'ހާޝިމް ބިރިޔާނި' ނިސްބަތްވާ ހާޝިމް ހުސެއިންގެ ވާހަކަ

ހާޝިމް ހުސެއިންއޭ ބުންޏަސް އެއީ މާ ހާއްސަ ނަމަކަށް ވެ، އެއީ ކާކުކަން ގިނަ ބަޔަކަށް ނޭނގޭނެ އެވެ. ނަމަވެސް 'ހާޝިމް ބިރިޔާނީ' ނުދަންނަ މީހަކު މާލޭގައި މަދުވާނެ ކަމަށް ބަލަމާ ހިނގާށެވެ. 

ކުއްޖަކަށް ނަން ކިޔަން ވެސް ހާޝިމް ބިރިޔާނި އެވެ. ހިތާނީ ދުވަސްވަރުގެ ކެއުންތައް ކަމަށް ވިޔަސް މާހަފަން ވިޔަސް ގިނަ ބަޔަކު ގުޅަނީ ހާޝިމް ބިރިޔާނީގެ ނަންބަރަށެވެ. ބޮނޑިބަތާއި ކުޅިމަސް ހަދަން ވިޔަސް އެ ނަމެވެ. 

ހާޝިމް ބިރިޔާނި މިހާރު މި އޮތީ އާންމު ނަމަކަށް ވެފަ އެވެ.

ހާޝިމް ބިރިޔާނި ނިސްބަތްވަނީ ސޯސަންމަގު ސިޓީ ބޭކަރީ ކުރިމަތީގައި ހުންނަ 'ދަ ބޭކް ހައުސް' އަށެވެ. ހާޝިމް ހަސަންގެ ހިއްސާ އޮންނަ އެތަނުން ހާޝިމްގެ ހާއްސަ ބިރިޔާނީގެ އިތުރުން އޭނާގެ އެހެން ކެއުންތައް އަބަދުވެސް ލިބެން ހުރެ އެވެ.

"ހާޝިމް ބްރޭންޑަކަށް ވަނީ އަމިއްލައަށް ހަވާދު ހަދާތީ. ކޮލިޓީ ހިފެހެއްޓޭތީ ކަމުދަނީ. ހާޝިމް ބިރިޔާނި ތަފާތުވާ ގޮތަކީ ދިވެހިވަންތަ ގޮތަކަށް ދިވެހިންނަށް ކަމުދާ ގޮތަށް އެއްޗެހި އަޅާތީ. ފިޔާ، މޭބިސްކަދުރު، ކެޝޫނަޓް، ފިނިފެނާ އެއްޗެހި އަޅަން. މީހުންނަށް ތަފާތުވޭ،" ހާޝިމް ބުންޏެވެ.

އޭނާ ބޮނޑިބަތް ވެސް ކައްކަނީ ދިވެހިންނަށް ކަމުދާ ގޮތަށް އެންމެ ކުރިއްސުރެ ދިވެހިން ކައްކަން ބޭނުންކުރި އެއްޗެހި އަޅައިގެންނެވެ. 

"ބޮނޑިބަތުގައި ދުވަހަކު ވެސް ހަނޑޫ ރޯކޮށް ހުންނަ ގޮތަކަށް ނޫން ކައްކަނީއެއް،" ބޮނޑިބަތުގެ ވާހަކަ ފަށަމުން ހާޝިމް، 55، ބުންޏެވެ.

"މާފެނާ އެއްޗެހި އަޅައިގެން ވަރަށް ރަނގަޅަށް ތައްޔާރުކުރަނީ. ކާށިކިރު އަޅައިގެން. ފިނިފެނުގެ ބަދަލުގައި މާފެން އަޅާތީ މީހުން ވަރަށް ބަލައިގަނޭ. މާފެން ގަނެގެން އަޅަނީ. ދިވެހި އެއްޗެހި ބޮޑަށް ބޭނުންކުރަން."

ދިވެހިންނަށް ހާޝިމްގެ އުފެއްދުން ކަމުދާ މިންވަރު ދެނެގަންނާނެ އެެއްގޮތަކީ އޭނާއަށް ލިބޭ އޯޑަރެވެ. އާންމުކޮށް އެވްރެޖްކޮށް ދުވާލަކު 300 އެއްހާ އޯޑަރު ނަގަ އެވެ. ހާޝިމް ބިރިޔާނީގެ އުފެއްދުން މަދު އަދަދުން ގަންނަން ބޭނުންވާ މީހުންނަށް 'ދަ ބޭކް ހައުސް'ގެ ލިބެން ހުންނާނެ އެވެ. އޯޑަރު ބޮޑު ނަމަ ވަކިން ތައްޔާރުކުރަނީ އެވެ.

ހާޝިމް ބިރިޔާނީގެ ނަން އައީ ހާޝިމް ހަސަން އެންމެ ފުރަތަމަ ބިރިޔާނި ހަދައިގެން އާންމުންނަށް ވިއްކި ހިސާބުންނެވެ. އެއީ އެ ބިރިޔާނި މީރުވެގެން އޭނާގެ ނަމަށް ނިސްބަތްކޮށް ކަސްޓަމަރުން ސީދާ ކިޔަން ފެށި ނަމެކެވެ.

"ހާޝިމް ބިރިޔާނިއަކަށް ވީ ކަސްޓަމަރުން ކައިފައި ސަޕޯޓުކޮށްފައި އެމީހުން މިއަށް ހާޝިމް ބިރިޔާނީ ނަމުން ދިނީ. ބުނީ އެހެން ނަމެއް މިއަކަށް ކަމަކުނުދެޔޭ. ހާޝިމް ނަމުންނޭ ނަން ދޭންވާނީ،" އޭނާ ބުންޏެވެ.

ހާޝިމް ބުނި ގޮތުގައި އޭނާގެ ނަމަށް ނިސްބަތްކޮށް ބިރިޔާނި މަޝްހޫރުވުމަކީ އޮތް ވަރަށް ބޮޑު އުފަލެކެވެ. އެހެންވެ ބޭކް ހައުސްގެ އިސް ވެރިޔާ ވެސް އެތަނުގެ ނަމަށް ވުރެ ހާޝިމް ބިރިޔާނީގެ ގޮތުގައި އުފެއްދުންތައް މަޝްހޫރުވިޔަސް މައްސަލައަކަށް ނުހަދަ އެވެ.

"ބޮޑުމީހާ ވެސް ބުނާނެ އަޅުގަނޑުގެ ނަމުގައި އަދި ނަންބަރު ދީގެން އިނަސް މައްސަލައެއް ނެތޭ، ގަބޫލުކުރޭ އަޅުގަނޑުގެ ސަބަބުންކަން މިތަން މަގުބޫލުވީ. އެއްފަހަރު ކައިފައި އަލުން އޯޑަރުކުރާނެ ކަމުގެ ޔަގީންކަން އޮވޭ،" އޭނާ ބުންޏެވެ.

ބޭކް ހައުސްއަށް ލިބޭ ބޮޑު އޯޑަރެއް ހާޝިމްގެ ބެލުމުގެ ދަށުން ނޫނީ ތައްޔާރެއް ނުކުރެ އެވެ. ނަމަވެސް ހައްޖު ނުވަތަ އުމްރާ ގްރޫޕަކާ އެކު މައްކާއަށް ދާ ދުވަސްވަރު އޯޑަރުތަކުގެ ޒިންމާ ނަގާނީ އޭނާއާ އެކު މަސައްކަތްކުރާ މުވައްޒަފުންނެވެ.

"ބޭރު ތިން މީހުންނަށް ކައްކަން ދަސްކޮށްދީފައި ހުންނާނީ. އެމީހުން އަޅުގަނޑު ނެތަސް ހަމަ އެގޮތަށް ހުރިހާ ކަމެއް ކުރާނީ. އެކަމަކު ކަސްޓަމަރުންނަށް ނޯޓިސްވެގެން ބުނާނެ ހާޝިމް ނެތީމާ އެނގެޔޭ. އަޅުގަނޑު ބުނާނީ އެމީހުންގެ ކެއްކުން ވެސް ވަރަށް ރަނގަޅޭ،" ހާޝިމް ބުންޏެވެ.

ބޭކް ހައުސްއަށް އޯޑަރު ދޭ ނުވަތަ ހާޝިމް ބިރިޔާނީގެ އުފެއްދުންތަކަށް ގަޔާވާ ގިނަ މީހުންނަށް ހާޝިމް ފެނުނަސް ނޭނގޭނެ އެވެ. ބައެއް ފަހަރަށް އޭނާއަކީ ކާކުކަން ނޭނގި، ތައުރީފްކޮށްފައި ދެ އެވެ.

"އަޅުގަނޑު ކުރިމަތީގައި ހުއްޓާ އެބަ ބުނޭ ހާދަ މީރޭ މި ބިރިޔާނި. ހީވަނީ ހާޝިމް ބިރިޔާނި ހެންނޭ،" އޭނާ ބުންޏެވެ.

ހާޝިމަކީ ވެސް ރާއްޖޭގައި ހޮޓާ/ކެފޭ ހިންގުމުގެ ބާނީއެއްގެ ގޮތުގައި ބެލެވުނު ދަނބުމާ ފާއިޒްގެ ކައިރިން އެކަން ފެށި ކައްކާއެކެވެ. ދާދި ފަހުން ދަނބުމާ ފާއިޒް ވަނީ އަވަހާރަވެފަ އެވެ. މީގެ 35 ވަރަކަށް އަހަރު ކުރިން 1988ގައި މާލެ އައި ގޮތަށް ހާޝިމް އެންމެ ފުރަތަމަ ވެސް ދިޔައީ ދަނބުމާ ފާއިޒުގެ ހޮޓަލަަށެވެ. އޭރު ވެސް އޭނާއަށް ކުޑަކުޑަކޮށް ކައްކަން އެނގެ އެވެ. ނަމަވެސް ރަނގަޅު ކައްކާއަކަށް ހަދައިދިނީ، ހާޝިމް ބުނި ގޮތުގައި، ފާއިޒް އެވެ.

ކައްކަން ދަސްކޮށްދިނުމަށް ފަހު ހާޝިމްއާ ހަވާލުކުރީ އޭރުގެ މަޝްހޫރު 'ކޫލް އިކުއިޕްމަންޓްސް' އެވެ. މަދު ދުވަސްކޮޅެއްގެ ތެރޭގައި ރާއްޖޭގެ ފުރަތަމަ 'ޓޭކްއަވޭ' ތައާރަފްކުރި އެވެ.

"ހެނދުނު 8 އިން 12އަށް ބަތް ޕާރުސަލް ޑެލިވަރީ ކުރާނީ. އަޅުގަނޑު ކުރާ ކަމަކީ އޯޑަރު ނެގުމާއި ޑެލިވަރީ ކުރުން. ބައެއް ފަހަރު ކެއްކުމުގެ މަސައްކަތްކުރަން. އޭރު އެހީތެރިވާ މީހުންނަށް ކެއްކުމުގެ މަސައްކަތް ދަސްކޮށްދީފައި ހުންނާނީ. މުވައްޒަފުން ވަރަށް މަދުވާނެ،" ހާޝިމް ކިޔައިދިނެވެ. 

އޭގެ ފަހުން މިހާރު ހާޝިމްގެ ހިއްސާ އޮންނަ 'ދަ ބޭކް ހައުސް'އަށް ބަދަލުވީ އެވެ. އެތަނުގައި 13 އަހަރު ވަންދެން އޭނާ އުޅުނީ މުސާރައަށެވެ. ނަމަވެސް މިހާރު އެއީ ހާޝިމްގެ ހިއްސާ ވެސް އޮވެގެން ހިންގާ ތަނެކެވެ.

ކައްކަން ފަށައިގަތް ދުވަސްވަރު އުމްރާ އާއި ހައްޖު ގްރޫޕްތަކުން ހާޝިމް ގެންދަން ފެށި އެވެ. އެހެންކަމުން އޭނާ އަންނަނީ 1998 އިން ފެށިގެން އެ ގްރޫޕްތަކާ އެކު ގޮސް ހައްޖުވެރިންނާއި އުމްރާވެރިންނަށް ކައްކައިދެމުންނެވެ. 

ހިލޭ ސާބަހަށް ކޮށްދޭ އެ މަސައްކަތުގައި މައްކާއަށް ދެވުނު އަދަދެއް ވެސް އޭނާއަކަށް ނޭނގެ އެވެ.

އުމުރާއި ހައްޖުވެރިންނަށް ކެއުން ތައްޔާރުކުރުމަކީ ބުރަ މަސައްކަތެކެވެ. ނަމަވެސް އޭނާ އެކަން ކުރަމުން އަންނަނީ އުފަލުންނެވެ.

"ކައްކަން ބޭނުންވާ ހަވާދު، ކާށިހުނި، މަސް، ހުރިހާ އެއްޗެއް ތައްޔާރުކޮށްގެން މިކޮޅުން ގެންދަނީ. ދެން އެހީތެރިވާނެ ފަސް މީހުން،" ހާޝިމް ބުންޏެވެ.

"ކުރިން އެކޮޅުގައި ތިބެން ޖެހޭނެ މަސް ދުވަސް. މުޅި މަހަށް ވާ ވަރަށް ގެންދަން ހުރިހާ އެއްޗެއް."

"އުމްރާއަށާއި ހައްޖަށް ދާ [ދުވަސްވީ] މީހުން އަޅުގަނޑު ދެކެ ދަރިއެއް ދެކެ ވާ ލޯބިވޭ. އެމީހުން އެހާ ބުރަކޮށް އަޅުކަމުގައި އުޅެފައި އައިސް ރަނގަޅު ދިވެހި ކާއެއްޗެއް ކާން ލިބުނީމަ ވަރަށް ހިތްހަމަޖެހޭ،" ހާޝިމް ބުންޏެވެ.

ބައެއް ރަށްރަށުގެ މީހުން ފާހަގަކުރާ ހާއްސަ ދުވަސްތަކަށް ކައްކަން ވެސް އޭނާ ގެންދެ އެވެ. އެކަމަކު އެއީ އެއްވެސް އަގެއް ނަގައިގެން އޭނާ ކުރާ ކަމެއް ނޫނެވެ. އޭނާ ބުނިގޮތުގައި ވަޒީފާގައި އުޅުނުއިރު މުސާރަ އާއި މިހާރު ޕާޓްނާޝިޕްގެ ގޮތުގައި ލިބޭ އާމްދަނީ ފިޔަވާ އޭނާ އަގެއް ނުނަގަ އެވެ. އެހެންކަމުން މިއީ ވަރަށް ހާއްސަ އަދި މީހުން ދެކެ އެހާ ލޯބިވާ ކައްކާއެއްކަން ވެސް އެނގެ އެވެ.

ކަސްޓަމަރުންގެ އިތުރުން އޭނާގެ އެންމެ ބޮޑު ސަޕޯޓަކީ އާއިލާ އާއި ވިޔަފާރީގެ ބައިވެރިޔާ ހަސަން މަނިކުގެ އާއިލާ އެވެ. ހާޝިމްގެ އެންމެ ބޮޑު ޝުކުރެއް އޮތީ އެމީހުންނަށެވެ.