![](https://cdn.dhauru.com/s3/media/2024/06/15/d9a04246-07a1-48b0-bfe3-f03cdee24a8a.jpg?fit=crop-50-50&w=1400&h=800)
ޖަރުމަނާއި ސްކޮޓްލެންޑް ބައްދަލުކުރި މެޗުގައި ލަނޑެއް ޖެހުމަށް ފަހު ޖަރުމަން ކުޅުންތެރިން އުފާފާޅުކުރަނީ
ގޯލު ޖަހަމުން ޖަހަމުން ގޮސް ޖަރުމަނުން ބައިކޮޅަށް ވެސް ޖަހައިފި
ޔޫރޯ 2024ގެ ފުރަތަމަ މެޗުގައި ރޭ ޖަރުމަނުން ސްކޮޓްލެންޑް ޓީމު ދަނޑުން ފޮނުވައިލީ 'ސުންނާފަތި' ކޮށްލުމަށް ފަހު އެވެ. ތަފާތު ބޮޑު، 5-1ގެ ނަތީޖާއަކުންނެވެ. އެކަމަކު ދުނިޔޭގެ ފުޓުބޯޅައިގެ ގަދަ ބާރެއްގެ ގޮތުގައި ބެލެވޭ ޖަރުމަނަށް އެއީ ހައިރާންކުރަނިވި ނަތީޖާއެއް ނޫނެވެ.
މުބާރާތް ބާއްވާ ގައުމުގެ ގޮތުގައި ސްކޮޓްލެންޑާ ދެކޮޅަށް ނުކުތްއިރު ވެސް ސްކޮޑުގެ ފެންވަރާއި ތާރީހަށް ބަލާއިރު ނަތީޖާ ބުރަވެފައި އޮތީ ޖަރުމަން ކޮޅަށެވެ. ސްކޮޓްލެންޑުން ނުކުތީ އެކަން ބަދަލުކުރުމަށެވެ. އިތުރު އެހީއެއްގެ ގޮތުގައި އަމިއްލަ ގައުމުގައި ކުޅޭ ކަމަށް އިހުސާސްކޮށްދޭން ސްކޮޓުލެންޑްގެ ބައި ލައްކައަށް ވުރެ ގިނަ ސަޕޯޓަރުން ޖަރުމަނަށް ދިޔަ ކަމަށްވެ އެވެ.
އަމިއްލަ ފަސްގަނޑުގައި ތިބި ޖަރުމަނު ސަޕޯޓަރުންނަށް ވުރެ، މެޗުގެ ކުރީކޮޅުގައި ސްކޮޓްލެންޑު ސަޕޯޓަރުންގެ އަޑު މާ ބާރެވެ. އަޑު މަޑުވާން ފެށީ 10 ވަނަ މިނެޓުގައި ފްލޯރިއަން ވާޓްޒް، ޕެނަލްޓީ އޭރިއާގެ ބޭރުން، ތިރިތިރިން ފޮނުވާލި ހަމަލާއަކުންނެވެ. ބޯޅަ ގޯލުގެ ތެރެއަށް ވަނީ ކީޕަރުގެ އަތުގައި ޖެހި، އަރިމަތިން ދަނޑީގައި ވެސް ޖެހުމަށް ފަހު އެވެ. އޭގެ ނުވަ މިނެޓު ފަހުން އިތުރު ގޯލެކެވެ. ޖަމާލް މުސިއާލާ ފޮނުވާލި ބާރު ހަމަލާ މަތަކުރަން ސްކޮޓްލެންޑް ކީޕަރަށް ކުރެވޭނެ މާ ބޮޑު ކަމެއް ނެތެވެ.
![](https://cdn.dhauru.com/s3/media/2024/06/15/039857f7-8a69-47cd-8471-16f0c907705d.jpg?h=800)
![](https://cdn.dhauru.com/s3/media/2024/06/15/f5fc99d2-8478-4974-94c6-ccba94766ffa.jpg?h=800)
ސްކޮޓްލެންޑަށް އިތުރު ވޭނަކަށް ވީ ފުރަތަމަ ހާފު ނިމިނިމި އޮއްވައި ޑިފެންޑަރު ރަޔަން ޕޯޓިއަސް ކުރި ނުރައްކާތެރި ޓެކުލަކާ ހެދި ރަތް ކާޑެއް ދެއްކުމުންނެވެ. އޭނާ ދަނޑުން ފައިބައިގެން ދިޔައީ މޮޅުވާން ނުވަތަ އެއްވަރު ކުރެވެން ކިރިޔާ ވެސް އޮތް އުންމީދު ހިފައިގެންނެވެ.
ލިބުނު ޕެނަލްޓީ ނިކަން ހަމަޖެހިލުމަށް ފަހު ކީޕަރު ނުބައި ކޮޅަށް ޑައިވް ކުރުމުން ގޯލު ތެރެއަށް ފޮނުވާލީ އާސެނަލްގެ ހުނަރުވެރި ފޯވަޑް ކައި ހެވަޓްޒް އެވެ.
މެޗުގެ ދެ ވަނަ ހާފަށް ނުކުތްއިރު މިއީ ވާ ވަރުގެ ކަމެއް ނޫންކަން ސްކޮޓްލެންޑަށް އޮތީ ޔަގީންވެފަ އެވެ. އަމުދުން 10 ކުޅުންތެރިންނާ އެކީގަ އެވެ. އެހެންވެ ދެ ވަނަ ހާފުގައި ފެނުނީ 'ޖަރުމަނުގެ 10 ފޯވަޑުން' ހުއްޓުވަން ސްކޮޓްލެންޑުގެ '10 ޑިފެންޑަރުން'ނޭ ވެސް ބުނެވިދާނެ އެވެ.
ޖަރުމަނު ޓީމު އޮތީ ގިނަ ގޯލުތަކެއް ޖަހަން ފެންބޮވައިގެންފަ އެވެ. ފަހު ހާފުގައި ކުޅެން އެރިތާ ފަސް މިނެޓު ނުވަނީސް ނިކްލަސް ފުލްކްރުގް އިތުރު ލަނޑެއް ޖެހި އެވެ. ނަމަވެސް، ގޯލު ޖަހަމުން ޖަހަމުން ގޮސް، ޖަރުމަނު ޓީމަށް އެންމެ ފަހުން އޮޅިގެން ބައިކޮޅަށް ވެސް ގޯލެއް ޖެހުނީ އެވެ.
![](https://cdn.dhauru.com/s3/media/2024/06/15/810cb813-f29d-4fed-a995-10bf51ffd60c.webp?h=800)
ސްކޮޓްލެންޑަށް ލިބުނު ހިލޭ ޖެހުމަކުން ނަގައިދިން ހުރަހެއްގައި ބޯޅަ ސާފުކުރަން އުޅުމުގެ ތެރޭގައި ޖަރުމަނު ޑިފެންޑަރު އެންޓޯނިއޯ ރުޑިގާއަށް ބޮލުން ޖައްސާލެވުނީ އަމިއްލަ ގޯލާ ދިމާލަށެވެ. މުޅި މެޗުގައި އެއްވެސް ނުރައްކަލަކާ ކުރިމަތިނުވެ ހުރި ތަޖުރިބާކާރު ޖަރުމަނު ކީޕަރު މެނުއެލް ނޯޔާއަށް އެ ބޯޅަ ނުހުއްޓުވުނެވެ. ރޭގެ މެޗުގައި ސްކޮޓްލެންޑަށް ލިބުނު ހަމައެކަނި ހިތްހަމަޖެހުމަކީ ވެސް އެއީ އެވެ.
![](https://cdn.dhauru.com/s3/media/2024/06/15/28b1b2f2-0336-4a6d-94c4-deca635f2786.jpg?h=800)
ޖަރުމަނުގެ ފަހު ގޯލު ޖެހީ ބަދަލު ކުޅުންތެރިއެއްގެ ގޮތުގައި އެރި އެމްރޭ ޗާން އެވެ.
މިއީ ޖަރުމަނުގެ ތާރީހުގައި ވެސް ޔޫރޯ މުބާރާތެއްގައި އެންމެ ތަފާތު ބޮޑުކޮށް މޮޅުވި މެޗެވެ. މުބާރާތް ބާއްވާ ގައުމުކަކުން، ހުޅުވާ މެޗުގައި ނެރުނު އެންމެ ތަފާތު ބޮޑު ނަތީޖާ ވެސްމެ އެވެ. އެ މެޗުގައި ވާޓްޒް ވެސް ވަނީ ތާރީހު ފޮތުން ޖާގައެއް ހޯދަފަ އެވެ. އެއީ ޔޫރޯގައި ޖަރުމަނަށް ގޯލު ޖެހި އެންމެ ހަގު ކުޅުންތެރިޔާ އާއި ޔޫރޯ މުބާރާތެއްގެ ފުރަތަމަ ގޯލު ޖެހި އެންމެ ހަގު ކުޅުންތެރިޔާގެ ގޮތުގަ އެވެ. ރޭގެ މެޗަށް ނުކުތްއިރު އޭނާގެ އުމުރަކީ 21 އަހަރާއި 42 ދުވަހެވެ.
![](https://cdn.dhauru.com/s3/media/2024/06/15/d32fc628-7480-48c6-b763-bf955e0f5fa5.jpg?h=800)
ގްރޫޕް އޭގައި މިއަދު ދެން ކުޅޭނީ ހަންގޭރީ އާއި ސުވިޒަލެންޑް ބައްދަލުކުރާ މެޗެވެ. އެއަށް ފަހު ޖަރުމަން ދެން ނުކުންނާނީ ހަންގޭރީއާ ދެކޮޅަށެވެ. އަދި ސްކޮޓްލެންޑް ބައްދަލުކުރާނީ ސުވިޒަލެންޑާ އެވެ.
މިއަދު ކުޅޭ މެޗުތައް
-
ހަންގޭރީ - ސުވިޒަލެންޑް (ހަވީރު 6 ޖަހާއިރު)
-
ސްޕެއިން - ކްރޮއޭޝިއާ (ރޭގަނޑު 9 ޖަހާއިރު)
-
އިޓަލީ - އަލްބޭނިއާ (ދަންވަރު 12 ޖަހާއިރު)