އަހަރުގެ މޮޅު އެތުލީޓްގެ މަގާމު އަޒުނީން އާއި ދީމާއަށް

ބޮޑީބިލްޑަރު އަޒްނީން ރަޝާދު އާއި ޓީޓީ ކުޅުންތެރިޔާ ފާތުމަތު ދީމާ އަލީ، މިދިއަ އަހަރުގެ އެންމެ މޮޅު އެތުލީޓުންގެ މަގާމު ރޭ ހޯދައިފި އެވެ.

ސަރުކާރުން ދޭ 'މޯލްޑިވްސް ސްޕޯޓްސް އެވޯޑްސް 2023' ގައި މި ދެ އެތުލީޓުންނަށް އެވޯޑާ އެކު 200،000ރ އަށް ވުރެ އަގުބޮޑު އިނާމު ލިބުނެވެ.

ދެ އެތުލީޓުންނަށް ވެސް އެވޯޑް ހަވާލުކޮށްދެއްވީ ރައީސް އިބްރާހިމް މުހައްމަދު ސޯލިހެވެ.

އަޒުނީންއަށް ރާއްޖޭގެ އެންމެ މޮޅު ފިރިހެން އެތުލީޓުގެ މަގާމު ލިބުމުގެ މައިގަނޑު ސަބަބަކީ މިދިއަ އަހަރު ތައިލެންޑްގައި އޮތް ވޯލްޑް ބޮޑީބިލްޑިން ޗެމްޕިއަންޝިޕްގައި އޭނާ ބައިވެރިވި ބައިން ރަން މެޑެލް ހޯދުމެވެ. މިއީ އެ މުބާރާތުގައި ރާއްޖޭގެ ބޮޑީބިލްޑަރަކަށް މިހާތަނަށް ލިބުނު ފުރަތަމަ ރަން މެޑެއްޔެވެ.

އެންމެ މޮޅު ފިރިހެން އެތުލީޓުންގެ ދެ ވަނައަށް ދިޔައީ ބޮޑީބިލްޑަރު މުހައްމަދު މޫސާ އާއި ރާޅާއެޅުންތެރިޔާ އަލީ ހުޝްރުވާން އަހުމަދު (ކުޑަ އައްޔަ) އެވެ. 

އަންހެން އެންމެ މޮޅު އެތުލީޓުގެ މަގާމު ޒުވާން ދީމާ ހޯދީ، އޭނާއާ އެކު ޓީޓީގައި ވިދަމުން އަންނަ އައިޝަތު ރަފާ ނާޒިމް އާއި އަރަމުން އަންނަ ޓެނިހުގެ ތަރި އަރާ އާސާލް އާޒިމްއާ ވާދަކޮށްގެންނެވެ.

މޯލްޑިވްސް ސްޕޯޓްސް އެވޯޑްސްގައި ރާއްޖޭގެ ހުރިހާ ކުޅިވަރަކުން އެންމެ މޮޅު ކުޅުންތެރިޔާ/އެތުލީޓް ހޮވި އެވެ. އޭގެ އިތުރު ވެސް ކުޅިވަރުގެ އެކި ޚިދުމަތްތެރިންގެ އަގުވަޒަންކުރުން އޮތެވެ.