ރެއާލްގައި އެމްބާޕޭގެ ފުރަތަމަ ލަނޑާއި ފުރަތަމަ ތަށި

ޔުއެފާ ސުޕަ ކަޕްގައި ރޭ އިޓަލީގެ އެޓަލާންޓާއާ ކޮޅަށް ކީލިއަން އެމްބާޕޭ ލަނޑު ޖަހައި، ރެއާލްގައި އޭނާގެ އާ ކަން ކަނޑުވާލައިފި އެވެ. އަދި ޔުއެފާ ސުޕަ ކަޕް ހަވަނަ ފަހަރަށް ހޯދައި ރެއާލްއަށް ވަނީ ރެކޯޑެއް ވެސް ހަދައިފަ އެވެ.

"މިއީ ވަރަށް ބޮޑު ރެއެއް. މި ވަގުތަށް އަހަރެން އިންތިޒާރުކުރަމުން އަންނަތާ ދިގު މުއްދަތެއް ހޭދަވެއްޖެ،" ރޭގެ މެޗަށް ފަހު ވާހަކަ ދައްކަމުން އެމްބާޕޭ ބުންޏެވެ.

އޭނާގެ ލަނޑު އައީ 70 ވަނަ މިނިޓްގަ އެވެ. އެކަމަކު އެއީ އޭނާ މާކް ކޮށްގެން ކުޅުނު އެޓަލާންޓާގެ ކުޅުންތެރިންގެ ކިބައިން ސަލާމަތްވެ ފޮނުވާލި ފުރިހަމަ ހަަމަލާއެކެވެ. މި މެޗުން ރެއާލް މޮޅުވީ 2-0 އިންނެވެ.

"މި ޖާޒީގައި ކުޅުމަކީ، މި ބެޖު އަދި މި ސަޕޯޓަރުންނާ އެކު ކުޅުމަކީ އަހަންނަށް ވަރަށް ބޮޑު ހަދިޔާއެއް،" އެމްބާޕޭ ބުންޏެވެ.

ވިނީޝިއަސް ޖޫނިއާ އާއި ޖޫޑް ބެލިގަމް އާއި ރޮޑްރިގޯ އަދި އެންޑްރިކްއާ އެކު ރެއާލްއަކީ މިހާރު ވެސް ހަމަލާގެ ފުޓްބޯޅާގައި ވަރުގަދަ ބާރެކެވެ. އޭގެ ތެރެއަށް އެމްބާޕޭ ވަނުމުން އެ ލަޝްކަރު އިތުރަށް ވަރުގަދަވީ އެވެ.

"އަހަރެމެން މި ތިބީ ރެއާލް މެޑްރިޑްގައި، ދެން މިއީ ނިމުމެއް އޮތް ކަމެއް ނޫން،" އެމްބާޕޭ ބުންޏެވެ.

"އަހަންނަށް 50 ލަނޑު ހަމަކުރެވެންޏާ ދެން 50 ހަމަކުރަންވީ. އެކަމަކު މުހިންމީ ޓީމު މޮޅުވުމާއި ޓީމު މިހާރަށް ވުރެ ވެސް ރަނގަޅުވުން. ޓީމެއްގެ ގޮތުގައި އަހަރެމެން މޮޅުވާނެ."

ބެލިގަމް ވަނީ އެމްބާޕޭއަށް ތައުރީފްކޮށްފަ އެވެ. އޭނާ ބުނި ގޮތުގައި އެއީ ޓެކްނިކަލްގެ ގޮތުން އެހާމެ މޮޅު، އެހާމެ ވިސްނުން ތޫނު ކުޅުންތެރިއެކެވެ.

"އަހަރެމެން އެންމެންނެކޭ އެއްގޮތަށް މި ޓީމަށް އޭނާ ރަނގަޅު،" ބެލިގަމް ބުންޏެވެ.