އަޝްފާގު ކުޅެން ނުކުތީ ސަސްއަށް، ދެ ލަނޑު ޖަހައި މޮޅުކޮށްދިން

ރާއްޖޭގެ ފުޓްބޯޅައިގެ ތަރި އަލީ އަޝްފާގު، ބޮޑެތި ޓީމުތައް ދޫކޮށް އޭނާގެ 'އަމިއްލަ ޓީމު' ސަސްއަށް ރޭ ފުރަތަމަ މެޗު ކުޅެ، ވެލެންސިއާ ކޮޅަށް ދެ ލަނޑު ޖަހައި، 5-0 އިން މޮޅުކޮށްދީފި އެވެ.

ޕްރެސިޑެންޓްސް ކަޕްގައި ސަސް އާއި ވެލެންސިއާގެ ފުރަތަމަ މެޗުގައި، އަޝްފާގުގެ އިތުރުން އިބްރާހިމް އަތީގު ހަސަން އާއި މުހައްމަދު ސަހާއު އަދި އަހުމަދު ހަމީދު ވެސް ލަނޑު ޖެހި އެވެ.

މިދިއަ އަހަރު އަލިފުށީގައި އޮތް ފައިނަލް މެޗުގައި މާޒިޔާ ބަލިކޮށް ޗެމްޕިއަންކަން ހޯދި ވެލެންސިއާ މިފަހަރުގެ މުބާރާތަށް ނުކުތީ މި ފަހުން ނިމުނު ސްކޫލްތަކުގެ 15 އަހަރުން ދަށުގެ ފުޓްބޯޅަ މުބާރާތުގެ ޗެމްޕިއަންކަން ހޯދި އިސްކަންދަރު ސްކޫލް ޓީމުގެ ގިނަ ކުޅުންތެރިންނާ ވެސް އެކުގަ އެވެ. ވެލެންސިއާގެ ޔޫތު އެކަޑަމީގައި ތަމްރީން ހަދަމުން އަންނަ ކުޅުންތެރިންގެ ހަ ކުއްޖަކު ރޭ ފުރަތަމަ 11 ގައި ވެސް ކުޅުނެވެ.

ގަލޮޅު ދަނޑުން ރަސްމީ މެޗެއްގައި އަޝްފާގު މި ފެނުނީ އަހަރެއްހާ ދުވަސް ފަހުންނެވެ. އޭނާ މިދިއަ އަހަރު ވެލެންސިއާގެ ޓީމު ލިސްޓްގައި ވެސް ހިމެނުނެވެ. ނަމަވެސް ކުޅެފައެއް ނުވެ އެވެ.

ސަސްއަކީ އަޝްފާގު ވެސް ފަހަތުގައި ހުރެގެން ހެދި ކްލަބެކެވެ. މީގެ ކުރިން ވެސް ބޮޑެތި ކްލަބްތައް ދޫކޮށް އެ ޓީމަށް ކުޅެން އޭނާ ބޭނުންވި އެވެ.