ސިފާން ހަސަންއަށް ސާބަސް، މެރެތަންގެ އެއްވަނަ ސްޕްރިންޓަކުން

ޕެރިސް އޮލިމްޕިކްސް މިރޭ ނިމުނު އިރު ނެދަލެންޑްސްގެ ސިފާން ހަސަން މިއަދު އޮތް އަންހެނުންގެ މެރެތަން ކާމިޔާބުކުރީ އެންމެން ހައިރާންކޮށްލައިފަ އެވެ.

މިހާތަނަށް އޮލިމްޕިކްސްއެއްގައި މެރެތަން ދުވަން ޖެހުނު އެންމެ އުނދަގޫ ރޫޓް ކަމަށް ބެލެވޭ ޕެރިސްގެ މަގުތަކުގައި އޮތް ރޭހުގެ ފަހު 200 މީޓަރުގައި ސިފާން ޖެހި ސްޕްރިންޓް އާދަޔާ ހިލާފެވެ. އޭނާއާ ވިއްދައިގެން އެވަގުތު ދުވަމުން ދިޔަ އަދި އަންހެން މެރެތަންގެ ދުނިޔޭގެ ރެކޯޑް މިހާރު އޮންނަ އިތިއޮޕިއާގެ ޓިގްސް އަސެފާއަށް ވެސް އަތެއް ނުވި އެވެ.

ސިފާން ރޭސް ނިންމި ވަގުތު ކަމަށްވާ 2:22:55 އަކީ އޮލިމްޕިކްސްގައި އަންހެން މެެރެތަންގެ އާ ރެކޯޑެވެ. އަސެފާއަށް ރޭސް ނިންމުނީ އޭގެ ތިން ސިކުންތު ފަހުންނެވެ.

މި ކާމިޔާބީގެ އިތުރުން ސިފާން ވަނީ އޮލިމްޕިކްސްގެ އަންހެން 5000 މީޓަރާއި 10000 މީޓަރުން ލޯ މެޑެލް ވެސް ހޯދައިފަ އެވެ. އެހެންކަމުން މިއީ 31 އަހަރުގެ ދުވުންތެރިޔާގެ އާދަޔާ ހިލާފު ހުނަރާއި ހިތްވަރު ދުނިޔެއަށް ސާބިތުކޮށްދިނުމެވެ.

"އަހަންނަށް ބުނާނެ އެއްޗެއް ވެސް ނޭނގޭ. ރޭހުގެ ކޮންމެ ހިސާބެއްގައި ވެސް އަހަރެން ހިތާމަކުރިން 5000 މީޓަރާއި 10000 މީޓަރުގެ ރޭސް ދުވެވުނީތީ. އަހަރެންގެ ހިތަށްއެރި އެ ދެ ރޭސް ނުދުވެވުނު ނަމަ މިއަށް ވުރެ މާ ރަނގަޅުވީހޭ،" ރޭހުގައި ކުރެވުނު އިހުސާސްތަކާ ބެހޭ ގޮތުން ސިފާން ބުންޏެވެ.

އޭނާ ބުނި ގޮތުގައި ރޭހުގައި ކިރިޔާ ވެސް އޭނާއަށް ހަމަޖެހިލެވުނީ 20 ކިލޯމީޓަރު ދުވެވުނު ފަހުންނެވެ. 

"އެހާ ހިސާބުން ރަން މެޑެލް ބޭނުންވެއްޖެ،" ސިފާން ބުންޏެވެ.

މިފަހަރުގެ އޮލިމްޕިކްސްގައި ސިފާން ވަނީ ޖުމްލަ 62.195 ކިލޯމީޓަރު ދުވެފަ އެވެ.