ޕާކިސްތާން ޓީމަށް އިންޑިއާގެ ވިސާ ނުލިބި މޮރިޝަސްގައި ތާށިވެފައި

އަންނަ ބުދަދުވަހު ބެންގަލޫރުގައި ފަށާ ސާފް ޗެމްޕިއަންޝިޕްގައި ވާދަކުރަން އިންޑިއާއަށް ދާން މިއަދު ހަމަޖެހިފައި އޮތަސް ވިސާ ނުލިބުމުގެ ސަބަބުން ޕާކިސްތާން ޓީމު މޮރިޝަސްގައި ތާށިވެއްޖެ އެވެ.

ފީފާގެ ސަސްޕެންޝަންގައި އޮތުމުން 2021ގެ މުބާރާތުގައި ނުކުޅެވުނު ޕާކިސްތާން ޓީމު ބެންގަލޫރަށް ދަތުރުކުރަން އޮތީ މޮރިޝަސް އިންނެވެ. މޮރިޝަސްގައި ޕާކިސްތާން ވަނީ ހަތަރު ގައުމު ވާދަކުރި ފުޓްބޯޅަ މުބާރާތެއްގައި ވެސް ބައިވެރިވެ، ސާޗް ޗެމްޕިއަންޝިޕަށް ތަޖުރިބާ ހޯދައިފަ އެވެ.

މޮރިޝަސްގައި ހުންނަ އިންޑިއާގެ އެމްބަސީއަށް ވިސާ ހޯދަން ޓީމުގެ އެންމެންގެ ޕާސްޕޯޓް އޮތީ ލައިފަ އެވެ. އަދި ކުރިން ޔަގީންކަން ލިބިފައި އޮތީ މިއަދު ފުރޭ ވަރަށް ވިސާ ލިބޭނެ ކަމަށެވެ.

ޕާކިސްތާނު ޓީމުގެ ބައެއް ކުޅުންތެރިން ޓްވިޓާގައި ލިއުނު ގޮތުގައި އިންޑިއާއަށް ފުރަން އޮތީ މިއަދު ހެނދުނު 1130ގައި އޮތް ފްލައިޓަކުންނެވެ. އެކަމަކު އެ ފްލައިޓް އަތުނުވެ، އެނބުރި ޕާކިސްތާނަށް ވެސް ދާނެ ގޮތެއް ނެތި ޓީމު ވަނީ މޮރިޝަސްގައި ތާށިވެފަ އެވެ.

ޓީމުގެ މެނޭޖްމަންޓުން ކުރިން ބުނެފައިވާ ގޮތުގައި ޕާކިސްތާންގެ ކުޅުންތެރިންނާއި  އޮފިޝަލުންނަށް ވިސާ ދޭން އިންޑިއާ ސަރުކާރުގެ ރަސްމީ ސިޓީ ވެސް ވަނީ ލިބިފަ އެވެ.

މުބާރާތުގެ ފުރަތަމަ މެޗުގައި ބުދަދުވަހު އިންޑިއާއާ ދެކޮޅަށް ކުޅެން އޮތީ ވެސް ޕާކިސްތާން އެވެ.

އަވަށްޓެރި ދެ ގައުމުގެ ދެމެދުގައި އޮތް ސިޔާސީ ދެކޮޅުވެރިކަމުގެ ނުބައި އަސަރު ކުޅިވަރަށް ވެސް ވަރަށް ބޮޑަށް ވަނީ ފޯރައިފަ އެވެ. 

މޮރިޝަސްގައި އޮތް މުބާރާތުގައި ޕާކިސްތާން ތިން މެޗުން ވެސް ވީ ބައްޔެވެ. އެގޮތުން މޮރިޝަސް އަތުން 3-0 އިން، ކެންޔާއާ ކުޅެ 1-0 އިން އަދި ޖިބޫޓީއާ ދެކޮޅަށް ނުކުމެ 3-1 އިންނެވެ.