މެންޗެސްޓަ ޔުނައިޓެޑްގެ އާ ފޯވަޑް ޖޯޝުއާ ޒާކްޒޭ، ފުލަމް ކޮޅަށް ލަނޑު ޖެހުމަށް ފަހު އުފާ ފާޅުކުރަނީ
ޔުނައިޓެޑް، އަށްވަނަ އިން އެއް ވަނައަށް އަރައިފި
މެންޗެސްޓަ ޔުނައިޓެޑްގެ ދިވެހި ސަޕޯޓަރުން މިއަދު ހޭލި އިރު ޓީމު އެ އޮތީ ތާވަލްގެ އެއްވަނައަށް އަރައިފަ އެވެ.
އާ ޕްރިމިއަ ލީގު ރޭ އަދި ފެށީ އެވެ. މިހާތަނަށް ކުޅުނީ ވެސް އެންމެ މެޗެކެވެ. އެކަމަކު މިރޭގެ އެހެން މެޗުތަކުން މޮޅުވެ ބައެއް ޓީމުތައް ތިން ޕޮއިންޓް ހޯދުމާ ހަމައަށް ތާވަލްގެ އެއްވަނަ އެ އޮތީ ޔުނައިޓެޑަށެވެ.
އަމިއްލަ ދަނޑުގައި ފުލަމްއާ ދެކޮޅަށް ކުޅެ ޔުނައިޓެޑަށް މޮޅުވެވުނީ އަލަށް ގުޅުނު ނެދަލެންޑްސްގެ ފޯވަޑް ޖޯޝުއާ ޒާކްޒޭ މެޗުގެ 87 ވަނަ މިނިޓްގައި ޖެހި ހަމައެކަނި ލަނޑުންނެވެ. ފަހު ހާފުގައި ކުޅެން ނުކުމެ ފުރަތަމަ މެޗުގައި މި ލަނޑު ޖެހުމާ އެކު ޒާކްޒޭ ވީ ޔުނައިޓެޑްގެ އާ ބަތަލަށެވެ.
މިދިއަ ސީޒަންގައި ޔުނައިޓެޑަށް ތާވަލުން ލިބުނީ އަށް ވަނަ އެވެ. އެހެންކަމުން ފުރަތަމަ މެޗާ އެކު މޮޅަކުން ފަށައި، ތާވަލްގެ އެއްވަނައަށް އެރުމުން ސަޕޯޓަރުންގެ އުއްމީދުތައް ބޮޑުވާނެ ކަމާ މެދު ޝައްކެއް ނެތެވެ.