ރޯދަމަހުގެ ހަވީރު މާލޭގެ ކުޅިވަރު މާހައުލުން

ދައުރު ފޮޓޯ: މުހައްމަދު މުޒައްޔިން ނާޒިމް

ރޯދައާ އެކު ވަރުބަލިވެގެން ގޭގައި ތިބެނީކީ ނޫނެވެ. ރޯދައަކީ ހަމަ އާދައިގެ ދުވަހެއް ގޮތަށް ނަގައި، ހިތްވަރާ އެކު ކުޅިވަރު ކުޅެލުމުގެ އުފާ ވެސް އެތައް ބަޔަކު އެބަ ހޯދަ އެވެ. އެކަން މާލޭގެ އެކި ހިސާބުތަކުން ފެނެ އެވެ.

ކުރީގެ ފުޓްބޯޅަ ކުޅުންތެރިންގެ މެދުގައި ބާއްވާ ވެޓްރަންސް ކަޕަކީ ރޯދަމަހު ހަވީރު އޮންނަ އެންމެ ބޮޑު އެއް ވާދަކުރުމެވެ. މިފަހަރުގެ މުބާރާތް ކުރިއަށް ދަނީ ހެންވޭރު ދަނޑުގަ އެވެ. މިއީ 1970 އާއި 1980 އަދި 1990ގެ ކުރީކޮޅު، އެންއެސްއޭއިން ރޯދަމަހު ބޭއްވި ފޯރިގަދަ ވޮލީ މުބާރާތް އޮތް ދަނޑެވެ. މި ދަނޑުގައި ވިނަ އިންދާ ހަމައެކަނި ފުޓްބޯޅައަށް ހާއްސަކުރީ 1990ގެ އަހަރުތަކުގެ ފަހުކޮޅު އެވެ.

ކުރީގައި ނަމަ ރޯދަމަހު ހަވީރު ކަސްރަތަށް ދުވަން ނޫނީ ހިނގަން ނުކުތުމަކީ އާންމުން ގަބޫލުކުރާ ކަމެއް ނޫނެވެ. އެކަން 2010 ހިސާބުގައި ވެސް އޮތީ އެހެންނެވެ. އޭރު ރޯދަމަހު ހަވީރު ދުވަން ނުކުންނަ މީހުންނާ ދިމާއަށް 'ތި ތިބީ ރޯދައަކަށް ނޫނޭ' ފަދަ ވާހަކަތައް އަމާޒުކުރެ އެވެ. ނަމަވެސް މިހާރު ރޯދައަށް ހުރެ ދުވާށާއި ހިނގަން ނުކުންނަ މީހުންގެ އަދަދު ގިނަ އެވެ.

ރޯދައަށް ހުންނަ އިރު ހަވީރު ވަގުތު ކަސްރަތުކުރުމުން ގިނަ މީހުންނަށް ވަރަށް ބޮޑު ހިތްހަމަޖެހުމެއް ލިބެ އެވެ. އެކަމަކު ދިގު ދިވުން ފަދަ ދުވުންތައް ދުވާ ނަމަ ކުރީ ރޭ އެކަށީގެންވާ ވަރަށް ދިޔާ އެއްޗެހި ބުއިން މުހިންމެވެ.

ރޯދައަށް ހުރުމަކީ ޖިސްމާނީ ހަރަކާތްތައް ހުއްޓާލަން ޖެހޭ ސަބަބެއް ނޫނެވެ. ރޯދަމަހު ހަވީރު ގަޑީގައި ކަސްރަތަށް ނުކުންނަ މީހުންނަށް، އެކަމުން ލިބިދޭ ހިތްހަމަޖެހުމާއި ހަށިގަނޑަށް އަންނަ ލުއިކަން އިހުސާސްކުރެވޭނެ އެވެ.