ބާޒާރުގެ 'ހަމަ އަގުގައި' ދައުލަތަށް މާރުކުރެވޭނެ ގޮތް މެދުވެރިނުކޮށެއް ޑޮލަރުގެ މައްސަލައަށް ލުޔެއް ނުލިބޭނެ

ނާޒުކު ފައްތަރެއްގެ ތުންފަތްމައްޗަށް ޑޮލަރުގެ މައްސަލަ ހުށަހެޅުނީ، ގިނަ ދުވަސް ވަންދެން ފަރަށް އަރާފައިވާ އޮޑިއެއް، ވިސްނުންތެރިކަމާއި ކެތްތެރިކަން އެއްކިބާކޮށް، ކުއްލިއަކަށް ފުންކުރަން ހިފުމުންނެވެ. 

ޑޮލަރުގެ މައްސަލަ ހައްލުކުރާނަމޭ ބުނެ، ގާނޫނާއި ގާވާއިދުގެ އޮބީގައި ޑޮލަރު މާރުކުރުވަން ހިފުމަކީ، އިންފެކްޝަނެއްގެ ސަބަބުން އުފެދޭ ހުން މަޑުކުރަން ހަމައެކަނި ޕެނަޑޯލް ދިނުމެކޭ އެއްފަދަ ކަމެކެވެ. އިންފެކްޝަނަށް އެންޓިބަޔޮޓިކް ނުދޭ ނަމަ، ގަޑި ހަމަވާ އިރަށް އަލުން ހުން އަންނާނެ އެވެ. 

ރާއްޖޭގެ ވެށީގައި ކުރާ ވިޔަފާރީގެ އާމްދަނީ ރާއްޖޭގެ މާލީ ބާޒާރަށް ގެންނަން އެންގުމަކީ ރަނގަޅު ގޮތެވެ. އެއީ އެހެން ގައުމުތަކުގައި ވެސް އެކަންތައް އޮންނަ ގޮތެވެ. 

ނަމަވެސް ސީދާކޮށް ނުބުނި ނަމަވެސް، ދިމާވެގެން އުޅޭ އަސްލު މައްސަލައަކީ ބާޒާރުގައި ލިބެން ހުރި 'ހަމަ' އަގުގެ %20 ދަށުން، ސަރުކާރަށް ޑޮލަރު ވިއްކަން މަޖުބޫރުކުރަން އުޅުމެވެ. ރައްޓެއްސަކު ބުނި ފަދައިން 19.2 މިލިއަން ރުފިޔާއަށް ވިއްކެން އޮތް ބިމެއް، 15.42 މިލިއަން ރުފިޔާއަށް ސަރުކާރަށް ވިއްކަން މަޖުބޫރުކުރަން މަސައްކަތް ކުރުމެވެ. ވިޔަފާރިވެރިން ވެސް ސީދާކޮށް މިހެން ބުނާކަށް ބޭނުމެއް ނުވެ އެވެ. މިއުޅެނީ ބާޒާރުގެ 'ހަމަ' އަގަށް ވުރެ ހެޔޮކޮށް ޑޮލަރުކޮޅު ހޯދަން ކަމަށް ސަރުކާރަކަށް ވެސް ބުނަން ފަސޭހައެއް ނޫނެވެ. 

ރާއްޖޭގެ ބާޒާރުގައި މިއަދު ވިއްކަން ހުރި އެއްވެސް މުދަލެއް ވިއްކައި، ނުވަތަ ހިދުމަތެއް ދެވެން އޮތީ 15.42ރ. ރޭޓުގައި ހިސާބުކޮށްގެންނެއް ނޫނެވެ. އެދުވަހަކު ގަންނަން ލިބޭ އަގެއްގައި ޑޮލަރު ގަނެގެން، ދެންފަހަރަކުން ޑޮލަރު ގަންނަން ލިބޭނެ ކަމަށް ގަބޫލުކުރާ ރޭޓަށް އަގުހަދައިގެން ނޫން ގޮތަކަށް ވިއްކާ މުދަލެއް، ޚިދުމަތެއް އަޅުގަނޑުމެންގެ ބާޒާރަކު މިއަދަކު ނުުހުންނާނެ އެވެ. މަރުކަޒީ ބޭންކް އެމްއެމްއޭއިން ކަނޑައަޅާފައި އޮންނަ 15.42ރ.ގެ ރޭޓުގައި ޑޮލަރު ލިބެނީ ހަމައަކަނި ރާއްޖެއިން ބޭރަށް ފުރަން ދާ މީހާއަށް، އެެއާޕޯޓުގެ ބޭރު ފުޅަލި ހިއްލުމުން ލިބޭ 500 ޑޮލަރެވެ.

އެހެންކަމުން ބާޒާރުގެ 'ހަމަ އަގަށް' ޑޮލަރު ރޭޓް ބަދަލުކުރުމަކީ ބާޒާރުގެ ހަގީގަތަށް ވާސިލުވުމެވެ. ބާޒާރުގެ 'ހަމަ އަގަށް' ޑޮލަރު ވިއްކޭނެ މަގު ފަހިކޮށްދީގެން މެނުވީ ޑޮލަރުގެ ބްލެކް މާކެޓް ނައްތައެއް ނުލެވޭނެ އެވެ. 

ގަބޫލުކުރެވޭ ގޮތުގައި ޑޮލަރުގެ އަގު މި ވަގުތު މިހާ މަތީގައި އުޅެނީ ދައުލަތާއި ޓުއަރިޒަމް ސިނާއަތާ ދެމެދު 'ރޯ ކޮށްފައިވާ' އަލިފާނުގެ ހޫނު ވެސް އުފެދިގެންނެވެ. ދެކޮޅުން ވެސް ދޫނުދީ ކުރިޔަށް ގެންގޮސްފާނެ ކަމަށް ގަބޫލުކުރެވުމުން، ސްޕެކިޔުލޭޓިވް ޑިމާންޑް އުފެދެނީ އެވެ. އިގުތިސާދީ އަސާސްތަކަށް ބޯލަނބައި، ބާޒާރުގެ އަގަށް ޑޮލަރުގެ ރަސްމީ އަގު ބަދަލުކުރާނޭކަން ހަމައެކަނި އިއުލާނު ކުރުމުން ވެސް، ސައިބޯނި ބޮތްކެއް ފަދައިން ސްޕެކިޔުލޭޓިވް ޑިމާންޑް އުވި، ޑޮލަރުގެ އަގުގައި ބުރަކި ޖެހޭނެ އެވެ. އުނދުނުގެ ގިނި މަޑުކޮށް، މައިތިރިއަށް ނުކިޔަވާ ކަމުގައި ވަންޏާ، ކެކެމުންދާ ބަތްތެލި ފުލުގައި ނުހިފައެއް ނުދާނެ އެވެ. 

ބޭންކްތަކަށް ވެސް އަސްލު ދިމާވެގެން އުޅޭ މައްސަލައަކީ މި އެވެ. މިހާރު އޮތް 15.42ރ. ގެ ރޭޓުގައި ބޭންކުތަކަށް ލިބެނީ ބޭނުންވާ އަދަދުގެ މަދު މިންވަރެކެވެ. 'ދީނުން ބޭރުވި' ކުރީގެ ސީއީއޯ ވެސް ބުނަމުން ގެންދިޔައީ މި ވާހަކަ އެވެ. ރަސްމީ ރޭޓުގައި ބޭންކުތަކަށް ބޭނުންވާ އަދަދަށް ޑޮލަރު ނުލިބެނީ ނަމަ، ކިތަންމެ ފާޓުފުޅާ ސީއީއޯއެއް އައްޔަނު ކުރިޔަސް، ހިނގަން ޖެހޭނީ ކުރީ ހިނގި މަގުންނެވެ. 

ރާއްޖޭގެ މާލީ ބާޒާރުގައި ގުޅި ލާމެހިފައިވާ ބޮޑެތި މައްސަލަތަކެއް އެބަ ހުއްޓެވެ. މުޅި މައްސަލަ ހައްލުކުރެވޭނީ ވިސްނުންތެރިކަމާއި، ކެތްތެރިކަމާ އެކު ވަށައިޖެހޭ ބަދަލުތަކެއް ގެނެވިގެންނެވެ. ވަށައިޖެހޭ ބަދަލުތަކަކަށް ޖާގަ ނުދީ، ބޮޑު މަރުތޭލުން ފެށުމުން، މައްސަލައަށް ހައްލެއް ލިބުމުގެ ބަދަލުގައި ފެންނަނީ، އެކި ދިމާލުގައި ރެނދު ލަމުން ދާ މަންޒަރެވެ.