ދުވާފަރު އެމްޑީޕީ ކައުންސިލަރު ޔަޝްފާ ފުލުހަށް ހާޒިރުވާން އަންގައިފި

އިދިކޮޅު އެމްޑީޕީގެ ޖަލްސާތަކުގައި ބަންޖާއި ރައިވަރު ކިޔައިގެން މަޝްހޫރުކަން ހޯދާފައިވާ، ރ. ދުވާފަރު ކައުންސިލްގެ މެންބަރު މަރިޔަމް ޔަޝްފާ ފުލުހަށް ހާޒިރުވާން އަންގައިފި އެވެ.

ވީ ކިހިނެއް؟ - ޔަޝްފާ ފުލުހަށް ހާޒިރުވާން އެންގީ އެމްޑީޕީ ދަނޑިކޮށި ޖަގަހައިގައި ދެއްކި ވާހަކަތަކާ ގުޅިގެން އޭނާއަށް ކުރާ ތުހުމަތުތަކާ ގުޅޭ ގޮތުން ސުވާލު ކުރުމަށެވެ.

ބުނީ ކީކޭ؟ - ޔަޝްފާ މިއަދު 'ދައުރު'އަށް ވިދާޅުވީ އޭނާ ފުލުހަށް ހާޒިރުވުމަށް ފުރަތަމަ ގުޅީ ދުވާފަރު ފުލުހުން ކަމަށެވެ. އޭނާ މާލޭގައި ހުރުމުން ފަހުން ސީދާ ހެޑްކުއާޓަރުން ގުޅައި ފުލުހަށް ހާޒިރުވުމަށް އެންގި ކަމަށް އޭނާ ވިދާޅުވި އެވެ.

"އަޅުގަނޑު ދެން ސުވާލު ކުރިން، ޗިޓު ކޮބައި ހެއްޔެވެ؟ ޗިޓު މިއަދުގެ ވަގުތެއްގައި ރައްދުކުރާނެ ކަމަށް ފުލުހުން ބުނި. މާދަމާގެ ވަގުތެއްގައޭ ހާޒިރުވާން ޖެހޭނީ،" ޔަޝްފާ ވިދާޅުވި އެވެ.

ޔަޝްފާ ވަނީ އެމްޑީޕީން ކާނިވާ ސަރަހައްދުގައި 'ގާނޫނުއަސާސީގެ ދިފާއުގައި ރައްޔިތުން' ނަމުގައި އެންމެ ފަހުން ބޭއްވި ޖަލްސާގައި ވެސް ރައިވަރެއް ކިޔައިފަ އެވެ. ދަނޑިކޮށި ޖަގަހައިގައި ވެސް އޭނާ ރައިވަރެއް ކިޔާފައިވެ އެވެ.