ފުރިހަމަ، ރީތި ދުވުމުގައި ގޮސް އެ ހޯދީ ލޯ މެޑެލް

ކަރުގައި މެޑެލް އަޅުވާލުމަށް ފަހު، ރާއްޖޭގެ އެންމެ ބާރު ދުވުންތެރިޔާ ހަސަން ސާއިދުގެ ތައުރީފް ދިޔައީ، އޭނާއާ އެކު ދުވި އަންހެން ދެ ދުވުންތެރިންނަށެވެ.

"އަންހެން ދެ ދުވުންތެރިން ވަރަށް ފާހަގަކޮށްލަން. އެ ދުވުންތެރިން ދުވެލި ދުވުން ވަރަށް ފުރިހަމަ، ވަރަށް ކާމިޔާބު، ވަރަށް ރީތި ދުވުމެއް އެ ދުވެލީ،" ސާއިދު ބުނެލި އެވެ.

އިއްޔެ މަޑަގަސްކަރައިގައި އޮތް އައިއޯއައިޖީގެ ހަތަރެއް ގުނަ 400 މީޓަރުގެ މިކްސްޑް ރިލޭއިން ރާއްޖެ ތިން ވަނަ ހޯދައި، މެޑެލް އެޅުވުމުގެ ރަސްމިއްޔާތުގައި ބައިވެރިވުމަކީ، އެ ދުވުންތެރިންނަށް 'ޝޮކެކެ'ވެ. އެފަދަ ކާމިޔާބީއަކަށް، ހަތަރު ދުވުންތެރިންގެ ތެރެއިން ބައެއް ދުވުންތެރިން އުއްމީދުކޮށްފައެއް ވެސް ނުވެ އެވެ.

"މިއީ ހަމަ ޝޮކެއް. ހަމަ ގަބޫލެއް ނުކުރެވޭ އަސްލު،" މިވަގުތު ރާއްޖޭގައި ހުރި އެންމެ ބާރު އަންހެން ދުވުންތެރިޔާ އައިޝަތު ހިމްނާ ހަސަން ބުންޏެވެ.

"އަހަރެން ވަރަށް ބޮޑަށް ފަހުރުވެރިވަން މުޅި ޓީމަށް."

އަންހެން އަނެއް ދުވުންތެރިޔާ ޒިވާ މޫސާ ޝަފީއުއަށް އޭނާގެ ޝުއޫރުތައް ފާޅުކުރަން އުނދަގޫ ވެސް ވި އެވެ. އެކަމަކު އޭނާ ވެސް ބުނީ 'ވަރަށް އުފާވެއްޖެ' ކަމަށާއި 'މިއީ އެއްގޮތަކަށް ވެސް ހީކުރި ގޮތެއް ނޫން' ކަމަށެވެ.

މަޑަގަސްކަރަ އާއި ރިޔޫނިއަންގެ ފަހަތުން ރާއްޖޭގެ ޓީމު ނިންމައި ލޯ މެޑެލް ކާމިޔާބުކުރި ޓީމުގެ ފިރިހެން ދެވަނަ ދުވުންތެރިޔަކީ ހުސެއިން ރިޒާ އެވެ. އޭނާ ބުނީ މިއީ ވަރަށް މަސައްކަތުން ހޯދުނު މެޑެއްޔެއް ކަމަށާއި މި ކާމިޔާބީއާ މެދު 'ވަރަށް ބޮޑަށް ފަހުރުވެރިވާ" ކަމަށެވެ.

ރާއްޖޭގެ ޓީމު ރޭސް ނިންމީ 3 މިނިޓް 30.33 ސިކުންތުންނެވެ. ރަން މެޑެލް ހޯދި މަޑަގަސްކަރައިގެ ވަގުތަކީ 3 މިނިޓް 29.6 ސިކުންތެވެ. ރިޔޫނިއަން އިން ދެ ވަނަ ހޯދ ީ3 މިނިޓް 30.33 ސިކުންތުން ނިންމައިގެންނެވެ.

ރާއްޖެ ތިން ވަނާގައި އޮތީ މޮރިޝަސް އާއި މާޔޯޓް އަދި ސީޝެލްސް ފަހަތަށް ވައްޓާލައިފަ އެވެ.

އިއްޔެ ފެށި އެތުލެޓިކްސް އިވެންޓްތަކުގައި މި އުފާވެރިކަމާ ހަމައަށް ދިއުމުގެ ކުރިން ސާއިދަށް އޮތީ ހިތްހަމަނުޖެހުމެއް ކުރިމަތިވެފަ އެވެ. އޭނާގެ ރަސްމީ އެއް އިވެންޓް ކަމަށްވާ 100 މީޓަރުގެ ފައިނަލަށް ނުގޮސް، ފުރަތަމަ ފަހަރަށް، ކެޓުމެވެ. 

ސާއިދުގެ އެންމެ ފާހަގަކޮށްލެވޭ އަނެއް އިވެންޓް ކަމަށްވާ 200 މީޓަރު ދުވުމުގައި ވެސް އޭނާ ވާދަކުރާނެ އެވެ. އޭގެ ކުރިން އޭނާއަށާއި، ދެން ހުރި ބައެއް އެހެން އިވެންޓްތަކުގައި ދުވަން ތައްޔާރުވެފައި ތިބި އަނެއް ތިން ދުވުންތެރިންނަށް އޮތީ، ލޯ މެޑެލްގެ ކާމިޔާބު ފާހަގަކޮށްލުމެވެ.