޭރިޔާގަ އެވެ. މިދިއަ ހަތަރު އަހަރުގެ ޗެމްޕިއަން އަމިއްލަ ދަނޑުގައި ނޮވެމްބަރު 2022ގެ ފަހުން އަދި ބަލިވެފައެއް ނުވެ އެވެ. އެހެންކަމުން އާސެނަލްގެ ކޯޗު މިކޭލް އާޓެޓާ ކޮންމެ ގޮތަކުން ނަމަވެސް 2-1ގެ ނަތީޖާގައި އޮވެގެން މެޗު ނިންމަން ބޭނުންވި އެވެ.

ދެ ވަނަ ހާފުގައި ސިޓީން 28 ހަމަލާ އާސެނަލްގެ ގޯލަށް ފޮނުވާލި އެވެ. މި ހާފުގައި އާސެނަލްއަށް ބޯޅަ ގެންގުޅެވުނީ އެންމެ %12 ވަގުތުގަ އެވެ.

އެކަމަކު އެންމެ ފަހު ސިކުންތުކޮޅުގެ ތެރޭގައި ޖޯން ސްޓޯންސް އާސެނަލް ކޮޅަށް ބޯޅަ ވައްދާލި އެވެ. އެ މަންޒަރު ފެނިފައި ކޯޗު ޕެޕް ގާޑިއޯލާ އުފާ ފާޅުކުރީ މެޗަކުން މޮޅުވެގެން އުޅޭ ފަދަ ގޮތަކަށެވެ.

މިދިއަ ދެ ސީޒަންގައި ސިޓީއާ އެންމެ ކައިރިން ވާދަކުރި އާސެނަލްއަށް ރެއަކީ، އާޓެޓާ ބުނި ގޮތުން ނަމަ، 'މުއުޖިޒާތެކެ'ވެ.

"އިއްތިހާދު ސްޓޭޑިއަމްގައި 10 ކުޅުންތެރިންނާ އެކު 55 މިނިޓް ހިފެހެއްޓުމަކީ މުއުޖިޒާތެއް،" މެޗަށް ފަހު ވާހަކަ ދައްކަމުން އާޓެޓާ ބުންޏެވެ.

"ގަބޫލުކުރަން ވެސް ދަތި އަހަރެމެންނަށް އެގޮތަށް ހިފެހެއްޓުނީތީ."

އެކަމަކު ސިޓީގެ ފޯވަޑް ބާނާޑޯ ސިލްވާ ބުނި ގޮތުގައި ރޭ އާސެނަލްގެ ފަރާތުން ފެނުނީ ހުތުރު އުކުޅެކެވެ.

"ދަނޑުގައި ކުޅެން އުޅުނީ އެންމެ ޓީމެއް،" އޭނާ ބުންޏެވެ.

ރޭގެ ނަތީޖާއާ އެކު ސިޓީ އޮތީ ތާވަލްގެ ކުރީގަ އެވެ. އެކަމަކު މި ސީޒަންގައި ދަމަހައްޓަމުން އައި މޮޅުވުމުގެ %100 ރެކޯޑަށް ވަނީ ނިމުން އައިސްފަ އެވެ.